ވެލާނާ އިންޓަނޭޝަނަލް އެއާޕޯޓް (ވީއައިއޭ) ތަރައްޤީކުރުމުގެ މަޝްރޫޢަށް އަބޫދާބީ ފަންޑް ފޮރ ޑިވެލޮޕްމަންޓް (އޭޑީއެފްޑީ) އިން 40 މިލިއަން ޑޮލަރުގެ އިތުރު ލޯނު އެހީއެއް ދިނުމަށް އެއްބަސްވެ، ދެ ފަރާތުގެ މެދުގައި އެއްބަސްވުމުގައި ސޮއިކޮށްފިއެވެ.
މި އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ފިނޭންސް މިނިސްޓަރު މޫސާ ޒަމީރު އެވެ. އަދި އަބޫދާބީ ފަންޑުގެ ފަރާތުން ސޮއިކުރެއްވީ އެ ފަންޑުގެ ޑިރެކްޓަރ ޖެނެރަލް މުޙައްމަދު ސައިފް އަލް ސުވައިދީއެވެ. އެއްބަސްވުމުގައި ސޮއިކުރެއްވުމަށްފަހު މިނިސްޓަރު މޫސާ ޒަމީރު ވިދާޅުވެފައިވަނީ، ވީއައިއޭ ތަރައްޤީކުރުމުގެ މަޝްރޫޢުގެ ސަބަބުން ޓޫރިޒަމުން ލިބޭ އާމްދަނީ އިތުރުވެގެންދާނެ ކަމަށެވެ.
އަބޫދާބީ ފަންޑުގެ އިތުރުން، ސައުދީ ފަންޑުންވެސް ވަނީ މި މަޝްރޫޢަށް ކުރިން ލޯނު އެހީ ފޯރުކޮށްދީފައެވެ. ފާހަގަކޮށްލެވޭ ކަމަކީ، ވީއައިއޭ ތަރައްޤީކުރުމުގެ މި މަޝްރޫޢު އެންމެ ފުރަތަމަ ފެށިފައިވަނީ ކުރީގެ ރައީސް ޢަބްދުﷲ ޔާމީންގެ ވެރިކަމުގައި ކަމެވެ. މިހާރު މި މަޝްރޫޢުގެ ދަށުން އިމާރާތްކުރެވޭ އައު ޓާމިނަލްގެ މަސައްކަތް ނިންމައި، އަންނަ އަހަރު ހުޅުވުމަށް ދަނީ މަސައްކަތްތައް ކުރެވެމުންނެވެ.
