ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ޗެއާމަންގެ މަގާމުންނާއި ބޯޑު މެމްބަރުކަމުން އަހްމަދު ޒުހޫރު މިއަދު ވަކިކޮށްފިއެވެ.
އަހުމަދު ޒުހޫރަކީ ރައީސް ޔާމިންގެ ދައުރުގައި ކޮމިޝަނާ ޖެނެރަލް އޮފް ކަސްޓަމްސްގެ މަގާމާއި ސްޓެލްކޯގެ މެނޭޖިން ޑިރެކްޓަރު ކަމުގެ މަގާމު ފުރުއްވާފައިވާ ބޭފުޅެކެވެ. އަދި އޭނާވަނީ ރައީސް ޔާމިންގެ ދައުރުގައި ޔޫތު މިނިސްޓަރކަމާއި ހެލްތު މިނިސްޓަރުކަންވެސް އަދާކޮށްފައެވެ. ޒުހޫރު އެޗްޑީސީގެ ޗެއަރމަންކަމުގެ މަގާމަށް ހަމަޖެއްސެވީ ފާއިތުވި ފެބްރުއަރީމަހުއެވެ.
ޒުހޫރު އެޗްޑީސީގެ ޗެއަރމަންކަމުން މިއަދުވަކިކުރިއިރު، ސަރުކާރުގެ އިސްމަގާމްތަކުގައި ތިއްބެވި ބައެއް ބޭފުޅުން މަގާމުން ވަކިކޮށް ބައެއް ބޭފުޅުންވަނީ ސަސްޕެންޑްވެސް ކޮށްފައެވެ. އަދި އަނެއްބައި ބޭފުޅުންވަނީ އިސްތިއުފާ ދެއްވާފައެވެ. އެގޮތުން އެމްއެމްޕީއާރުސީގެ އެމްޑީކަމުގެ ފާތިމަތު ތައުފީގު ވަކިކުރެއްވިއިރު އެ ކުންފުނީގެ ޗެއރަޕާސަންގެ މަގާމުގައި ހުންނެވި ނޫރައިންވަނީ މަގާމުން އިސްތިއުފާ ދެއްވާފައެވެ. އަދި ސްޕޯޓްސް މިނިސްޓްރީގެ ޑެޕިއުޓީ މިނިސްޓަރކަމުގައި ހުންނެވި ސެއިން ޝިފާޒުއާއި، ލެންގްއޭޖް ކަލްޗާ އެންޑް ހެރިޓޭޖްގެ ޑެޕިއުޓީ މިނިސްޓަރކަމުގައި ހުންނެވި މުހައްމަދު ސައީދު މޫސާ ވަޖުދީވެސް ވަނީ މަގާމުން ސަސްޕެންޑް ކޮށްފައެވެ. މި ދެބޭފުޅުން މަގާމުން ސަސްޕެންޑްކުރި ސަބަބެއް ރަސްމީކޮށް ހާމަކޮށްފައެއް ނުވެއެވެ.
އަދި އޭގެ އިތުރުން އިއްޔެ މިފްކޯގެ ސީއީއޯގެ މަގާމުން ވަކިކުރުމަށްފަހު ރައީސް މުއިއްޒުވަނީ މިއަދު އޭނާ ފިޝަރީޒް މިނިސްޓްރީގެ ސްޓޭޓް މިނިސްޓަރުކަމުގެ މަގާމަށް އައްޔަން ކޮށްފައެވެ.
ސަރުކާރުގެ އިސް މަގާމްތަކަށް މިއަދު ބަދަލު އައިސްފައިވާއިރު، ރައީސް މުއިއްޒުގެ ތާއީދާއެކު، މަޖިލިސް ރައީސްކަމަށާއި ނާއިބުރައީސްކަމަށް އައްޔަން ކުރާނެ ބޭފުޅުންވެސް ވަނީ މިއަދު ހަމަޖައްސާފައެވެ.
އެގޮތުން މަޖިލިސް ރައީސްކަމަށް ފޮނަދޫ ދާއިރާއަށް އިންތިޚާބުވި އަބުދުއްރަހީމް ހަމަޖައްސާފައިވާއިރު ނާއިބު ރައީސްކަމަށް ހަމަޖައްސާފައިވަނީ ދިއްގަރުދާއިރާއަށް އިންތިޚާބުވި ނާޒިމްއެވެ.
މިއަދު މުލިއާގޭގައި ބޭއްވުނު ބައްދަލުވުމުގައި ވަނީ ޕީއެންސީގެ ޕީޖީ ގްރޫޕްގެ ނައިބު ލީޑަރުންގެ ގޮތުގައިވެސް ބޭފުޅުން ހަމަޖައްސަން ވަނީ ނިންމާފައެވެ. އެމެމްބަރުންނަކީ ހުޅުދޫ ދާއިރާގެ އިންތިހާބީ މެންބަރު މުހައްމަދު ޝާހިދު (ޝާޑު)އާއި، ވިލިމާލެ ދާއިރާގެ އިންތިހާބީ މެންބަރު މުހައްމަދު އިސްމާއިލްއާއި މަހިބަދޫ ދާއިރާގެ މެންބަރު އަހުމަދު ތޯރިގު (ޓޮމް)އާއި ބާރަށު ދާއިރާގެ އިންތިހާބީ މެންބަރު އިބްރާހިމް ޝުޖާއުއެވެ.
