ޔުއެފާ ނޭޝަންސް ލީގުގައި މިރޭ ސްވިޒަލޭންޑާ ދެކޮޅަށް ނުކުންނައިރު ސްޕެއިންގެ މިހާރުގެ ޒުވާން ސްކޮޑާއެކު ކުރިޔަށް ދެވޭނެކަމުގެ އުންމީދު ބޮޑުކަމަށް ކޯޗު ލުއިސް އެންރީކޭ ބުނެފިއެވެ.
ޓީމުން މިހާތަނަށް ހޯދައިފަވާ ކުރިއެރުންތަކަކީ މިވަގުތައް ލިބޭ އެންމެ ބޮޑު ހިތްހަމަޖެހުން ކަމަށް އެންރީކޭ ބުންޏެއެވެ. ސްވިޒަލޭންޑް މެޗުގެ ކުރިން ވާހަކަދައްކަމުން އެންރީކޭ ބުނީ މެޗަށް ކުރެވޭނެ މާބޮޑު ހާއްސަ ކަމެއް ނެތްކަމަށާއި ޓީމަށް ގެނެވޭނެ މާ ހާއްސަ ބަދަލެއްވެސް ނެތްކަމަށެވެ. މިހާތަނަށް ޓީމުން ހޯދި ކުރިއެރުމާ މެދު ވަރަށް ބޮޑަށް ހިތް ހަމަޖެހޭކަމަށް އެންރީކޭ ބުނިއެވެ.
" މައްސަލަތަކުން އަރައިގަންނަށް އަހަރަމެންގެ އެންމެ މޮޅުކުޅުން ދައްކަންޖެހޭ، އަހަރަމެން ޕްރެޝަރައް ދުއްވާލާވަރުގެ މޮޅެތި ކުޅުންތެރިން އެޓީމުގައި ހިމެނޭ "
– އެންރީކޭ
މިމެޗުގެ ކުރިން ސްޕެއިނުން ވަނީ ޔޫރަޕުގެ ޗެމްޕިއަން ޕޯޗުގަލްއާ ދެކޮޅަށް ބުދަ ދުވަހުގެރޭ ކުޅެ އެއްވަރު ކޮށްފައެވެ. އެންރީކޭ ބުނީ އެއީ މުޅިން ތަފާތު މެޗެއް ކަމަށާއި ބޯޅަ ނެތީސްވެސް ޓީމުން އިދިކޮޅުޓީމު ހާސް ކޮށްލުމަކީ ލިބުނު ކުރިއެރުން ދައްކައިދޭ ހެއްކެއް ކަމަށެވެ. އެ މެޗު ނިމުނީ 1-1 ލަނޑުން އެއްވަރު ވެގެންނެވެ.
