އިންޑިއަން އޯޝަން އައިލެންޑް ގޭމްސްގެ 2027 ގައި ބޭއްވުމުގެ ފުރުސަތު ރާއްޖެއަށް ލިބިގެންދާނެ ކަމުގެ އުންމީދު ބޮޑު ކަމަށް ރާއްޖޭގެ އޮލިމްޕިކް ކޮމިޓީގެ ޖެނަރަލް ސެކެޓްރީ އަހްމަދު މަރުޒޫގް ވިދާޅުވެއްޖެއެވެ.
އޮލިމްޕިކް ކޮމިޓީގެ އަހަރީ އާންމު ޖަލްސާއަށް ފަހު މީޑިއާ އާ ވާހަކަ ދައްކަމުން މަރުޒޫގް ވިދާޅުވީ 2027 ގެ ގޭމްސް ބޭއްވުމުގެ ފުރުސަތު ރާއްޖެއަށް ލިބިގެންދާނެ ކަމުގެ ފުރިހަމަ ޔަގީންކަން އެބައޮތް ކަމަށެވެ. އަދި ފެބްރުއަރީ 17 ގައި މަޑަގަސްކަރައިގައި ބާއްވާ ކީގްގެ ބައްދަލު ވުމުގައި އެކަން އެޖެންޑާ ކުރުމަށް ރާއްޖެއިން މިހާރު ހުށަހަޅާފައި ވާނެ ކަމަށް ވިދާޅުވިއެވެ.
ތިން އަހަރު ފަހަުން ބާއްވަން ތާވަލު ކޮށްފައިވާ 2023 ގެ ގޭމްސް ހޯސްޓް ކުރުމުގެ ފުރުސަތު އެންމެ ފުރަތަމަ ލިބުނީ ރާއްޖެއަށެވެ. ކޮވިޑް-19 އާ ގުޅިގެން ކުރިމަތިވި ހާލަތަުގެ ސަބަބުން ގޭމްސް ފަސް ކުރުމަށް ރާއްޖެއިން ހުށަހެޅުމުން އިންޑިއަން އޯޝަން އައިލެންޑް ގޭމްސްގެ ކައުންސިލް (ކީގް) ގައި މަޑަގަސްކަރަ އިން 2023 ގެ ގޭމްސް ބޭއްވިދާނެ ކަމަށް ހުށަހެޅުމުން ގޭމްސްގެ ކައުންސިލުން ފާސް ކުރީ ގޭމްސް ބިޑު މަޑަގަސްކަރަށް ދިނުމަށެވެ. މިދިޔަ އަހަރު ގޭމްސްއަށް ރާއްޖެއިން ބިޑް ކުރިއިރު ރާއްޖެއާ އެންމެ ބޮޑަށް ވާދަ ކުރީވެސް މަޑަގަސްކަރަ އިންނެވެ.
މަރުޒޫގް ވިދާޅުވީ 2023 ގެ ގޭމްސް އާ މެދު ގޮތެއް ނިންމުމަށް އޮލިމްޕިކް ކޮމިޓީ އާއި އެސޯސިއޭޝަންތަކުން މަޝްވަރާ ދިންނަމަވެސް 2025 އަށް ގޭމްސް ފަސް ކުރުމަށް ހުށަހެޅުމަށް ނިންމީ ކެބިނެޓުން ކަމަށެވެ.
ފެބްރުއަރީ 17 ގައި މަޑަގަސްކަރައިގައި އޮންނަ މީޓިންގައި އެކަން އެޖެންޑާ ކުރުމަށް އަޅުގަނޑުމެން ވާނީ މިހާރު ހުށަހަޅާފަ.
– މަރުޒޫގް ވިދާޅުވިއެވެ.
މަރުޒޫގް ވިދާޅުވީ އައިއޯއަިޖީ މެންބަރު ބައެއް ގައުމުތަކަކީ އެ ގޭމްސް ފިޔަވައި އެހެން ކުޅިވަރު ގޭމްސްތަކުގައި ވާދަ ކުރަން ފުރުސަތު ލިބޭ ގައުމުތަކެއް ނޫން ކަމަށެވެ. އެހެންވެ އެ ގައުމުތަކުގެ އެތުލީޓުން ހަ އަހަރު ވަްނދެން ގޭމްސްއެއްގައި ވާދަ ނުކުރެވޭނެ ގޮތަށް ވާން އެ ގައުމުތަކުން ބޭނުން ނުވީ ކަމަށެވެ.
ކޮމެންޓު ފޮނުވާ