ޕީއެސްޖީގެ ކޯޗުކަމުން ތޯމަސް ޓުޗެލް ވަކިކޮށް، ބަދަލުގައި މައުރީސިއޯ ޕޮޗެޓީނޯ ގެންނަން ނިންމާފައިވާކަމަށް ރިޕޯޓްތައް ބުނަންފަށައިފިއެވެ.
ރިޕޯޓުތައް ބުނާގޮތުން ޕީއެސްޖީ އިން މިހާރު އަންނަނީ ޕޮޗެޓީނޯއާ ކޯޗުކަމުގެ ޒިންމާ ހަވާލުކުރުމުގެ މަސައްކަތް ކުރަމުންނެވެ. އާޖެންޓީނާ އަށް އުފަން ޕޮޗެޓީނޯ ވަނީ 2001 އިން 2003 ވަނަ އަހަރާ ދެމެދު ޕީއެސްޖީ އަށް ކުޅެ އެޓީމުގެ ކެޕްޓަނުކަން ވެސް ކޮށްފައެވެ. ކުރިން އިނގިރޭސި ކްލަބް ސައުތެމްޓަނަށް ކޯޗުކޮށްދިން ޕޮޗެޓީނޯ އެންމެ ބޮޑަށް ފާހަގަވާން ފެށީ 2014 ވަނަ އަހަރު ޓޮޓެންހަމް ހޮޓްސްޕާސް އަށް ބަދަލުވެ އެ ކްލަބަށް ގެނެސްދިން ކުރިއެރުމުންނެވެ.
މިދިޔަ އަހަރުގެ ނޮވެމްބަރު މަހު އެ ކްލަބުގެ ކޯޗުކަން ދޫކޮށްލިއިރު ޕޮޗެޓީނޯ ވަނީ އިނގިރޭސި ލީގުގެ ގަދަބާރެއްގެ ގޮތުގައި ޓޮޓެންހަމް ބަދަލުކޮށްފައެވެ. ޒުވާން ކުޅުންތެރިންގެ ހިއްސާ ބޮޑުކޮށް މުޅިން އާޓީމެއް ޓޮޓްންހަމް ޕޮޗެޓީނޯ ވަނީ ބިނާކޮށްފައެވެ. ޕޮޗެޓީނޯގެ ކޯޗުކަމުގައި އިނގިރޭސި ލީގު ކަޕްގެ ފައިނަލާއި ޗެމްޕިއަންސް ލީގުގެ ފައިނަލުގައި ކުޅެ ޓޮޓެންހަމް ވަނީ ބަލިވެފައެވެ.
ޓޮޓެންހަމް ދޫކޮށްލުމަށް ފަހު މިދިޔަ އެއް އަހަރުތެރޭ ޕޮޗެޓީނޯ ހުރީ ކްލަބެއް ނެތިއެވެ.
ކޮމެންޓު ފޮނުވާ