އިންޑިއާއިން ދާދި ފަހުން ބޮއިކޮޓް ކުރުމަށް ގޮވާލުމުން، ހާއްސަކޮށް ފަތުރުވެރިކަމުގެ ދާއިރާއަށް އޭގެ ނޭދެވޭ އަސަރު ކުރާނެތީ ރާއްޖޭގެ ކުރީގެ ރައީސް މުހައްމަދު ނަޝީދު ކަންބޮޑުވުން ފާޅުކުރައްވައިފި އެވެ.
އަދި އޭގެ އިތުރުން މިވަގުތު އިންޑިއާގައި ހުންނެވި ނަޝީދު ވަނީ ދިވެހި ރައްޔިތުންގެ ފަރާތުން އިންޑިއާގެ ކިބައިން މާފަށްވެސް އެދިވަޑައިގެންފައި ކަމަށް އިންޑިއާގެ ނޫސްތަކުގައި ރިޕޯޓު ކޮށްފައި ވެއެވެ.
އިންޑިއާއާއި ރާއްޖެއާ ދެމެދު އުފެދިފައިވާ ޑިޕްލޮމެޓިކް ނުތަނަވަސްކަން އަނެއްކާވެސް ދަށަށް ގޮސްފައި މިވަނީ ޗައިނާއަށް ތާއީދުކުރާ ކަމަށް އިންޑިއާއިް ގަބޫލުކުރާ ރައީސް މުހައްމަދު މުއިއްޒު މިމަހުގެ 10 ވަނަ ދުވަހުގެ ކުރިން އިންޑިއާގެ ހުރިހާ ސިފައިން އެގައުމުން ބޭރުކުރަން ނިންމާފައިވާކަން އިއުލާނު ކުރެއްވުމާއިވެސް ގުޅިގެންނެވެ.
މިކަމުގެ ސަބަބުން ނުތަނަވަސްކަން އުފެދި، އިންޑިއާގެ ސޯޝަލް މީޑިއާގެ ވަސީލަތްތަކުގައި ރާއްޖެ ބޮއިކޮޓް ކުރުމަށް ގޮވާލުމުން ރާއްޖޭގެ އިޤްތިޞާދުގެ މުހިންމު ބައެއް ކަމުގައިވާ ފަތުރުވެރިކަމަށް އެކި ދާއިރާތަކަށް ވަނީ އަސަރުކޮށްފައެވެ.
"އޭގެ ސަބަބުން ރާއްޖެއަށް ވަރަށް ބޮޑަށް އަސަރުކޮށްފައިވަނީ، ހަގީގަތުގައި އަޅުގަނޑު މިހުރީ އިންޑިއާގައި. އެކަމާ އަޅުގަޑު ވަރަށް ކަންބޮޑުވޭ. އަޅުގަނޑު ދަންނަވާލަން ބޭނުންވަނީ، ރާއްޖޭގެ ރައްޔިތުން މަޢާފަށް އެދެއޭ، އަޅުގަނޑުމެން ހިތާމަކުރަން، މިކަން ހިނގީތީ. އަޅުގަނޑުމެން އެދެނީ ޗުއްޓީ ހޭދަކުރަން އިންޑިއާ މީހުން ރާއްޖެ އައުން، އަޅުގަނޑުމެންގެ މެހެމާންދާރީއަށް އެއްވެސް ބަދަލެއް ނާންނާނެ،" ނިއުސް އެޖެންސީ އޭއެންއައި އިން ނަޝީދުއާި ހަވާލާދީ ރިޕޯޓު ކޮށްފައި ވެއެވެ.
