އިންތިޚާބުގެ ނަތީޖާ ދައްކާގޮތުން ހއ. އުތީމު ކައުންސިލްގެ މެމްބަރުކަން ޕީއެންސީގެ އިބްރާހިމް ސުނާނަށް ލިބުނު އިރު، ލަންދޫގެ ގޮނޑި ލިބުނީ އެމްޑީޕީގެ މެމްބަރު އަބްދުﷲ އާރިފަށެވެ. އަދި ވެލިދޫ ކައުންސިލްގެ ގޮނޑި ކާމިޔާބުކޮށްފައި ވަނީ ޕީއެންސީގެ ކެންޑިޑޭޓު އަބްދުﷲ ރައްޒާގު އެވެ.

ކައުންސިލްގައި އަންހެނުނަށް ހާއްސަކޮށްފައިވާ ގޮނޑީގެ ތެރެއިން، ތަކަންދޫގެ ކައުންސިލަށް އިންތިހާބުވެފައި ވަނީ ޕީއެންސީގެ ސަމީނާ މުހައްމަދެވެ. އަދި އިންނަމާދޫގެ ގޮނޑި ކާމިޔާބު ކުރީ ޕީއެންސީގެ މެމްބަރު އައިޝަތު ސަމާހާ އެވެ.

މިފަހުން ބޭއްވި ކައުންސިލްތަކުގެ ބައި އިލެކްޝަނުގެ ގިނަ ގޮނޑިތައް ލިބިފައި ވަނީ ޕީއެންސީއަށެވެ. އަދި މި މަހުގެ 28 ގައި އައު ދައުރަކަށް ހުވާ ކުރުމަށް ތައްޔާރުވެފައިވާ 20 ވަނަ މަޖިލީހުން ވެސް ސަރުކާރަށް ވަނީ 93 ގޮނޑީގެ ތެރެއިން 76 ގޮނޑިއާއި އެކު ސުޕަ މެޖޯރިޓީ ލިބިފަ އެވެ. މި އިންތިޚާބު ޑިމޮކްރެޓްސްއިން ނިންމާލީ %2ގެ ވޯޓާއި ސުން ގޮނޑިއާއެކުއެވެ.