މިދިޔަ މަސް ނިމުނު އިރު، ބޭނުން ކުރެވޭ ރިޒާވްގައި ހުރި އަދަދު 49 މިލިއަން ޑޮލަރަށް އަރައިފިއެވެ.
އެމްއެމްއޭ އިން އާންމުކުރި ތަފާސްހިސާބުތަކުން އެނގޭ ގޮތުން މިދިޔަ މަހު ރާއްޖޭގެ ޖުމްލަ ރިޒާވް ހުރީ 371 މިލިއަން ޑޮލަރުގައެވެ. އަދި މިދިޔަ މަހު ދަރަންޏާއި ތެލުގެ ހަރަދުތަކަށް 322 މިލިއަން ޑޮލަރު ހޭދަކުރަން ޖެހުމުން ރިޒާވް ވަނީ ވެއްޓިފައެވެ.
މި މަހުގެ ކުރީ ކޮޅު ރައީސް ޑރ. މުހައްމަދު މުއިއްޒު އިންޑިއާ އަށް ކުރެއްވި ދަތުރުފުޅުގައި ރާއްޖެ-އިންޑިއާއާ ދެމެދު 750 މިލިއަން ޑޮލަރުގެ ކަރަންސީ ސްވޮޕް ފެސިލިޓީއެއްގައި ވަނީ ސޮއިކޮށްފައެވެ. އޭގެ ތެރޭގައި ހިމެނެނީ 400 މިލިއަން ޑޮލަރާއި 30 ބިލިއަން އިންޑިއަން ރުޕީސްގެ ސްވޮޕް ފެސިލިޓީއެވެ.
ރާއްޖޭގައި ބޭނުން ކުރެވޭ ރިޒާވް އެންމެ ދަށަށް ދިޔައީ މިދިޔަ ޖުލައި މަހުއެވެ.އެ މަހު ރިޒާވްގައި ހުރީ 45 މިލިއަން ޑޮލަރެވެ. މި އަހަރު ފެށުނު އިރު ޔޫޒަބަލް ރިޒާވްގައި ހުރީ 110 ޑޮލަރެވެ.
އެމްއެމްއޭ އިން ދާދި ފަހުން ވަނީ ޑޮލަރުގެ ދަތިކަން ހައްލު ކުރުމަށް ޓޫރިޒަމް ހިދުމަތްދޭ ހުރިހާ ތަނެއްގެ އާމްދަނީ ރާއްޖޭގެ ބޭންކްތަކަށް ޖަމާކޮށް، ކޮންމެ މަހެއްގެ އާމްދަނީން ވަކި އަދަދެއް ބޭންކްތަކަށް ސީދާ މާރުކުރަން ޖެހޭ ގޮތް ހަދައިފައެވެ. އެގޮތުން ރިސޯޓުތަކުން ކޮންމެ ޓޫރިސްޓެއްގެ ބޮލަކަށް 500 ޑޮލަރު މާރުކުރަން ޖެހޭ އިރު ގެސްޓް ހައުސްތަކުން ޓޫރިސްޓެއްގެ ބޮލަކަށް 25 ޑޮލަރު މާރުކުރަން ވަނީ ކަނޑައަޅައިފައެވެ.
