ރާއްޖޭގެ ކަނޑުގެ ސަރަހައްދުގައި ލޭނު މަސްވެރިކަން ކުރުމުގެ ފުރުސަތު އަލުން ހުޅުވާލުމަށް ސަރުކާރުން ނިންމުމާ ގުޅިގެން، ކުރީގެ ރައީސް މުހައްމަދު ނަޝީދު އެކަމާމެދު ކަންބޮޑުވުން ފާޅުކުރައްވައިފިއެވެ.
މިދިޔަ މާރޗް މަހު ކެބިނެޓުން ނިންމާފައިވަނީ ބޮޑުކަންނެއްޔާއި ލޯބޮޑު ކަންނެއްޔަށް އަމާޒުކޮށްގެން ލޭނު މަސްވެރިކަން ކުރުމުގެ ހުއްދަ ދޭށެވެ. މިކަމާ ގުޅިގެން އެކްސްގައި ކުރެއްވި ޕޯސްޓުގައި ނަޝީދު ވިދާޅުވެފައިވަނީ ލޭނު މަސްވެރިކަމުގެ ސަބަބުން މަޑި، ކޯމަސް، މިޔަރު އަދި ކަނޑުމަތީ ދޫނިފަދަ ތަކެތި ގިނައިން ހިފޭނެ ކަމަށާއި، މިކަމުގެ ސަބަބުން ރާއްޖޭގެ ފަތުރުވެރިކަމާއި ދޮށީގެ މަސްވެރިކަމުން އުފައްދާފައިވާ ޓޫނާ ބްރޭންޑަށް ނޭދެވޭ އަސަރުކުރާނެ ކަމަށެވެ.
މިހާރު ފިޝަރީޒް މިނިސްޓްރީން ވަނީ ލޭނު މަސްވެރިކަމާ ގުޅޭ ގަވާއިދެއްގެ ޑްރާފްޓް އެކުލަވާލައި، އާންމުންގެ ޚިޔާލަށް ހުޅުވާލައިފައެވެ. މި ގަވާއިދުގެ ދަށުން، ލޭނުގެ މަސްވެރިކަމުގައި ހިފޭ މިޔަރާއި އެހެނިހެން ބާވަތްތައް ބައިނަލްއަޤްވާމީ މިންގަނޑުތަކާ އެއްގޮތަށް އެއްގަމަށް ގެނެސް ޕްރޮސެސްކުރުމުގެ ހުއްދަ ދެވޭނެއެވެ.
ފިޝަރީޒް މިނިސްޓްރީން ބުނެފައިވާ ގޮތުގައި މިފަހަރު ލޭނު މަސްވެރިކަމަށް ހުއްދަ ދޫކުރާނީ ކުރީގެ ތަޖުރިބާތަކަށް ބަލައި، ޤާނޫނާއި ގަވާއިދުތަކާ އެއްގޮތަށް އަދި ދިވެހިންނަށް ފައިދާހުރި ގޮތަކަށް ކަމުގެ ޔަޤީންކަން އޮންނަ ގޮތަށް، ޚާއްޞަ މާއްދާތަކެއް ހިމަނައިގެންނެވެ.
ކުރީގެ ސަރުކާރުން ވަނީ ލޭނު މަސްވެރިކަންކުރާ އުޅަނދުތަކުގެ ލައިސަންސް އާކުރުން ހުއްޓާލައިފައެވެ. އޭރު މިނިސްޓްރީން ބުނެފައިވަނީ މިގޮތަށް ޢަމަލުކުރަން ޖެހުނީ ގަވާއިދާ ޚިލާފު ޢަމަލުތައް އިތުރުވެ، ޔޫރަޕިއަން ޔޫނިއަނުން އިންޒާރު ދިނުމާ ގުޅިގެން ކަމަށެވެ.
