ރައީސް އަބްދުﷲ ޔާމީންގެ ވެރިކަމުގައި ރާއްޖެ އޮތޯ ދުނިޔެއިން އެކަހެރި ކޮށްފައި ކަމުގައި އެންވަޔަރަންމަންޓް މިނިސްޓަރު ތޯރިގު އިބްރާހިމް ވިދާޅުވެއްޖެއެވެ. ތޯރިގް މިހެން ވިދާޅުވީ ރައީސް ޑރ. މުޙައްމަދު މުޢިއްޒު އދ. ގެ އާންމު މަޖިލީހުގައި ބައިވެރިވެވަޑައިގަތުމަށް އެމެރިކާއަށް ކުރައްވަމުންދާ ދަތުރުފުޅާ ގުޅޭގޮތުން ކުރީގެ ރައީސް ޔާމީން ދެއްކެވި ވާހަކަފުޅަށް ރައްދު ދެއްވަމުންނެވެ.

މިނިސްޓަރު ތޯރިގު ފާހަގަކުރެއްވި ގޮތުގައި ޔާމީންގެ ދައުރުގައި އދ. ގެ އެއްވެސް ބައްދަލުވުމެއްގައި ބައިވެރިވެވަޑައިގެންފައި ނުވާ ކަމަށާއި، މަލްޓިލެޓަރަލް ޑިޕްލޮމަސީއަށް ޝައުޤުވެރިކަމެއް ފާޅުކުރައްވާފައި ނުވާ ކަމަށެވެ. 2015 ގައި ދުނިޔޭގެ ލީޑަރުން ސަސްޓެއިނަބަލް ޑިވެލޮޕްމަންޓް ގޯލްސް އަދި ޕެރިސް އެއްބަސްވުމަށް އެއްވެވަޑައިގެންނެވިއިރުވެސް ރައީސް ޔާމީން އެތަނަށް ހާޒިރުވެވަޑައިނުގަންނަވާ ކަމަށް ތޯރިގު ވިދާޅުވިއެވެ.

ތޯރިގު އިތުރަށް ވިދާޅުވީ ލީޑަރުންނަކީ އެ ޤައުމެއްގެ ރައްޔިތުންނަށް އެންމެ މަންފާހުރި ގޮތަށް މަޤާމުތަކާއި އިސްކަންދޭ ކަންތައްތައް ތަމްސީލުކުރާ ބައެއް ކަމަށެވެ. ނަމަވެސް ރައީސް ޔާމީން ވަނީ ދުނިޔޭގެ ސްޓޭޖުން ރާއްޖެ އެކަހެރި ކޮށްލާފައި ކަމަށް ތޯރިގު ފާހަގަކުރެއްވިއެވެ.

އަދި މިނިސްޓަރު ވިދާޅުވީ ރައީސް މުޢިއްޒު ވަނީ އދ. ގެ ސަލާމަތީ މަޖިލީހުގައި ތަޤުރީރުކުރެއްވި އެންމެ ފުރަތަމަ ދިވެހި ރައީސްގެ ގޮތުގައި ފާހަގަކޮށްލެވޭ ތާރީޚެއް ލިޔުއްވާފައި ކަމަށެވެ. އަދި ރާއްޖެއަކީ ދުނިޔެއަށް ހުޅުވިފައިވާ ޤައުމެއްކަން ރައީސް މުޢިއްޒު ދައްކުވައިދެއްވާފައިވާ ކަމަށް ވިދާޅުވިއެވެ.

ތޯރިގު އިތުރަށް ފާހަގަކުރެއްވީ ޤައުމީ މަޞްލަޙަތަށް ބިނާކޮށް ކަންކަމުގައި ޖުމްލަ ޙައްލެއް ހޯދުމަށް ރައީސް މުޢިއްޒު މަސައްކަތްކުރައްވާނެކަން ދައްކުވައިދެއްވާފައިވާ ކަމަށެވެ. އަދި ރާއްޖެއަކީ ކުޑަ ޤައުމަކަށް ވިޔަސް، އެންމެހާ ރައްޔިތުންނަށް ރަނގަޅު މުސްތަޤުބަލެއް ހޯދައިދިނުމަށް ތައްޔާރަށް ތިބި ބައެއްކަން ވެސް ފާހަގަކުރެއްވިއެވެ.