ޖަޕާނުން މާލެ ވަށައިގެންލާފައިވާ އެއްގަމު ތޮށި ވަރަށް ބޮޑަށް ހަލާކުވުމާ ގުޅިގެން އެ ތަން މަރާމާތު ކުރުމަށް އެ ގައުމުން 140،000 ޑޮލަރު (2.1 މިލިއަން ރުފިޔާ) ރާއްޖެއަށް ހަދިޔާކޮށްފިއެވެ.
ފޮރިން މިނިސްޓްރީގައި މިއަދު ހެނދުނު ބޭއްވި ރަސްމިއްޔާތެއްގައި "ޑިޒާސްޓާ ރެޒިލިއަންސް އެންހޭންސްމަންޓް އިން މާލެ އައިލެންޑް" ނަމަކަށް މި މަޝްރޫއުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރު މޫސާ ޒަމީރެވެ. ޖަޕާނު ސަރުކާރުގެ ފަރާތުން ސޮއި ކުރެއްވީ ޖަޕާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު ތަކެއުޗި މިދޮރިއެވެ.
އެ ރަސްމިއްޔާތުގައި މިނިސްޓަރު ވިދާޅުވީ މި މަޝްރޫއުއަކީ ކަނޑުގެ ލޮނުގަނޑު އުފުލުމާއި މޫސުމާ ގުޅުންހުރި ކާރިސާތަކުގެ ނުރައްކަލުން ރާއްޖެ ސަލާމަތް ކުރުމަށް މުހިއްމު މަޝްރޫއުއެއް ކަމަށެވެ. އަދި އެއީ އަންނަން އޮތް ޖީލުތަކަށް ދެމެހެއްޓެނިވި ރައްކާތެރިކަން ފޯރުކޮށްދެވޭނެ މަޝްރޫއެއް ކަމަށް އޭނާ ވިދާޅުވިއެވެ.
މާލޭގެ ބޭރު ތޮއްޓަކީ މީގެ 37 އަހަރު ކުރިން މާލެއަށް ބޮޑު ރާޅު އަރައި، ބޮޑެތި ގެއްލުންތަކެއްވެފައި ވަނިކޮށް 1990 ވަނަ އަހަރު ޖަޕާނުގެ ސަރުކާރުގެ އެހީގައި ލާފައިވާ ތޮއްޓެކެވެ. ރާއްޖެއަށް 2004 ވަނަ އަހަރު ކުރިމަތިވި ސުނާމީ ކާރިސާއިން މާލެ އާއި މާލޭގައި އުޅޭ މީހުންގެ ސަލާމަތާއި ރައްކާތެރި ކަން ލިބުމުގައި މި ތޮށި ވަނީ މުހިންމު ރޯލެއް އަދާކޮށްފައެވެ. އެހެންވެ، މިނިސްޓަރު ވަނީ ޖަޕާނުގެ ސަރުކާރުން ރާއްޖޭގެ ތަރައްގީއަށް ދޭ އެހީތަކަށް ޝުކުރު އަދާ ކުރައްވައިފައެވެ.
