ރައީސް މުއިއްޒުގެ ސަރުކާރުގެ މާލީ ސިޔާސަތަށް ނަޝީދުގެ ތައުރީފް ކުރައްވައިފިއެވެ.

ރައީސް މުއިއްޒުގެ ސަރުކާރުން 50 މިލިއަނަށްވުރެ އިތުރަށް ހަރަދުވާ މަަސައްކަތްތައް ފަށާނީ ޖޫން މަހަށް ފަހު ކަމަށް ބުނެ ނޫހަކުން ޝާއިއުކޮށްފައިވާ އާޓިކަލްއަކަށް ރައީސް ނަޝީދުވަނީ އެކްސްގައި ކޮމެންޓުކުރައްވާފައެވެ. އަދި އެމަނިކުފާނުވަނީ ސަރުކާރުން މާލީ މަސައްކަތްތައް ޒިންމާދާރުކަމާއިއެކު އަދާކުރަމުންދާކަން ފެނުމަކީ ރަނގަޅު ކަމެއްކަމަށް ވިދާޅުވެފައެވެ. ހަސަން ކުރުސީ އެކައުންޓު ހިންގާ ފަރާތާއި ދެމެދު ރައީސް ނަޝީދުވަނީ އެކްސްގައި އެމަނިކުފާނުގެ ނުރަސްމީ އެކައުންޓުން ރައީސް މުއިއްޒުގެ ސަރުކާރުގެ އިގްތިސާދީ ހާލަތާއި ގުޅޭގޮތުން ވާހަކަ ދައްކަވާފައެވެ.

ދަތުރުފަތުރު ކުރުމަށް ރައީސް މުއިއްޒު 100 މިލިއަނަށްވުރެ ބޮޑު ހަރަދެއް ކޮށްފައިވާކަމަށް ކުރުސީގެ ނަމުގައި ހިންގާ އެކައުންޓުން ބުނުމާއިއެކު ރައީސް ނަޝީދުވަނީ ސަރުކާރުގެ އަމަލުތައް ދިފާއުކުރައްވާފައެވެ. އެމަނިކުފާނު ވިދާޅުވީ، ކުރުސީ އެކައުންޓުން ކުރަމުން އައި މަސައްކަތްތަކުގެ ހަގީގީ މަންޒަރު އޮޅި ބޮޑު މަންޒަރު މިހާރު ނުފެންނަކަމަށާއި މިވަގުތު ދިވެހިރާއްޖޭގެ ހަރަދަށްވުރެ އާމްދަނީ އިތުރުކަމަށާއި މީގެން ޒަމާނަކު އެ މަންޒަރު ނުފެންނަކަމަށެވެ.

ރައީސް ނަޝީދު ވިދާޅުވީ ރައީސް އިބްރާހިމް މުހައްމަދު ސާލިހުގެ ވެރިކަމުގެ ދައުރުގެ ކުރީ ކޮޅުގައި ބަޖެޓް ސާޕްލަސްވީ އޭރު ސަރުކާރު ހިންގުމުގައި އެމަނިކުފާނުގެ ބަސް ހިމެނޭތީކަމަށެވެ. އެހެންނަމަވެސް މަޖިލިސް ގޮނޑިތައް ލިބުމާއިއެކު އެމްޑީޕީގެ އަމަލުތައް ހައްދުން ނެއްޓިކަމަށް ފާހަގަކުރެއްވިއެވެ. އެމަނިކުފާނު ވިދާޅުވީ، ޕްރޮޖެކްޓުތައް ފަށަމުންދިޔައީ މަޖިލީހުގެ ބާރުވެރިކަން ދެމެހެއްޓުމުގެ ނިޔަތުގައި އެކަނިކަމަށާއި ރައްޔިތުންގެ ހައްގުގައި އެ މަސައްކަތްތައް މިދިޔަ ދައުރުގައި ނުކުރާކަމަށެވެ.