ނޮވެމްބަރު 3 ގެ އުދުވާނީ ހަމަލާގައި ޝަހީދުވި ފަރާތްތަކުގެ ޢާއިލާތަކަށް އެލަވަންސެއް ދިނުމަށާއި އެފަރާތްތަކަށް 50 ހައުސިން ޔުނިޓް އެކުލެވޭ ހައުސިންގ ކޮމްޕްލެކްސްއެއް ތަރައްޤީކުރުމަށް ސަރުކާރުން ނިންމާފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އާދިއްތަ ދުވަހުގެ ރޭ އިޢުލާނުކުރައްވައިފިއެވެ.
ރައީސް މުއިއްޒު މިކަން އިއުލާން ކުރެއްވީ ނަސްރުގެ ދުވަސް ފާހަގަކުރުމަށް އާދިއްތަ ދުވަހުގެ ރޭ ބޭއްވުނު ރަސްމީ ޖަލްސާގައި ދެއްކެވި ވާހަކަފުޅުގައެވެ.
ރައީސްގެ ވާހަކަފުޅުގައި ނޮވެމްބަރު 3 ގެ އުދުވާނީ ހަމަލާގައި އަށް ސިފައިންނާއި 11 އާންމު ރައްޔިތުން ޝަހީދުވެފައިވާކަން ފާހަގަކުރެއްވިއެވެ. އަދި 1979 އިން ފެށިގެން އެކި ހާދިސާތަކުގައި 29 ސިފައިންނާއި ދެ ފުލުހުން ނިޔާވެފައިވާކަންވެސް ފާހަގަކުރެއްވިއެވެ.
ފަހުގެ ސަރުކާރުތަކުން މި ފަރާތްތަކަށް އެކަށީގެންވާ އިޙްތިރާމް ދެވިފައިނުވާކަން ރައީސް ފާހަގަކުރެއްވިއެވެ.
"ކުރީގައި ޝަހީދުންގެ ޢާއިލާތަކަށް އެހީގެ ގޮތުގައި ބައެއް ފައިސާ ދެވެމުން ދިޔަ. ނަމަވެސް ފަހަކަށް އައިސް މިކަން ވަނީ ހުއްޓިފައި. މިއީ ވަރަށް ބޮޑު އިންސާފުވެރިނޫން ކަމެއްކަމުގައި އަޅުގަނޑު ދެކެން،" ރައީސް ވިދާޅުވިއެވެ.
އެހެންކަމުން، މިއަހަރުން ފެށިގެން ޝަހީދުންގެ ޢާއިލާތަކަށް ގަވާއިދުގައި ޝާއިޢުކުރެވޭ ވަކި އުސޫލެއްގެ ދަށުން، ދެމެހެއްޓެނިވި ގޮތެއްގައި އެލަވަންސް ދެވޭނެކަމަށް ވިދާޅުވިއެވެ. މީގެ ތެރޭގައި ނޮވެމްބަރު 3 ގެ ޚާއްޞަ ހިތްވަރުގަދަކަމުގެ މެޑެލް ލިބިފައިވާ ފަސް ފަރާތާއި ހިތްވަރުގަދަކަމުގެ މެޑެލް ލިބިފައިވާ 10 ފަރާތް ހިމެނެއެވެ.
"މީގެ އިތުރުން، 'ޝަހީދުންގެ ހިޔާ' ގެ ނަމުގައި 50 ގޭގެ ހައުސިންގ ކޮމްޕްލެކްސްއެއް ޝަހީދުންގެ ޢާއިލާތަކަށް ޚާއްޞަކޮށްގެން ތަރައްޤީކުރެވި، މި ދައުރުގެ ކުރިއަށް އޮތް އަހަރުތަކުގެ ތެރޭގައި ނިންމައި ޢާއިލާތަކާ ހަވާލުކުރެވޭނެ،" ރައީސް އިތުރުކުރެއްވިއެވެ.
