ގަވައިދާ ހިލާފަށް ހިޖުރަކުރުން މަދުކުރުމުގެ ގޮތުން ހޯމް މިނިސްޓްރީން މި މަހުގެ ކުރީކޮޅު ފަށާފައިވާ ހާއްސަ އޮޕަރޭޝަން "އޮޕަރޭޝަން ކުރަނގި" ގެ ދަށުން 705 ބިދޭސީންގެ ބަޔޯމެޓްރިކް ޑޭޓާ އެއްކޮށްފި އެވެ.
ފިޔަވަހިތަކަކަށް ބަހާލައިގެން ފެށުމަށް ހަމަޖެހިފައިވާ މި އޮޕަރޭޝަން ފަށާފައިވަނީ މިމަހުގެ 2 ވަނަ ދުވަހު ކ.ހިންމަފުށިންނެވެ. މި އޮޕަރޭޝަންގެ ފުރަތަމަ ފިޔަވަހީގައި ރާއްޖޭގައި މަސައްކަތްކުރާ ހުރިހާ ބިދޭސީމަސައްކަތްތެރިންގެ ބަޔޯމެޓްރިކް ޑޭޓާ އެއްކުރުމަށް ވަނީ ހަމަޖެހިފައެވެ.
ހޯމް މިނިސްޓްރީން ބައެއް މީޑިއާތަކަށް މައުލޫމާތު ދީފައިވާ ގޮތުގައި ހިންމަފުށީގެ ކަންކަން ނިމުނުހާ އަވަހަކަށް ޑޭޓާ އެއްކުރާނެ ދެވަނަ ރަށެއް މިނިސްޓްރީން އިއުލާނު ކުރާނެއެވެ.
ހޯމް މިނިސްޓަރު އަލީ އިހުސާން މީގެކުރިން ވިދާޅުވެފައި ވަނީ "ވަރަށް އަވަހަށް" އިތުރު ފަސް ސަރަހައްދަކަށް އެ މިނިސްޓްރީން އޮޕަރޭޝަން ފުޅާކުރާނެ ކަމަށެވެ.
މިދިޔަ އޭޕްރީލް މަހު ބޭއްވި "އަހާ" ޕަބްލިކް ފޯރަމްގެ ސެޝަނެއްގައި އިހުސާން ވިދާޅުވީ ލިޔެކިޔުން ނެތް ބިދޭސީންގެ މައްސަލަ ތިން އަހަރުގެ ތެރޭގައި ހައްލުކުރާނެ ކަމަށެވެ. އޭނާ ވިދާޅުވީ ހިޖުރަކުރާ މީހުންގެ ބަޔޯމެޓްރިކް ޑޭޓާ އެއްކުރުމަކީ އޮޕަރޭޝަންގެ ފުރަތަމަ ފިޔަވަހި ކަމަށާއި، އެއް އަހަރު ދުވަހުގެ ތެރޭގައި އެކަން ނިމޭނެ ކަމަށް ބެލެވޭ ކަމަށެވެ.
އޭނާ ވިދާޅުވި ގޮތުގައި ހުރިހާ ހިޖުރަވެރިންގެ ޑޭޓާ އެއްކޮށް ސިސްޓަމަކަށް ވެއްދުމުން، ލިޔެކިޔުން ނެތް ހުރިހާ ބިދޭސީން ރެގިއުލަރައިޒް ކުރެވޭނެކަމުގައެވެ. އެ ފުރުސަތުގެ ބޭނުން ނުހިފާ މީހުން ޑީޕޯޓްކޮށްލާނެ ކަމުގެ އިންޒާރު އިހުސާން ދެއްވި ނަމަވެސް އަމާޒަކީ ހިޖުރަކުރާ މީހުން ހައްޔަރުކޮށް ޑީޕޯޓު ކުރުން ނޫން ކަމަށާއި އެ މީހުން ރެގިއުލަރައިޒް ކުރުމުގެ ފުރުސަތު ދިނުން ކަމަށް އިހުސާން ވިދާޅުވި އެވެ.
