އިންޑިއާ އަދި އޭޝިއާގައިވެސް ހުރި އެންމެ ބޮޑު މަހުޖަނު މުކޭޝް އަމްބާނީގެ ހަގު ދަރިކަލުން އާނަންތު އަމްބާނީ އާއި ރާދިކާ މާޗަންޓުގެ ކައިވެނީގެ ހަފްލާގައި ކުރީގެ ރައީސް މުހައްމަދު ނަޝީދު ބައިވެރިވެ ވަޑައިގެންފި އެވެ.
ނަޝީދު މި ހަފްލާއަށް ވަޑައިގެންނެވިކަން ހާމަވީ، އެހަފްލާގައި ބައިވެރިވެވަޑައިގެންނެ އިންޑީއާގެ ކުރީގެ ރައީސް ރާމް ނާތު ކޯވިންދުއާ އެކު އެ ހަފްލާގައި ނަގާފައިވާ ފޮޓޯއެއް ސޯޝަލް މީޑިއާގައި ދައުރުވާން ފެށުމުންނެވެ.
އަމްބާނީގެ ދައުވަތަށް، އޭނާގެ ދަރިފުޅުގެ އާނަންތު އަމްބާނީގެ ކައިވެނީގެ ހަފްލާގައި ދުނިޔޭގެ ނުފޫޒުގަދަ އެތައް ބޭފުޅުންނަކާއި މަޝްހޫރު ފިލްމީ ތަރިން ބައިވެރިވެވަޑައިގަތެވެ. އޭގެ ތެރޭގައި އިނގިރޭސިވިލާތުގެ ކުރީގެ ބޮޑުވަޒީރު ޓޯނީ ބްލެއަރ ހިމެނިވަޑައިގަންނަވައެވެ. އަދި ހޮލީވުޑްއާއި ބޮލީވުޑްގެ ގިނަ ފިލްމީ ތަރިންވެސް ހިމެނިވަޑައިގަންނަވައެވެ.
އާނަންތު އާއި ރާދިކާގެ ކައިވެނީގެ ހަފްލާ ރޭވަނީ މުމްބާއީގެ ޖިއޯ ވޯލްޑް ސެންޓަރުގައި ބާއްވާފައެވެ. އެހެންނަމަވެސް މި ހަފްލާގެ އުފާފާޅު ކުރުންތަކާއި އަދި ކައިވެންޏާއި ގުޅޭ އެހެން އިވެންޓްތައް ދުނިޔޭގެ އެކި ގައުމުތަކުގައި ކުރިޔަށް ގެންދާތާ ގިނަ ދުވަސްތަކެއް ވަނީ ވެފައެވެ.
އެގޮތުން ކައިވެނީގެ ޚަރަދުތަކަށް 180 މިލިއަން ޑޮލަރު ޚަރަދު ކޮށްފައި ވެއެވެ.
މިއަހަރުގެ ޖުލައިމަހާއި ހަމައަށް، މުކޭޝް އަމްބާނީގެ ބައިތުލްމާލުގައި 123.3 ބިލިއަން އެމެރިކާ ޑޮލަރު ހުރިކަމަށް މާލީ ހިސާބުތަކުން ދައްކައެވެ. އެގޮތުން އޭނާއަކީ މުޅި އޭޝިއާގައި ހުރި އެންމެ މުއްސަދި މަހުޖަނަށް ވާއިރު، އޭނާއަކީ މިވަގުތު ދުނިޔޭގައި ހުރި 11 ވަނައަށް އެންމެ މުއްސަދި މަހުޖަނެވެ.
