ރާއްޖޭގައި ހުރި ބައެއް އެމްބަސީތައް ކައިރީގައި އިޒްރޭލާ ދެކޮޅަށް އަޑުއުފުލި މައްސަލައިގައި ހައްޔަރުކުރެވުނު އައިޝަތު ޝާދިޔާގެ ބަންދުގެ މުއްދަތު އިތުރުކުރުމަށް ކުރިމިނަލް ކޯޓުން ނެރުނު އަމުރަކީ ގޯސްކޮށް ނެރެފައިވާ އަމުރެއްކަމަށް ހައިކޯޓުން ހުކުމްކޮށްފިއެވެ.
މި މައްސަލައިގައި ހައްޔަރުކުރެވުނީ އައިޝަތު ޝާދިޔާ (47އ) އާއި ޑރ. ޝަދުރާ އިބްރާހިމް (36) އެވެ. މި ދެ ފަރާތް ހައްޔަރުކުރެވުނީ ޑިޕްލޮމެޓިކް މިޝަންތަކުގެ ކައިރިއަށް ތަކުރާރުކޮށް އެއްވެ، އަޑުގަދަކުރާ ބޭނުންކޮށްގެން ހަޅޭއްލަވައި، ވަކި ސަފީރަކަށް އުނދަގޫކުރުމުގެ ޢަމަލުތައް ހިންގަމުންދާ ކަމުގެ ތުހުމަތުގައެވެ. މި ދެ ފަރާތް ހައްޔަރުކުރުމަށްފަހު ދެ ފަހަރެއްގެ މަތިން އެމީހުންގެ ބަންދުގެ މުއްދަތު އިތުރުކުރެވުނެވެ. ނަމަވެސް މިދިޔަ ސެޕްޓެމްބަރު މަހުގެ ތެރޭގައި، އެމްބަސީތައް ކައިރިއަށް އެއްނުވާން ޝަރުތުކޮށް އެ ދެ ފަރާތް ވަނީ ދޫކޮށްލާފައެވެ.
މި މައްސަލައާ ގުޅިގެން އެ ދެ ފަރާތް ބަންދުކުރީ ޤާނޫނާ ޚިލާފަށް ކަމަށް ހައިކޯޓުން މި މަހުގެ އަށްވަނަ ދުވަހު ވަނީ ހުކުމްކޮށްފައެވެ. އަދި މިހާރު ޝާދިޔާގެ ފަރާތުން ބަންދުގެ މުއްދަތު އިތުރުކުރި މައްސަލަވެސް ހައިކޯޓަށް ހުށަހަޅާފައިވެއެވެ.
ހައިކޯޓުގެ ތިން ފަނޑިޔާރުންގެ އިއްތިފާޤުން ނިންމާފައިވަނީ، އެ ފަރާތްތަކުގެ ބަންދުގެ މުއްދަތު އިތުރުކުރުމަށް ކުރިމިނަލް ކޯޓުން ކުރި އަމުރު ބާޠިލު ކަމަށެވެ. މި މައްސަލަ ބެލި ބެންޗުގެ އިސް ފަނޑިޔާރަކީ ހުޒައިފާ މުޙައްމަދެވެ. އަދި އެހެން ދެ ފަނޑިޔާރުންނަކީ ހަސަން ޝަފީޢު އަދި ޢަބްދުލްމާނިޢު ޙުސައިނެވެ.
