ކުރީގެ ރައީސް ސާލިހާއެކު ކުޑަ އިރުއްސުރެ އޮތް 50 އަހަރުވީ ގުޅުން ކަނޑާލުން ވެގެންދިޔައީ ފަސޭހަ ކަމަކަށް ނޫންކަމުގައި ކުރީގެ ރައީސް ނަޝީދު ވިދާޅުވެއްޖެއެވެ.
ސްރީ ލަންކާގައި ހުންނަވާ، އެގައުމުގެ ލޯކަލް ނޫހެއް ކަމުގައިވާ "ދަ މޯނިންގ" ނޫހަށް ދެއްވި އިންޓަވިއުއެއްގައި ނަޝީދު ވިދާޅުވީ އެމްޑީޕީން ވަކިވުމަކީ އެމަނިކުފާނަށް ވަރަށް ހިތްދަތިކަން ލިބިގެންދިޔަ ކަމެއް ކަމަށާއި، އެމްޑީޕީ އުފެއްދީ ވަކި އަސާސްތަކެއް ގަބޫލުކުރާތީ އެ އަސާސްތަކުގެ މަތީގައި ދެމިހުރުމަށް ކަމުގައެވެ.
އެހެންނަމަވެސް ވެރިކަން ކުރަން ލިބުނު ދެވަނަ ދައުރުގައި ފެނިގެން ދިޔައީ އެމްޑީޕީ އެ އަސާސްތަކާ ދުރަށްދިޔަތަން ކަމުގައި ނަޝީދު ވިދާޅުވިއެވެ. "ދަ މޯނިންގ" ނޫހަށް ދެއްވި އިންޓަވިއުގައި ނަޝީދު ވިދާޅުވީ އެމްޑީޕީއާއި ދުރަށްދާން ޖެހުނު ހަގީގީ ސަބަބަކީ އެއީ ކަމުގައެވެ.
އެ ނޫހަށް ދެއްވި އިންޓަވިއުގައި ނަޝީދު ވިދާޅުވީ ޑިމޮކްރަޓުސްގައި އެމަނިކުފާނުގެ އެއްވެސް މަގާމެއް ނޯންނާނެ ކަމަށާއި އެހެންނަމަވެސް، އެމްޑީޕީގެ އަސްލު މައިގަނޑު އުޞޫލުތައް ހަނދާންކޮށްދިނުމުގެ ގޮތުން އެޕާޓީ ވުޖޫދުކުރަންން ޖެހޭކަމަށް ގަބޫލުކުރެއްވުނީ ކަމުގައެވެ.
އަޅުގަނޑުމެން ނުކުތީމަ، ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބުން އެމްޑީޕީ ބަލިވީ. ރައްޔިތުންނަށް ވެފައިވާ ވައުދުތަކާ އެއްގޮތް ނުވާނަމަ އިންތިހާބުތައް ކާމިޔާބު ކުރުމުގެ މާނައެއް ނެތެވެ. އެއީ ހިތާމަހުރި ކަމެއް، އަޅުގަނޑަށް ވަރަށް ދެރަވޭ، މި ދެ އިންތިޚާބުން ވެސް އަޅުގަނޑުމެން ބަލިވީމަ. އަޅުގަނޑުމެންގެ ނާކާމިޔާބީއިން އަޅުގަނޑުމެން ފިލާވަޅެއް ދަސްކުރަން ޖެހޭނެ.
ނަޝީދު ވިދާޅުވިއެވެ.
ނަޝީދު ވިދާޅުވީ އެމްޑީޕީ ވެރިކަމަށް އައީ ކުރީގެ ސަރުކާރުގެ ކޮރަޕްޝަންގެ މައްސަލަތައް ބަލާނެ ކަމަށް ވައުދުވެގެންކަމަށާއި އެކަމެއް ނުކުރެވުނު ކަމުގައެވެ. އަދި އޭގެ އިތުރުން ދަރަނި ރީސްޓްރަކްޗަރ ކޮށްދޭނެ ކަމަށްވެސް އެމްޑީޕީން ވައުދުވިކަން ފާހަގަ ކުރައްވަމުން ނަޝީދު ވިދާޅުވީ އޭގެ ބަދަލުގައި އެހެން ލޯނެއް ނެގީ ކުރީގެ ދަރަނި އަދާކުރުމަށް ކަމަށެވެ.
އެއީ ޒިންމާދާރުކަން ކުޑަ ކަމެއްގެ ގޮތުގައި ނަޝީދު ސިފަ ކުރެއްވިއެވެ. އަދި ނަޝީދު ވިދާޅުވީ މެނިފެސްޓޯގެ ނަޒަރު ލޮލުން ކައްސާލާ، ވައުދުވި ކަންކަން ކުރުމުގެ ބަދަލުގައި އެމްޑީޕީގެ ސަރުކާރުން އިންވެސްޓް ކުރަމުން ދިޔައީ ހަމައެކަނި ދަރަނީގެ ބުރަ ބޮޑުވާ ޕްރޮޖެކްޓްތަކަށް ކަމަށެވެ. އެކަންކަމަށް ތާއީދު ނުކުރެވުނީކަމުގައިވެސް ނަޝީދު ވިދާޅުވިއެވެ.
މި ހުރިހާ ކަމަކާއެކު ދައްތައާއި ކައިވެނިކޮށްގެން އުޅުއްވާ، އަދި 50 އަހަރަށް ވުރެ ގިނަ ދުވަސްވީ ކުޑައިރުގެ ރަހުމަތްތެރިޔާއާ ގުޅުން ކަނޑާލިން. އެއީ ފަސޭހަ ކަމެއް ނޫނެވެ.
ނަޝީދު ވިދާޅުވިއެވެ.
