ވެމްކޯގެ ހިދުމަތް ކ. ހިންމަފުށީގައި ރަސްމީކޮށް މިއަދު ރައީސް ޑރ. މުހައްމަދު މުއިއްޒު ފައްޓަވާ ދެއްވައިފިއެވެ.
މިމަސައްކަތް ރަސްމީކޮށް ފެށިގެންދިޔަ ނަމަވެސް އަމަލީ މަސައްކަތް ފެށުމުގެ ކުރިން މުވައްޒަފުން ނެގުމުގެ މަސައްކަތް ނިންމަން ޖެހޭނެކަމަށާއި، ކުނި ނެގުމުގެ މަސައްކަތް ފެށުމަށް ގާތްގަނޑަކަށް 10 ދުވަހެއް ހޭދަވާނެ ކަމަށް ވެމްކޯގެ އިސް މުވައްޒަފެއް މައުލޫމާތު ދެއްވިއެވެ.
ވެމްކޯއިން މިހާރު ވަނީ މާލެ ސަރަހައްދުގެ އިތުރުން ރާއްޖޭގެ އެކި ކަންކޮޅުތަކަށް އެ ކުންފުނީގެ ހިދުމަތް ފުޅާކޮށްފައެވެ. މި އަހަރުގެ ތެރޭގައި ވަނީ ހދ. ކުޅުދުއްފުއްޓާއި ގދ. ތިނަދޫއަށްވެސް މި ހިދުމަތް ފޯރުކޮށްދީފައެވެ. އަދި މީގެ އިތުރުން ރިސޯޓުތަކުގެ ކުނި އުކާލުމުގެ ހިދުމަތްވެސް މި ކުންފުނިން މިހާރު ވަނީ ފަށާފައެވެ.
ސަރުކާރުން މިހާރު ވަނީ ރާއްޖޭގެ މީހުން ދިރިއުޅޭ ރަށްތަކުގެ ކުނީގެ މައްސަލައަށް ދާއިމީ ހައްލެއް ހޯދުމަށް ގައުމީ ޕްލޭނެއް ތައާރަފުކޮށްފައެވެ. މި ޕްލޭންގެ މައިގަނޑު މަގުސަދަކީ ކުނި އުފެދޭ މަސްދަރުން ފެށިގެން، އެ ކުނި ނައްތާލުމާ ހަމައަށް ތިމާވެއްޓާ ރައްޓެހި ގޮތެއްގައި އަދި ވަށާޖެހޭ ގޮތަކަށް ކުނި މެނޭޖްކުރުމެވެ. އަދި މި ޕްލޭންގެ ދަށުން ކުނި މެނޭޖްކުރުމުގެ މިހާރުގެ ހާލަތު ދެނެގަނެ، އާންމުން ހޭލުންތެރިކުރުވުމުގެ މަސައްކަތްތަކެއް ވެސް ކުރިއަށް ގެންދެވޭނެއެވެ.
