އދ.ގެ ޓޫރިޒަމްގެ ކޮމިޝަން ފޯ އީސްޓް އޭޝިއާ އެންޑް ޕެސިފިކް އަދި ކޮމިޝަން ފޯ ސައުތު އޭޝިއާ (ސީއޭޕީ-ސީއެސްއޭ) ގެ 36 ވަނަ ޖޮއިންޓް ކޮމިޝަން މީޓިންގެ ކޯ ޗެއާގެ ގޮތުގައި ރާއްޖެ އިން ބައިވެރިވެއްޖެއެވެ.
މި ބައްދަލުވުން ކާމިޔާބުކަމާއެކު ކުރިޔަށްގެންދިއުމުގައި، ދެކުނު އޭޝިއާގެ ކޮމިޝަންގެ ޗެއާގެ ހައިސިއްޔަތުން ދިވެހިރާއްޖޭން ވަނީ މުހިންމު ދައުރެއް އަދާކޮށްފައެވެ. މި ބައްދަލުވުން އޮތީ މި ހިނގާ ޖޫން މަހުގެ 28 ވަނަ ދުވަހު ފިލިޕީންސްގެ ސެބޫގައެވެ.
މި ބައްދަލުވުމުގައި އދ.ގެ ފަތުރުވެރިކަމުގެ މެންބަރު ޤައުމުތަކާއި، އެފިލިއޭޓް މެންބަރުންނާއި، ބައިނަލްއަޤްވާމީ އަދި ސަރަޙައްދީ ޖަމްޢިއްޔާޖަމާޢަތްތަކުގެ މަންދޫބުން އެއްވެ، 2024-2025 ވަނަ އަހަރުގެ އދ.ގެ ޓޫރިޒަމް ޕްރޮގްރާމް އޮފް ވޯކް އާއި އޭޝިއާ ޕެސިފިކް ގެ މެންބަރު ޤައުމުތަކަށް އިސްކަންދޭ މުހިންމު މައުޟޫޢުތަކާ ބެހޭގޮތުން ވަނީ މަޝްވަރާކޮށްފައެވެ.
މީގެ އިތުރުން، މި ބައްދަލުވުމުގައި، ދެމެހެއްޓެނިވި ފަތުރުވެރިކަމުގެ ސިނާޢަތުގެ އެކި ކަންކަމާ ބެހޭގޮތުން ވަނީ މަޝްވަރާކޮށްފައެވެ. މިގޮތުން، ފަތުރުވެރިކަމުގެ ސިނާޢަތުގައި ތިމާވެއްޓާ ރައްޓެހި ސިޔާސަތުތައް ގެންގުޅުމަށާއި ގްރީން ޓްރާންސްފޯމޭޝަން ފަދަ އުކުޅުތައް މެދުވެރިކޮށް ޕްރޮޑަކްޓް ޑިވެލޮޕްމަންޓް އިތުރުކުރުން ފަދަ ކަންތައްތަކާމެދު ވަނީ މަޝްވަރާކޮށްފައެވެ. މި މަޝްވަރާތަކުގެ މަޤްޞަދަކީ 2030 ވަނަ އަހަރުގެ އެޖެންޑާއާއި ދެމެހެއްޓެނިވި ތަރައްޤީގެ ލަނޑުދަނޑިތަކާ އެއްގޮތްވާ ގޮތުގެ މަތިން ފަތުރުވެރިކަމުގެ ދާއިރާގައި އިނޮވޭޝަނާއި ރެޒިލިއަންސް ކުރިއެރުވުމެވެ. މީގެ އިތުރުން، ފަތުރުވެރިކަމުގެ ދާއިރާގެ ފަރާތްތައް ތަމްރީނުކުރުމާ ގުޅޭގޮތުންވެސް ވަނީ މަޝްވަރާކޮށްފައެވެ. އަދި މި ބައްދަލުވުމުގެ ބައިވެރިން ވަނީ މަސައްކަތްތެރިންގެ ހުނަރު ތަރައްގީކުރުމުގެ މަސައްކަތްތައް އިތުރަށް ހަރުދަނާކުރުމަށް ގެންގުޅޭ ސްޓްރެޓެޖީތަކާ ގުޅޭގޮތުން މަޝްވަރާކޮށް މި ސިޔާސަތުތައް ދިރާސާކޮށްފައެވެ.
މި ބައްދަލުވުން ކޯ-ޗެއަރ ކުރުމުގައި ދިވެހިރާއްޖޭގެ ފަރާތުން ބައިވެރިވެވަޑައިގެންނެވި, މިނިސްޓަރ އޮފް ސްޓޭޓް ފޮރ ޓޫރިޒަމް ޑރ. ޢަބްދުﷲ ނިޔާޒު ވިދާޅުވީ، 36 ވަނަ ސީއޭޕީ-ސީއެސްއޭ ޖޮއިންޓް މީޓިންއަކީ ދެމެހެއްޓެނިވި ގޮތެއްގައި ފަތުރުވެރިކަން ކުރިއެރުވުމަށް ވަރަށް އަގުހުރި ޕްލެޓްފޯމެއް ލިބިގެންދިޔަ ބައްދަލުވުމެއްކަމަށެވެ. އަދި ފަތުރުވެރިކަމުގެ ސިނާޢަތް ކުރިއެރުވުމަށްޓަކައި ބޭނުންވާ މިފަދަ މުހިންމު ކަންކަން ޙާޞިލުކުރުމަށްޓަކައި އ.ދ.ގެ ފަތުރުވެރިކަމުގެ އޮނިގަނޑުގެ ތެރޭގައި ހިމެނޭ ސަރަޙައްދީ ޕާޓްނަރުންނާއި ގުޅިގެން ދިވެހިރާއްޖޭން ކުރަމުންދާ މަސައްކަތްތައް މެދުކެނޑުމެއް ނެތި ކުރިއަށް ގެންދިއުމަށް މަސައްކަތްކުރަމުން ގެންދާނެކަމަށްވެސް އެމަނިކުފާނު ވިދާޅުވިއެވެ.
ފަތުރުވެރިކަމާ ބެހޭ ވުޒާރާ އިން މަސައްކަތްކުރަނީ މިފަދަ ބައްދަލުވުންތައް މެދުވެރިކޮށް ދެމެހެއްޓެނިވި ފަތުރުވެރިކަން އިތުރަށް ކުރިއެރުވުމަށާއި، ފަތުރުވެރިކަމުގެ ސިނާޢަތުގައި އޭޝިއާ އަދި ޕެސިފިކް ސަރަޙައްދުގެ އެކި ޤައުމުތަކާ ދިވެހިރާއްޖެއާ އޮންނަ ގުޅުން އިތުރަށް ހަރުދަނާކުރުމަށެވެ.
