މާލެއިން ގެއްލިގެން ހޯދަމުން ދިޔަ 14 އަހަރުގެ އަންހެން ކުއްޖާ ފެނިއްްޖެ އެވެ.
މާލެއިން 14 އަހަރުގެ އަންހެން ކުއްޖަކު ގެއްލިގެން ހޯދަން ފުލުހުން އާންމުގެ އެހީއަށް އެދުނީ ރޭގެ ވަގުތެއްގައި އެވެ. އެގޮތުން ތ. މަޑިފުށި / ނައިޓްރޯސް، ޢާއިޝަތު ޒޯޔާ ފިކުރީ (14އ) އާއިލާއަށް ޚަބަރެއްނުވެ ގެއްލިފައިވާ ކަމަށް ރިޕޯޓުކޮށްފައިވާތީ އެކުއްޖާ ހޯދުމުގެ މަސައްކަތް ކުރަމުންދާ ކަން ރޭ ފުލުހުން ވަނީ ހާމަކޮށްފައި އެވެ.
އެގޮތުން 14 އަހަރުގެ ޢާއިޝަތު ޒޯޔާ ފިކުރީ އެންމެ ފަހުން ފެނިފައިވަނީ މެއި 21 ވަނަ ދުވަހު، އެކުއްޖާ ދިރިއުޅޭ ގެއިން ކަމަށް އާއިލާއިން ފުލުހުންނަށް މައުލޫމާތުދީފައިވާ ކަމަށްވެސް ފުލުހުން ބުނެއެވެ.
މިއަދު ހެނދުނު މީޑީއާތަކަށް ފޮނުއްވި މެސެޖެއްގައި ފުލުހުންގެ މީޑިއާ އޮފިޝަލް ވިދާޅުވީ ގެއްލިގެން ހޯދަމުންދިޔަ ތ. މަޑިފުށި / ނައިޓްރޯސް، ޢާއިޝަތު ޒޯޔާ ފިކުރީ ރޭގެ ވަގުތެއްގައި މާލެއިން ވަނީ ފެނިފައިވާ ކަމަށެވެ.
އަދި ޒޯޔާ ފެނުނު އިރު ހާލު ރަނގަޅު ކަމަށްވެސް މީޑިއާ އޮފިޝަލް ވިދާޅުވިއެވެ.
ފުލުހުން އިތުރަށް ބުނީ ކަމާ ގުޅުންހުރި އިދާރާތަކާ ގުޅިގެން ބަލަންޖެހޭ ކަންކަންދަނީ ބަލަމުން ކަމަށެވެ. މައުލޫމާތު ލިބިފައިވާ ގޮތުގައި ޒޯޔާއަކީ މީގެ ކުރިންގެ ވެސް ގެއްލިގެން ހޯދި ކުއްޖެކެވެ.
ޒޯޔާ އަކީ މިދިޔަ އަހަރު ވެސް މާޗު މަހުގެ ތެރޭގައި ގެއްލިގެން ހޯދަމުންދިޔަ ކުއްޖެކެވެ. އެކުއްޖާ ހޯދަމުންދަނިކޮށް އެފަހަރު ފެނިފައި ވަނީ ހުޅުމާލެ ދެވަނަ ފިޔަވަހިންނެވެ.
