އިންޑިއާގެ ގާނޫނުހަދާ މަޖިލިހުގައި އިނދިކޮޅު ލީޑަރެއްގެ ގޮތުގައި، ކޮންގްރެސް ޕާޓީގެ ލީޑަރު އަދި މިހާރުވެސް ބޮޑުވަޒީރު ނަރެންދުރަ މޯދީގެ ސިޔާސީ ވާދަވެރިޔާ، ރާހޫލް ގާނދީ ހަމަޖައްސައިފިއެވެ.
މި ހަފްތާ ބަންދުގައި ތިންވަނަ ދައުރަކަށް މޯދީ ވެރިކަމުގެ ހުވާ ކުރައްވާނެއެވެ. އެހެންނަމަވެސް އެންމެ ފަހުން ބޭއްވުނު އާންމު އިންތިޚާބުގައި މޯދީގެ، ވެރިކަން ކުރާ ބާރަތިޔާ ޖަނަތާ ޕާޓީ (ބީޖޭޕީ) އަށް ގާނޫނުހަދާ މަޖިލިހުގެ އަޣުލަބިއްޔަތު ގެއްލި ވެރިކަން ކުރުމަށް ކޯލިޝަންގެ ބައިވެރިންނަށް ބަރޯސާވާން މޯދީއަށް ވަނީ މަޖުބޫރު ވެފައެވެ.
މަޖިލިހުގައި ރާހޫލް ގާނދީ އިދިކޮޅު ލީޑަރެއްގެ ގޮތުގައި ހަމަޖައްސާފައިވާއިރު، އޭނާ ވަނީ ގިނަ ބަޔަކު ހީކުރިގޮތާއި ޚިލާފަށް، އޭނާގެ ކޮންގްރެސް ޕާޓީއަށް މަޖިލީހުގެ ގިނަ އަދެއްގެ ގޮނޑިތައް ކާމިޔާބު ކޮށްދީ ގިނަ ބަޔަކަށް ހައިރާންކަން ގެނުވާފައެވެ.
އިންޑިއާގެ ރަސްމީ އިދިކޮޅު ލީޑަރުގެ މަގާމަށް ގާންދީ އިންތިހާބު ކުރަން ލަފާ ދިނުމަށް ކޮންގްރެސް ލީޑާޝިޕްގެ ހޮނިހިރު ދުވަހު ބޭއްވި ބައްދަލުވުމުގައި އިއްތިފާގުން ވަނީ ފާސްކޮށްފަ އެވެ. ޕާޓީގެ އެގްޒެކެޓިވްގެ ބައްދަލުވުމަށް ފަހު ބޭއްވި ނޫސްވެރިންގެ ބައްދަލުވުމެއްގައި ކޭސީ ވެނޫގޯޕާލް ވިދާޅުވީ، ރާހުލް ގާންދީ ޕާލަމެންޓުގެ އިދިކޮޅު ލީޑަރުގެ މަގާމަށް ވަޑައިގަންނަވަން ޖެހޭ ކަމަށް ހުރިހާ ބައިވެރިންގެ އިއްތިފާގުން ގަރާރު ފާސްކޮށްފައިވާ ކަމަށެވެ.
ކޮންގްރެސް ކޯލިޝަންގައި ހިމެނޭ އިދިކޮޅު އިއްތިހާދަކަށް ނިސްބަތްވާ 232 މެމްބަރުންގެ ބައްދަލުވުމެއް އަންނަ ހޮނިހިރު ދުވަހު ބޭއްވުމަށް ވަނީ ހަމަޖެހިފަ އެވެ. ގާންދީއަކީ ޒަމާނުއްސުރެ އިންޑިޔާގެ ސިޔާސީ މައިދާނުގައި ބާރު ގަދަ ދަރިކޮޅަށް ނިސްބަތްވާ ބޭފުޅެކެވެ. އަދި އޭނާ ނިސްބަތްވަނީ އިންޑިއާގެ މިނިވަންކަމުގެ ލީޑަރު ޖަވާހަރްލާލް ނެހްރޫއިން ފެށިގެން ކުރީގެ ބޮޑުވަޒީރުންގެ ދަރިކަލުންނާއި ދައްތަ އަދި ބޮޑުދައިތައިންގެ ދަރިކޮޅަށެވެ.
