އިދިކޮޅު އެމްޑީޕީ އަދިވެސް އެނބުރެންވީ ބަރުލަމާނީ ވެރިކަމުގެ މިސްރާބަށް ކަމުގައި އެޕާޓީގެ ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މިހެން ވިދާޅުވީ މިއަދު ފާހަގަ ކުރެވެމުންދާ އެމްޑީޕީގެ 19 ވަނަ އަހަރީ ދުވަހުގެ މުނާސަބަތުގައި ކުރެއްވި އެކްސް ޕޯސްޓެއްގައެވެ.
އެކްސް ޕޯސްޓުގައި ނަޝީދު ވިދާޅުވީ އެމްޑީޕީގެ އެންމެ އަސާސީ އެއް އުސޫލަކީ ރައްޔިތުންނަށް ފައިދާހުރި ވެރިކަމެއް ހިންގޭނީ ބަރުލަމާނީ (މަޖިލީހުގެ ވެރިކަމުގެ) ނިޒާމަކުންކަމަށް ދެކޭ ދެކުން ކަމުގައެވެ.
އަދި އެ ޕާޓީގެ އޮނިގަޑު ރޭވިފައިވަނީ އެ ހަމައަށް ކަމަށް ވިދާޅުވަމުން ނަޝީދު ވިދާޅުވީ އެޕާޓީ އަދިވެސް އެނބުރެންވީ އެ މިސްރާބަށް ކަމުގައެވެ.
MDPge huriha membarunai supportarunah 19 vana aharee dhuvahuge thahniya.MDPge enme asaasee eh usoolakee rayyithunah faidhahuri verikameh hingeynee parliamentary(Majileehuge Verikan) nizamakunkamah dhekeydhekun. Partyge onigadu reyvifaivanee ehama ah. Adhives enburenvee e misrabah
— Mohamed Nasheed (@MohamedNasheed) June 25, 2024
ނަޝީދު ވަނީ ރައީސް ސާލިހުގެ ވެރިކަމުގައި އުފެދުނު ޚިޔާލުތަފާތުވުންތަކާއެކު، އެޕާޓީ ދޫކޮށް ދަ ޑިމޮކްރެޓްސްގެ ނަމުގައި އާ ޕާޓީއެއް އުފައްދަވާފައެވެ. އެހެންނަމަވެސް އެޕާޓީއަށް ރިޔާސީ އިންތިޚާބުގައި އެންމެ 15،000 ވަރަކަށް ވޯޓު ލިބުނުއިރު ފާއިތުވި މަޖިލިސް އިންތިޚާބުގައި ލިބުނީ އެންމެ %2 ވޯޓެވެ. އަދި އެ ޕާޓީއަށް މަޖިލިހުގެ އެންމެ ގޮނޑިއެއްވެސް ކާމިޔާބު ކުރެވިފައެއް ނުވެއެވެ.
