މިއީ އިސްރާޢީލޭ ކިޔުނު ޔަހޫދީ ދައުލަތުގެ ވެރިން، ފަލަސްޠީނުގައި އެމީހުން ހިންގާ ޖަރީމާތަކަށް ޖަވާބުދާރީވާންވީ ވަގުތުކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ، ހަތަރުވަނަ 'އިންޓަރނޭޝަނަލް ކޮންފަރެންސް އޮން ސްމޯލް އައިލެންޑް ޑިވެލޮޕިންގ ސްޓޭޓްސް' މަހާސިންތާ ހުޅުވުމުގެ ރަސްމިއްޔާތުގައި ވާހަކަފުޅުދައްކަމުންނެވެ.
ހަތަރުވަނަ އިންޓަރނޭޝަނަލް ކޮންފަރެންސް އޮން ސްމޯލް އައިލެންޑް ޑިވެލޮޕިންގ ސްޓޭޓްސް (ސިޑްސް4) ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، މިވަގުތު ވާހަކަދައްކަމުންދާއިރު، ނިރުބަވެރި އިސްރާއީލުން ފަލަސްތީނުގެ ރަފަހަށް ދެމުން އަންނަ ހަމަލާތައް ވަގުތުން ހުއްޓާލުމަށް އިންޓަނޭޝަނަލް ކޯޓު އޮފް ޖަސްޓިސްއިން ކުރި އަމުރަށް ގޮންޖަހާ ހަމަލާތައް ދެމުންދާ ކަމަށެވެ.
އަދި އިސްރާއީލުގެ ލީޑަރުން އިންސާފުގެ ކުރިމައްޗަށް ގެނެސް، އެ މީހުން ކުރި ކުށަށް ނޫނީ ހިންގާފައިވާ ޖަރީމާތަކަށް ޖަވާބުދާރީވާން ޖެހޭ ކަމަށްވެސް ރައީސް ވިދާޅުވިއެވެ.
އިސްރާއީލޭ ކިޔުނު ޔަހޫދީން، ފަލަސްތީނުގެ ރަފަހް އަށް ދެމުންދާ ހަމަލާތައް ވަގުތުން ހުއްޓާލަން އައިސީޖޭއިން ވަނީ އަމުރުކޮށްފައެވެ.
ދެކުނު އެފްރިކާއިން އައިސީޖޭ އަށް ހުށަހެޅި މި މައްސަލައިގައި އިސްރާއީލުން ދެމުންދާ ހަމަލާތައް ވަގުތުން ހުއްޓުވުމުގެ އިތުރުން ރަފަހްއަށް އެ ގައުމުގެ ސިފައިން އަރައިގަތުން ހުއްޓުވައިދީ އިންސާނީ އެހީ ޣައްޒާއަށް ވެއްދުމުގެ އަމުރަކަށް ވަނީ އެދިފައެވެ.
އެ ކޯޓުން މިއަދު އިސްރާއީލުގެ މައްޗަށް އެ އަމުރު ނެރެފައިވަނީ 13 ފަނޑިޔާރުންގެ އަގުލަބިއްޔަތުންނެވެ. އެކަމާ ދެކޮޅު ހަދާފައިވަނީ ދެ ފަނޑިޔާރުންނެވެ.
ހަތަރުވަނަ ސިޑްސް މަހާސިންތާ އަކީ " ޗާރޓިންގ ދަ ކޯސް ޓުވާޑްސް ރިސިލިއަންޓް ޕްރޮސްޕަރިޓީ" މި ޝިއާރުގެ ދަށުން ސިޑްސްގެ ޤައުމުތަކުގެ ލީޑަރުންނާއި އެކި ދާއިރާތަކުން ގުޅުންހުރި ހުރިހާ ހިއްސާދާރުން އެއްތަނަކަށް އެއްވެ، ތަރައްޤީވަމުން އަންނަ ކުދި ޖަޒީރާ ޤައުމުތަކަށް ދެމެހެއްޓެނިވި، ތަނަވަސް، އަދި ވިލުންތެރި މުސްތަގުބަލަކަށް މަސައްކަތް ކުރުމަށް ލިބިފައިވާ މުހިންމު ފުރުސަތެކެވެ.
ކޮމެންޓު ފޮނުވާ