އެއްވެސް ގައުމަށް ގާނޫނަށްވުރެ މަތީގައި ނޯވެވޭނެކަމަށް ތުރުކީވިލާތުން ބުނެފިއެވެ.
ތުރުކީގެ ޚާރިޖީ ވުޒާރާއިން ބުނެފައިވަނީ ރަފާގައި ހަމަލާދިނުން ހުއްޓާލުމަށް އިސްރާއީލަށް އެންގުމަށް އައިސީޖޭއިން ނިންމި ނިންމުމަށް މަރުހަބާ ކިޔާ ކަމުގައެވެ. "ދުނިޔޭގެ އެއްވެސް ގައުމަކީ ގާނޫނަށް ވުރެ މަތީގައި އޮތް ގައުމެއް ނޫން. އަޅުގަނޑުމެން އުންމީދު ކުރަނީ ކޯޓުން ނިންމާ ހުރިހާ ނިންމުމެއް ވެސް އިޒްރޭލުން އަވަހަށް ތަންފީޒު ކުރާނެ ކަމަށް. އެކަން ކަށަވަރު ކުރުމަށްޓަކައި އދ.ގެ ސަލާމަތީ މަޖިލީހުގެ ދައުރު އަދާކުރުމަށް ދައުވަތު އަރުވަން" އަސީޖޭއިން އިސްރާއީލުގެ މައްޗަށް ނެރުނު ހުކުމަށްފަހު ތުރުކީނ ނެރުނުް ބަޔާނުގައި ބުނެފައި ވެއެވެ.
މިމަހު ތުރުކީން ވަނީ ދެކުނު އެފްރިކާއިން އިސްރާއީލާ ދެކޮޅަށް އައިސީޖޭގައި ހިންގާ ޖަރީމާގެ މައްސަލާގައި ބައިވެރިވާނެ ކަމަށް ބުނެފަ އެވެ. ތުރުކީގެ ރައީސް ރަޖަބް ތައްޔިބު އުރުދުޣާން މިދިޔަ ޖެނުއަރީ މަހު ވިދާޅުވެފައި ވަނީ ތުރުކީން އދ.ގެ އެންމެ މަތީ ކޯޓުގައި އެ މައްސަލައިގެ ލިޔުންތައް ފޯރުކޮށްދެމުން އަންނަ ކަމަށެވެ.
އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ)ގެ މިއަދު ކުރި އަމުރުގައި ހުކުމުގައި ބުނެފައި ވަނީ ޣައްޒާގެ ދެކުނުގެ ރަފާގައި އިސްރާއީލުން ހިންގަމުންދާ އަސްކަރީ ހަމަލާ ހުއްޓުވަން ޖެހޭ ކަމަށެވެ.
ރަފާހުގައި އިސްރާއީލުން ހިންގާ އަމަލުތަކަކީ "ނަސްލު ނައްތާލުމުގެ" އޮޕަރޭޝަނެއް ކަމަށާއި ފަލަސްތީނުގެ ރައްޔިތުންގެ ދިރިތިބުމަށް ނުރައްކާވާ ކަމަށް ބުނެ ކުއްލި ފިޔަވަޅެއްގެ ގޮތުގައި ކޯޓުހެ އަމުރަކަށް ދެކުނު އެފްރިކާއިން ވަނީ އައިސީޖޭގައި އެދިފަ އެވެ.
މި އެދުމަކީ ޣައްޒާގައި އިސްރާއީލުން އަމަލުކުރި ގޮތާ ގުޅޭ ގޮތުން ދެކުނު އެފްރިކާއިން އެކޯޓަށް ހުށަހަޅާފައިވާ ބޮޑު މައްސަލައިގެ ބައެކެވެ.
އޮކްޓޯބަރު މަހުގެ 7 ވަނަ ދުވަހު ހަމާސްއިން އިސްރާއީލަށް ދިން ހަމަލާތަކަށް ފަހު ހަމާސް ބަލިކުރުމަށް އިސްރާއީލުން ރަފާގައި އަސްކަރީ ހަރަކާތް ހިންގުމަކީ މުހިއްމު ކަމެއް ކަމަށް އެގައުމުން ބުނެފައިވާއިރު، ދެކުނު އެފްރިކާގެ މައްސަލައަކީ "މުޅިން އަސާސެއް ނެތް" މައްސަލައެއްކަމަށްވެސް އިސްރާއީލުން ބުނެފައި ވެއެވެ.
އައިސީޖޭ އަކީ ޔޫއެންގެ އެންމެ މަތީ ކޯޓެވެ. އެކޯޓުގެ އަމުރުތަކަށް ތަބާވުމަކީ ޔޫއެންގެ މެމްބަރު ގައުމުތަކަށް ލާޒިމް ކަމަކަށްވި ނަމަވެސް، ކޯޓުގެ އަމުރުތައް ތަންފީޒުކުރެވޭނެ ގޮތެއް އެކޯޓަށް ފަހިވެފައެއް ނޯވެއެވެ.
