ތިލަފުށީގެ ކުނި އަޅާ ސަރަޙައްދު ފުރިފައިވާތީ، އެހެން ތަނަކަށް ކުނި ގެންދެވޭނެ އިންތިޒާމެއް ހަމަޖެއްސުމަށް މަސައްކަތް ކުރަމުންދާ ކަމަށް ވޭސްޓް މެނޭޖްމަންޓް ކޯޕަރޭޝަން (ވެމްކޯ)ގެ މެނޭޖިން ޑިރެކްޓަރ މުޖުތަބާ ޖަލީލް ވިދާޅުވެއްޖެއެވެ.
މާލެ ކައިރީގައި އޮންނަ ތިލަފުށްޓަކީ މުޅި ރާއްޖޭގައި އުފައްދާ ކުނި ނައްތާލުމަށް ގެންދާ މައި ރަށެވެ.
ޕީއެސްއެމް ނިއުސްގެ "ރާއްޖެމިއަދު" ޕްރޮގްރާމްގައި ވާހަކަދައްކަވަމުން، މުޖުތަބާ ވިދާޅުވީ ސަރުކާރު ހަވާލުވިއިރު ވެމްކޯގައި ދަރަނީގެ ގޮތުގައި 160 މިލިޔަން ރުފިޔާ އޮތް ކަމަށާއި، މިހާރުގެ އެންމެ ބޮޑު އަމާޒަކީ ދަރަނިން ސަލާމަތްވެ ކުންފުނިން ފޯރުކޮށްދޭ ޚިދުމަތްތައް މެދުކެނޑުމެއް ނެތި ކުރިއަށް ގެންދިޔުން ކަމަށެވެ. އަދި މިހާރުވެސް ދަރަނި އަދާކުރަމުން ގެންދާ ކަމަށް އޭނާ ވިދާޅުވިއެވެ.
ކުނީގެ މައްސަލައަކީ ރާއްޖެއަށް ދިމާވެފައި އޮތް ބޮޑު މައްސަލައެއް ކަމަށާއި، މުޅި ރާއްޖޭގައި އުފައްދާ ކުނީގެ 90 އިންސައްތަ ތިލަފުއްޓަށް ގެންދަން ޖެހޭ ކަމަށް މުޖުތަބާ ފާހަގަކުރެއްވިއެވެ. ނަމަވެސް މިހާރު ތިލަފުށީގައި ކުނި އަޅާ ސަރަޙައްދު ފުރިފައިވާ ކަމަށާއި، އެކަން ޙައްލުކުރުމަށް އެކި ޕްލޭންތައް ތައްޔާރުކޮށްފައިވާ ކަމަށް އޭނާ ވިދާޅުވިއެވެ. މި މައްސަލައަށް ހައްލެއް ގެނައުމަށް ސަރުކާރާއެކު މަޝްވަރާކޮށްފައިވާ ކަމަށާއި، ކުރިއަށް އޮތް 6 މަސްދުވަހުގެ ތެރޭގައި ހައްލުތަކެއް ގެނެވޭނެ ކަމަށް އުންމީދުކުރައްވާ ކަމަށްވެސް މުޖުތަބާ ވިދާޅުވިއެވެ.
މުޖުތަބާ އިތުރަށް ވިދާޅުވީ ތިލަފުށީގައި އެންމެ މައްޗަށް ކުނިފުނި ނެގޭނެ ކަމަށް އަންދާޒާކޮށްފައިވަނީ 50 މީޓަރަށް ކަމަށާއި، މިހާރުވެސް 47 މީޓަރަށް ކުނި ޖަމާވެފައިވާ ކަމަށެވެ. އޭނާ ވިދާޅުވީ އެތަނަކީ ވަރަށް ނުރައްކާތެރި ހާލަތެއްގައި އޮތް ތަނެއް ކަމަށާއި، ކޮންމެ ދުވަހަކުވެސް މެނޭޖްކޮށްގެން ކުރިއަށް ގެންދަނީ ކަމަށެވެ.
މާލެ ސަރަޙައްދަކީ ރާއްޖޭގައި އެންމެ ގިނައިން ކުނި އުފައްދާ ސަރަޙައްދު ކަމަށާއި، މާލެ ކައިރިން ތަނެއް ހަމަޖެއްސުމަކީ މުހިންމު ކަމެއް ކަމަށް މުޖުތަބާ ފާހަގަކުރެއްވިއެވެ. އަދި ވެމްކޯއިން ދެމުންދާ ކުނީގެ ޚިދުމަތް ރަނގަޅުކުރުމަށްޓަކައި ގިނަ މަސައްކަތްތަކެއް ކުރަމުން އަންނަ ކަމަށާއި، ޚާއްސަގޮތެއްގައި ކުންފުނީގެ ވެހިކަލް ފްލީޓްގައި ހިމެނޭ ވެހިކަލްތަކުގެ 99 އިންސައްތަ ފުރަތަމަ ފަހަރަށް ބޭނުންކުރަމުން އަންނަ ކަމަށް އޭނާ ވިދާޅުވިއެވެ.
ތިލަފުއްޓަށް ކޮންމެ ދުވަހަކު 1000 އަށްވުރެ ގިނަ ޓަނުގެ ކުނި ޖަމާކުރެވެއެވެ. ތިލަފުށީގައި ޤާއިމުކުރާ ކުނި އަންދައިގެން ހަކަތަ އުފެއްދުމަށް ދުވާލަކު 500 ޓަނުގެ ކުނި އެންދޭވަރުގެ ނިޒާމެއް ޤާއިމްކުރުމުގެ މަސައްކަތް ދަނީ ކުރަމުންނެވެ. ނަމަވެސް ކުނި އުފައްދާ މިންވަރު އިތުރުވުމާއެކު، މޫސުމީ ބަދަލުތަކާއި ތިމާވެށްޓާއި، ހަކަތައާ ބެހޭ ވަޒީރު ޠާރިޤް އިބްރާހީމް ވިދާޅުވެފައިވަނީ ތިލަފުށީގައި ދުވާލަކު 1000 ޓަނުގެ ކުނި އަންދައިގެން ހަކަތަ އުފައްދާ ނިޒާމެއް ޤާއިމުކުރައްވާނެ ކަމަށެވެ.
އަދި ކުނި ނައްތާލުމަށް ބޭނުންވާ އިތުރު ބިމެއް ހަމަޖެއްސެވުމަށް މަސައްކަތް ކުރާނެ ކަމަށްވެސް ވަޒީރު ވަނީ ވިދާޅުވެފައެވެ.
