ރާއްޖޭގެ ސިއްހީ ދާއިރާ ކުރިއެރުވުމަށް ސައުދީ ފަންޑު ފޯ ޑިވެލޮޕްމަންޓްގެ ފަރާތުން ރާއްޖެ އަށް 50 މިލިއަން ޑޮލަރުގެ (770 މިލިއަން ރުފިޔާ) ލޯނެއް މިއަދު ދީފިއެވެ.
ފިނޭންސް މިނިސްޓްރީގައި ބޭއްވި ރަސްމިއްޔާތެއްގައި ސައުދީ ފަންޑުގެ ފަރާތުން ސޮއިކުރެއްވީ ސީއީއޯ ސުލްތާން ބިން އަބްދުއްރަޙްމާން އަލް މަރްޝަދެވެ. ރާއްޖޭގެ ފަރާތުން އެއްބަސްވުމުގައި ސޮއިކުރެއްވީ ފިނޭންސް މިނިސްޓަރު ޑރ. މުހައްމަދު ޝަފީގެވެ.
މި ރަސްމިއްޔާތުގައި ސައުދީ ފަންޑުގެ ސީއީއޯ ސުލްތާން ވިދާޅުވީ ސިއްހީ ދާއިރާ ތަަރައްގީ ކުރުމަށް ދިން އެހީއަކީ ރާއްޖޭގެ ރަށްރަށުގައި ފޯރުކޮށްދޭ ސިއްހީ ހިދުމަތުގެ ފެންވަރު ރަނގަޅުކުރުމަށް ފޯރުކޮށްދޭ އެހީއެއް ކަމަށެވެ. އެގޮތުން މި ލޯންގެ އެހީގައި ތިން ރަށެއްގައި ތިން ހޮސްޕިޓަލް އިމާރާތް ކުރާއިރު، ކޮންމެ ހޮސްޕިޓަލަކީ 150 އެނދުގެ ހޮސްޕިޓަލެއް ކަމުގައި އޭނާ ވިދާޅުވިއެވެ.
ސުލްތާން ވިދާޅުވީ މި ހޮސްޕިޓަލްތަކުގެ ސަބަބުން ރާއްޖޭގެ ސިއްހީ ދާއިރާ އަށް ކުރިއެރުން އަންނާނެ ކަމަށެވެ. މިއީ ކުރިއަށް އޮތް މުސްތަގްބަލްގައި ހަރުދަނާ ސިއްހީ ހިދުމަތެއް ގާއިމު ކުރުމަށް އެޅޭ ވަރަށް މުހިންމު ފިޔަވަޅެއް ކަމަށް ވެސް އޭނާ ވިދާޅުވިއެވެ. މި މަޝްރޫއު ފުރިހަމަވުމުން ދިވެހިންގެ ދިރިއުޅުމަށް ހެޔޮ ބަދަލުތަކެއް އަންނާނެ ކަމަށް އުންމީދު ކުރައްވާ ކަމަށް އޭނާ ވިދާޅުވިއެވެ.
"ސިއްހީ ދާއިރާގެ މި ޕްރޮޖެކްޓަކީ އަހަރުމެންގެ ހިތާ ވަރަށް ގުޅިފައި އޮތް ކަމެއް. މިއީ ރައްޔިތުންނަށް އުންމީދެއް ގެނުވާނެ އަދި ދުޅަހެޔޮ ސިއްހަތެއްގައި ގިނަ ދުވަހު ހުރުމަށް މެދުވެރިވާނެ ކަމެއް. މި ޕްރޮޖެކްޓްގެ ބައިވެރިއަކަށް ވުމުގެ ފުރުސަތު ލިބުމަކީ ސައުދީ ފަންޑުން ފަހުރުވެރިވާ ކަމެއް،" ސުލްތާން ވިދާޅުވިއެވެ.
ޝަފީގް ވަނީ މިހާތަނަށް އައިިއިރު ސައުދީ އަރަބިއްޔާ އިން ރާއްޖެ އަށް ފޯރުކޮށްދިން އެހީތެރިކަމަށް ޝުކުރު އަދާކުރައްވައިފައެވެ.
ކޮމެންޓު ފޮނުވާ