ރާއްޖޭގައި ހިންގާ އެންމެ ބިޔަ މަޝްރޫއު ކަމަށްވާ ތިލަމާލެ ބްރިޖުގެ މަސައްކަތް ކަނޑައެޅިފައިވާ ތާވަލާ އެއްގޮތަށް ކުރިޔަށް ގެންގޮސް ނިންމާލެވޭނެ ކަމުގައި ދިވެހިރާއްޖެއަށް ކަނޑައަޅައިފައި ހުންނަވާ ސަފީރު މުނޫ މަހާވަރު ވިދާޅުވެއްޖެއެވެ.
މުނޫ މަހާވަރް މިހެން ވިދާޅުވީ އޭނާއާއި ކޮންސްޓަރކްޝަން މިނިސްޓަރު ޑރ. އަބްދުﷲ މުއްތަލިބް އާއި ދެބޭފުޅުން ތިލަމާލެ ބްރިޖު މަޝްރޫއުގެ ސައިޓަށް ޒިޔާރަތްކުރައްވައި އެ ޒިޔާރަތަށް ފަހު މަޝްރޫއުގެ އެންމެފަހުގެ އަޕްޑޭޓް މީޑިއާތަކާ ހިއްސާ ކުރައްވަމުންނެވެ.
މީޑިއާތަކަށް މައުލުމާތު ދެއްވަމުން މުނޫ މަހާވަރު ވިދާޅުވީ މި ޕްރޮޖެކްޓަކީ މާލޭ ސަރަހައްދަށް ވިޔަވާރީގެ ގޮތުންނާއި އަދި އެނޫން ގޮތްގޮތުންވެސް ބޮޑެތި ކުރިއެރުންތަކެއް ގެނެސްދީ އަދި އާންމު ރައްޔިތުންގެ ދިރިއުޅުމަށްވެސް ލުއިފަސޭހަކަން ގެނެސްދޭނެ ޕްރޮޖެކްޓެއް ކަމުގައެވެ. އަދި އޭނާ ވިދާޅުވީ މިއަދުގެ ޒިޔާރަތަކީ މަޝްރޫއުގެ މަސައްކަތްތައް ކުރިޔަށްދާ ގޮތް ވަޒަންކޮށްލުމަށް ކުރި ޒިޔާރަތެއްކަމަށާއި، ދެ ސަރުކާރު ގުޅިގެން ކުރާ މަސައްކަތްތަކުން މިހާރު އެކަށައެޅިފައިވާ ތާވަލާ އެއްގޮތަށް މަޝްރޫޢު ކުރިޔަށް ގެންގޮސް ނިންމާލެވޭނެކަމުގައިވެސް އޭނާ ވިދާޅުވިއެވެ.
ރާއްޖޭގައި ހިންގާ އެންމެ ބިޔަ މަޝްރޫއު ކަމަށްވާ ތިލަމާލެ ބްރިޖުގެ މަސައްކަތުގެ ތެރެއިން މާލެ އިން ގުޅިފަޅަށް ބްރިޖް އަޅައި ނިންމާލެވޭނީ މާޗް 31، 2026 ގައި ކަމަށް ކޮންސްޓްރަކްޝަން މިނިސްޓްރީން މިއަދުވަނީ ބުނެފައެވެ.
އެ މިނިސްޓްރީން ބުނީ، މުޅި މަޝްރޫއުގެ 38.88 ޕަސެންޓް މަސައްކަތް ނިމިފައިވާ އިރު، ކަނޑުގައި ޖެހުމަށް ހަމަޖެހިފައިވާ ތަނބުތަކުގެ ޕައިލިންގެ 66 ޕަސެންޓް މަސައްކަތް ވަނީ ނިމިފައި ކަމަށެވެ. އޭގެތެރެއިން ޕައިލް ކެޕްގެ 46 ޕަސެންޓް މަސައްކަތާއި ޕިއާ ކޮލަމްންސްގެ 48 ޕަސެންޓް މަސައްކަތް ވަނީ ނިމިފައެވެ.
