އެންމެ 20 މިލިއަން ރުފިޔާ ފޮއްޓަކަށް ލާފަ ފޮރުވާފަ ބަހައްޓަންޖެހޭ ވަަރަށްވުރެ އަމިއްލަ ތަނަވަސްކަން ބޮޑު ކަމުގައި ކުރީގެ ރައީސް ޔާމިން ވިދާޅުވެއްޖެއެވެ.
ޔާމިން މިހެން ވިދާޅުވީ ރޭ ޕީއެންއެފްގެ ފަރާތުން ބޭއްވި ޖަގަހަ ޖަލްސާގައި ބައެއް ފަރާތްތަކުން ކުރި ސުވާލުތަކަށް ޖަވާބު ދެއްވަމުންނެވެ.
ރޭގެ ޖަގަހަ ޖަލްސާގައި، އެ ޖަލްސާއަށް ހާޒިރުވި ފަރާތަކުން ޔާމިން އާއި ސުވާލު ކޮށްފައިވަނީ، 2018ގެ ރިޔާސީ އިންތިޚާބުން ޕީޕީއެމް ބަލިވިއިރުވެސް ވިޔަފާރިވެރިޔަކު އެއަހަރުގެ ރިޔާސީ އިންތިޚާބަށް ދިން 20 މިލިއަން ރުފިޔާ، އިންތިޚާބު ނިމިގެން ދިޔައިރުވެސް ލާފައި ހުރީ އިކޮނޮމިސްޓެއްގެ (ރައީސް ޔާމިންގެ) އެކައުންޓަކަށް ކަމުގައި މިހާރުގެ ޓޫރިޒަމް މިނިސްޓަރ އިބުރާހިމް ފައިސަލް ވިދާޅުވިކަމަށާއި، އެކަމާއި ގުޅޭގޮތުން ޔާމިން ދެކެވަޑައިގަންނަވަނީ ކޮން ގޮތަކަށް ތޯއެވެ.
އެ ސުވާލުގެ ޖަވާބުގައި ޔާމިން ވިދާޅުވީ މުއިއްޒުވެސް، އިބުރާހިމް މުހައްމަދު ސާލިހުވެސް ހޮވިވަޑައިގަތީ ފާއިސާ ވިޔަފާރިވެރިން ދީގެން ކަަމށާއި، އެމަނިކުފާނަށްވެސް 2018 ގެ ރިޔާސީ އިންތިޚާބަށް ފައިސާ ލިބުނު ކަމުގައެވެ.
އަޅުގަޑުގެވެސް 2018ގެ ރިޔާސީ އިންތިޚާބަށްވެސް ހަމަ ދިވެހި ވިޔަފާރިވެރިންގެ ތެރެއިން، ހެޔޮއެދޭ ފަރާތްތަކުން ލާރި ދިނޭ އިނގޭތޯ. ރިޔާސީ އިންތިޚާބުގަ 20 މިލިއަން ރުފިޔާއަކީ ކޯއްޗެއްތޯ؟ ރިޔާސީ އިންތިޚާބަކަށް 20 މިލިއަން ރުފިޔާއަކީ ކޯއްޗެއްތޯ؟ މިފަހަރުގެ ރައްޔިތުންގެ މަޖިލިސް އިންތިޚާބަށް، މެމްބަރުކަމަށް ކުރިމަތިލީ މީހުން، އެމީހުން ފައިސާ ހޯދައިގެން ޚަރަދުކުރިވަރުގެ އިތުރަށް، މުލިއާގެއިން ޚަރަދުކުރި 160 މިލިއަން. އަނެއްކާ މިހާރު މިއިވޭ، ދެންމެއަކު ނޫސްވެރިޔަކުވެސް އެ އެއްސެވީ، ކޮންމެ މެމްބަރަަކަށް 50 ހާސްރުފިޔާގެ މަންތުލީ އެލަވަންސެއް ދެއްވާވާހަކަ. އެހެންވީމަ 20 މިލިއަން ރުފިޔާ.. ތެދެއްމެ، އަޅުގަޑަށްވެސް ލާރި ލިބުނު އިނގޭތޯ. އެހެންވީމަ ތިފައިސާ، 20 މިލިއަން ރުފިޔާއަކީ އޭގެ ޒާތުގައި ފޮއްޓަކަށް ލާފަ ފޮރުވާފަ ބަހައްޓާނެ އެއްޗެއް ނޫން. އެެއަށްވުރެ އަޅުގަޑުގެ އަމިއްލަ ތަނަވަސްކަންވެސް، އެއަށްވުރެސް ބޮޑު ދެއްތޯ!
ރައީސް ޔާމިން ވިދާޅިވިއެވެ.
އަދި ރައީސްޔާމިން ވިދާޅުވީ ކޯޓުތަކުގައިވެސް އެމަނިކުފާނުގެ އެކައުންޓަކުގައި ހުރި ފައިސާގެ މައުލޫމާތުގެ ވާހަކަތައް ދެކެވިފައިވާ ކަމަށާއި، އެމަނިކުފާނުގެ އެކުންޓްތަކުގައި ހުރި ފައިސާގެ ތަފްސީލުތައް ފުލުހުންވެސް ހާމަކޮށްފައިވާ ކަމަށެވެ.
އެހެންކަމުން، 20 މިލިއަން ރުފިޔާއަކީ އެމަނިކުފާނު އަމިއްލަ ތަނަސްވަސްކަމާ އަޅާބަލާއިރު ގިނަ އަދަދެއްގެ ފައިސާ ނޫންކަމުގައިވެސް ޔާމިން ވިދާޅުވިއެވެ.
މިދޭތެރެއިން ކޯޓުތަކުގަ އުޅުނު، މީ އަޅުގަޑުގެ މައްސަލަތަކާއި ގުޅިގެންވެސް އަޅުގަޑުގެ ސްޓޭޓްމަންޓްތައްވެސް އެތާކިޔާ މުތާލިއާ ކުރީ ދެއްތޯ! އަދި ނުވިތާކަށް އަޅުގަނޑު ފުރަތަމަ ހައްޔަރު ކުރުމާއި ގުޅިގެން ފުލުހުންގެ އިދާރާއިންވެސް އަޅުގަޑުގެ އެކައުންޓުގައި ހުރި ފައިސާގެ އަދަދުވެސް ކީ ދެއްތޯ! އެހެންވީމަ ތީކީ އަޅުގަޑު ސިހުންވާ ކަމެއް ނޫން އިނގޭތޯ.
ޔާމިން ވިދާޅުވިއެވެ.
