ކުރީގެ ރައީސް މުޙައްމަދު ނަޝީދާއި، ކުރީގެ ރައީސް އިބްރާހިމް މުޙައްމަދު ޞާލިހާއި ދެމެދުގައިވާ ޒާތީ މައްސަލަތައް އެއްފަރާތްކޮށް، ދެބޭފުޅުން އެކުގައި މަސައްކަތްކުރުމަށް އެދި ރައީސް ޞާލިހް ގޮވާލައްވައިފިއެވެ.
ރާއްޖެޓީވީގެ ފަށާއިރު ޕްރޮގުރާމުގައި ވާހަކަފުޅު ދައްކަވަމުން ރައީސް ޞާލިހު ވިދާޅުވީ، 2023 ވަނަ އަހަރު އޮތް ރިޔާސީ އިންތިހާބުން އެމްޑީޕީ ބަލިވި ސަބަބަކީ އެޕާޓީ އުފައްދައި، އިސްކޮށް އުޅުނު ބަޔަކު ޕާޓީން ވަކިވެގެން ދިޔުން ކަމަށާއި، މިއަދަކީ އެކަމާއި ދޭތެރޭ އެބޭފުޅުންވެސް ވިސްނަންވީ ވަގުތު ކަމަށެވެ.
ރައީސް ޞާލިހު ވިދާޅުވީ، އެމްޑީޕީއަކީ އެންމެންގެ ވެސް ޕާޓީ ކަމަށާއި، އެމަނިކުފާނާއި މެދު އޮތް ޒާތީ މައްސަލައެއް ވިޔަސް، އެކަން އެއްފަޅީގައި ބޭއްވުމަށްފަހު އެކީގައި ކުރިއަށް ދިޔުމަށް އެދި ދައުވަތުދެއްވިއެވެ.
މިއީ ހަމަ އަޅުގަނޑުމެން އެންމެންގެ ޕާޓީ. އެންމެން އެކީގައި އުފައްދާފައި އޮތް ޕާޓީއެއް. އެކީގައި ވަޑައިންނަވަންވީ. އެ ޒާތީ، އޭރު އެހުރި މައްސަލަތައް އެކަހެރި ކުރެވޭނެ އިނގޭތޯ. އަދި އަޅުގަނޑާއި ދޭތެރޭ ހުރި މައްސަލައެއް ވިޔަސް އެކަން އެއްފަޅީގައި ބާއްވާފައި. އަދި އަޅުގަނޑުމެން މިކުރާ މަސައްކަތް ނިމުމަކަށް ނުދޭ. "
ރައީސް ޞާލިހު ވިދާޅުވިއެވެ.
ހަމައެއާއިއެކު ރައީސް ޞާލިހު ވިދާޅުވީ، މައްސަލަތައް ހައްލު ކުރަން ކޮންމެވެސް ތަނަކަށް އެއްވެ ކުރިއަށް ދެވޭނެ ގޮތެއް ދެބައި މީހުން ވެސް ހޯދަންޖެހޭ ކަމަށާއި، ދެ ފަޅީގައި ވެސް ތިބީ އެކުގައި އަދިވެސް މަސައްކަތް ކުރެވޭނެ ބޭފުޅުން ކަމަށެވެ.
އެހެން ޕާޓީތަކާއި ޚިލާފަށް ރައްޔިތުން އެމްޑީޕީއާއި މެދު އުއްމީދުތަކެއް ކުރާކަން ފާހަގަކުރައްވަމުން ރައީސް ޞާލިހު ވިދާޅުވީ، މި މައްސަލަތައް ހައްލު ނުކުރެވުމަކީ ރައްޔިތުންނަށް ލިބޭ ވަރަށް ބޮޑު ދެރައެއް ކަމަށެވެ.
"އެމްޑީޕީއާއި ދޭތެރޭގައި ރައްޔިތުން އުންމީދުތަކެއް އޮވޭ އެހެން ޕާޓީތަކާއި ޚިލާފަށް. އެހެންވެގެން އަޅުގަނޑުމެން އެމްޑީޕީ ވެރިކަމަށް އަންނަ ކޮންމެ ފަހަރަކު އެމްޑީޕީ އާއި ދޭތެރޭގައި، އެ ސަރުކާރާއި ދޭތެރޭގައި ރައްޔިތުންގެ އެ ބޭނުންވާ ބޭނުންތައް އިތުރުވަނީ. އެމީހުން އުންމީދުތަކެއް ކުރޭ ޕާޓީއާއި ދޭތެރޭގައި."
ރައީސް ޞާލިހު ވިދާޅުވިއެވެ.
ރަޢީސް ސާލިހުގެ ވާހަކަފުޅަށް އެކްސްގައި ރައްދު ދެއްވަމުން ނަޝީދު ވިދާޅުވެފައިވަނީ ރައީސް ސާލިހު ވިދާޅުވީ ރަގަޅު ވާހަކަފުޅެއް ކަމަށާއި ރައީސް ސާލިހި ވިދާޅުވި މިސްރާބަށް ދެވޭނެ ކަމުގެ އުއްމީދު އޮތް ކަމުގައެވެ.
ރިޔާސީ އިންތިހާބުގައި އެމްޑީޕީގެ ޕްރައިމަރީ އަށް ފަހު ޕާޓީގެ އެތެރޭގެ ކޯޅުންތަކަށް ފަހު ނަޝީދު ފުރަތަމަ އުފެއްދެވީ "ފިކުރެއްގެ ދިރުން" ނަމުގައި ޕާޓީގެ އެތެރޭގައި ގޮތްޕެކެވެ.
ޕާޓިގެ އެތެރޭގެ މަސްލަހަތު އިތުރަށް ގޯސްވެ، އެމްޑީޕީގެ އެންމެ އިސް ސަފުގައި ފެށުނީއްސުރެ މަސައްކަތްކުރައްވަމުން ގެންދެވި 13 ބޭފުޅަކު ޕާޓީއާއި ވަކިވެވަޑައިގެން "ދަ ޑިމޮކްރެޓްސް" ގެ ނަމުގައި އައު ޕާޓީއެއް އުފެއްދެވިއިރު، ރައީސް ނަޝީދު ވެސް އެމްޑީޕީން ވަކިވެވަޑައިގަތެވެ.
އޭގެ ފަހުން، ރިޔާސީ އިންތިހާބުގެ ތެރެއިން ވެސް ޑިމޮކްރެޓްސް އިން އެމްޑީޕީއަށް އަމާޒުކޮށް ހޫނު ބަހުގެ ހަމަލާތަކެއް ދެމުންދިޔަކަން ފާހަގަކޮށްލަން ޖެހެއެވެ.
