ބްރިޖުގެ ލޭނުތަކާ ގުޅިގެން ހިނގި ހާދިސާ: ރައީސް މުއިއްޒު ހާމަކުރައްވާ
ސިނަމާލެ ބްރިޖުގެ ލޭނުތަކާ ގުޅިގެން ކުރީގެ ރައީސް ޔާމީނާއެކު ހިނގި ހާދިސާއެއްގެ ތަފްސީލު ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހާމަކުރައްވައިފިއެވެ. މިކަން ހާމަކުރެއްވީ "ސަންގު ޓީވީ" އަށް ރައީސް މުއިއްޒު ދެއްވި އިންޓަވިއުއެއްގައެވެ.
ރައީސް މުއިއްޒު ވިދާޅުވި ގޮތުގައި، ޔާމީންގެ ވެރިކަމުގައި އެމަނިކުފާނު ހުންނެވީ ހައުސިންގ މިނިސްޓަރުގެ މަޤާމުގައި ހުންނެވިއިރު ބްރިޖުގެ މަޝްރޫޢު އެ މިނިސްޓްރީއާ ހަވާލުކުރެވުނީ 2014 ވަނަ އަހަރުގެ ފަހުކޮޅު ކަމުގައެވެ. ރައީސް މުއިއްޒު ވިދާޅުވި ގޮތުގައި ބްރިޖުގެ މަސައްކަތަކީ އެމަނިކުފާނު ވަރަށް ޚާއްޞަ ސަމާލުކަމެއް ދެއްވައިގެން ކުރެއްވި މަސައްކަތެކެވެ.
"ލޭނުގެ އަދަދު އެއްވެސް އިރެއްގައި ބަދަލުވެފައެއް ނެތް. އަޅުގަނޑާ [ހައުސިންގ މިނިސްޓްރީ] ހަވާލުވިއިރު ހަމަ އޮތީ ކޮޅަކަށް ދެ ލޭނެއް،" ރައީސް މުއިއްޒު ވިދާޅުވިއެވެ.
ރައީސް މުއިއްޒު ވިދާޅުވި ގޮތުގައި، ބްރިޖު މަޝްރޫޢު ނިމެން މަހެއްހާ ދުވަސް ވެފައި ވަނިކޮށް، ރައީސް ޔާމީން ވިދާޅުވީ ބްރިޖުގައި ސައިކަލު ދުއްވުމަށް ވަކި ލޭނެއް އޮންނަން ޖެހޭނެކަމަށް ކަމަށެވެ. ނަމަވެސް މަސައްކަތް ނިމުމާ ކައިރިވެފައި އޮތުމުން، އެއީ ފަސޭހަ ކަމަކަށް ނުވި ކަމަށް ރައީސް މުއިއްޒު ވިދާޅުވިއެވެ. ރައީސް ޔާމީންގެ އެދިވަޑައިގަތުމުގެ މަތިން، ބައިސްކަލް ދުއްވުމަށް ޚާއްޞަކޮށްފައިވާ ލޭނު ސައިކަލަށް ބަދަލުކުރުމަށް މަސައްކަތްތަކެއް ކުރެވުނު ކަމަށް ރައީސް މުއިއްޒު ވިދާޅުވިއެވެ.
ރައީސް މުއިއްޒު ވިދާޅުވި ގޮތުގައި، ފަހުން ރައީސް ޔާމީން ވިދާޅުވީ ސައިކަލަށް ވަކި ލޭނެއް ނެތުމުގެ ސަބަބުން ބްރިޖު ނުހުޅުވޭނެ ކަމަށް ކަމަށެވެ. "އަޅުގަނޑު ދެންނެވީ އަޅުގަނޑާ މަސައްކަތް ހަވާލުވިއިރު ވަކި ލޭނެއް ނެތޭ. އެއްވެސް ބަދަލެއް ނާދޭ މިނިސްޓްރީއަށް މަސައްކަތް ހަވާލުވި ހިސާބުން،" ރައީސް މުއިއްޒު ވިދާޅުވިއެވެ.
"ތެދެއް އެއީ އަޅުގަނޑަށް ހަމަ ވަރަށް އަސަރުކުރި ރައީސް [ޔާމީން] އެހެން ވިދާޅުވީމަ،" ރައީސް މުއިއްޒު ވިދާޅުވިއެވެ.
ރައީސް މުއިއްޒު އިތުރަށް ވިދާޅުވި ގޮތުގައި، އެ ބައްދަލުވުމަށްފަހު އަނެއްކާވެސް ރައީސް ޔާމީނަށް ގުޅުއްވައި، އެ ނިންމެވުން ބަދަލުކުރެއްވުމަށް އެދިވަޑައިގަތެވެ. ފަހުން ބްރިޖު ހުޅުވުމަށް ރައީސް ޔާމީން އެއްބަސްވެވަޑައިގަތީ އެ ފޯނު ކޯލަށްފަހު ކަމަށް ރައީސް މުއިއްޒު ފާހަގަކުރެއްވިއެވެ.
މި ހާދިސާއާ ގުޅިގެން ރައްޔިތުންގެ މަޖިލީހުގެ ރައީސް އަބްދުއްރަހީމް ވެސް ވަނީ "ސަންގު ޓީވީ" އަށް ދެއްވި އިންޓަވިއުއެއްގައި ވާހަކަފުޅު ދައްކަވާފައެވެ. އަބުދުއްރަހީމް ވިދާޅުވި ގޮތުގައި، ރައީސް ޔާމީން ރައީސް މުއިއްޒުއަށް ބަވާލެއްވި މަންޒަރު އޭރުގެ ކެބިނެޓް މެންބަރުންނާއި އަބްދުއްރަހީމް ވެސް ދެކެވަޑައިގަތެވެ.
