މާލޭގައި ހުންނަ ބޭރު ގައުމުތަކުގެ އެމްބަސީތައް ކައިރިއަށް ގޮސް އަޑު ނުއުފުލުމަށް ޝަރުތުކޮށް، އިޒްރޭލުން ފަލަސްތީނާ ދެކޮޅަށް ހިންގަމުންދާ ގަތުލު އާންމާ ދެކޮޅަށް މެދުކެނޑުމެއްނެތި އިހުތިޖާޖުކޮށް އަޑު އުފުލަމުން ދަނިކޮށް ހައްޔަރުކުރި ދެ މީހުން ދޫކޮށްލައިފިއެވެ.
ހައްޔަރުކުރެވުނު ދެ މީހުންނަކީ ޑރ. މުހައްމަދު އިޔާޒުގެ އަނބިކަނބަލުން އާއިޝަތު ޝާދިޔާ (47އ) އާއި ޑރ. ޝަޒްރާ އިބްރާހީމް (36އ) އެވެ.
މި ދެމީހުން ދޫކޮށްލީ ބަންދުކުރިތާ ނުވަ ދުވަސް ފަހުންނެވެ. ޝާދިޔާ އާއި ޑރ. ޝަޒްރާގެ ބަންދާ މެދު ގޮތެއް ނިންމުމަށް ކޯޓަށް ފުލުހުން ހުށައެޅި ފޯމުގައި އޮތީ 15 ދުވަހުގެ ބަންދެއް ޖަހާދިނުމަށެވެ. އެހެންނަމަވެސް ކޯޓުގައި ފުލުހުން އެދުނީ ޝަރުތުތަކާއެކު ދޫކޮށްލުމަށެވެ. އެހެންކަމުން އެމްބަސީތައް ކައިރިޔަށް އެއްވެ އަޑު ނުއުފުލަން ޝަރުތުކޮށް ކޯޓުން ވަނީ ޝާދިޔާ އާއި ޑރ. ޝަޒްރާ މިނިވަންކޮށްފައެވެ.
ފުލުހުން ބުނެފައިވާ ގޮތުގައި މި ދެމީހުން ހައްޔަރުކުރީ ސުލްހަވެރިކަމާއެކު އެއްވެއުޅުމުގެ މިނިވަންކަމުގެ ގާނޫނާ ހިލާފަށް، ޑިޕްލޮމެޓިކް މިޝަންތަކުގެ ކައިރިއަށް ތަކުރާރުކޮށް އެއްވެ، އަޑުގަދަކުރާ ބޭނުންކޮށްގެން ހަޅޭއްލެވުމާއި، ބޭއަދަބީ ބަހުރުވައިން މުއާމަލާތްކުރުމުގެ ސަބަބުންނެވެ.
މިދިޔަ މަހުގެ 28 ވަނަދުވަހު ޝާދިޔާ އާއި ޑރ. ޝަޒްރާ ހައްޔަރުކުރުމަށްފަހު ދެ ފަހަރެއްގެ މަތިން ކޯޓުން ބަންދުގެ މުއްދަތު ޖަހާދީފައިވެއެވެ. ފުރަތަމަ މުއްދަތު ޖެހީ ތިން ދުވަހަށެވެ. ދެވަނަ ފަހަރަށް މުއްދަތު ޖެހީ ފަސް ދުވަހަށެވެ.
