ވޭސްޓް މެނޭޖްމެންޓް ކޯޕަރޭޝަން (ވެމްކޯ) އިން ފަހުން ތަޢާރަފުކުރި "ހޮބާ" ޚިދުމަތް ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އަށް ފޯރުކޮށްދިނުމަށް ދެ ކުންފުނި ދެމެދު އެއްބަސްވުމެއްގައި ސޮއިކޮށްފިއެވެ.
"ހޮބާ" އަކީ ވެމްކޯގެ ޚިދުމަތްތައް އިތުރަށް ފުޅާކުރުމުގެ ގޮތުން، ސަރުކާރު އޮފީސްތަކާއި އަމިއްލަ ވިޔަފާރިތަކުގެ އޮފީސްތަކާއި އިމާރާތްތައް ފޮޅާ ސާފުކުރުމަށް ޚާއްޞަކޮށްގެން ފަށާފައިވާ ޚިދުމަތެކެވެ. މި ޚިދުމަތް ސްޓެލްކޯއަށް ދިނުމަށް ދެ ކުންފުނި ދެމެދު އެއްބަސްވުމުގައި ސޮއިކުރެވުނީ ބުރާސްފަތި ދުވަހުއެވެ.
އެއްބަސްވުމުގައި ވެމްކޯގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރު މުޖުތަބާ ޖަލީލެވެ. އަދި ސްޓެލްކޯގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރު ޙުސައިން ފަހުމީއެވެ.
މި އެއްބަސްވުމުގެ ދަށުން، މާލެ، ހުޅުމާލެ އަދި ވިލިމާލޭގައި ހުރި ސްޓެލްކޯގެ އިމާރާތްތަކާއި، ސްޓެލްކޯ ހިޔާގެ ދެ ޓަވަރު ފޮޅާ ސާފުކުރުމުގެ ޚިދުމަތް ވެމްކޯއިން ފޯރުކޮށްދޭނެ ކަމަށް އެ ކުންފުނިން މަޢުލޫމާތު ދީފައިވެއެވެ.
"ހޮބާ" ޚިދުމަތް ވެމްކޯއިން ފަށާފައިވަނީ މިދިޔަ މަހުގެ ތެރޭގައެވެ. މި ޚިދުމަތް މިހާރުވެސް ވެމްކޯއިން ދަނީ ހައެއްކަ ކުންފުންޏަކަށް ފޯރުކޮށްދެމުންނެވެ. ސްޓެލްކޯއާއެކު ވެވުނު މި އެއްބަސްވުމާއެކު، "ހޮބާ" ޚިދުމަތް ލިބިގަންނަ ފަރާތްތަކުގެ ދާއިރާ އިތުރަށް ފުޅާވެގެންދާނެ ކަމަށް ބެލެވެއެވެ.
