ސީވީއެފް (ކްލައިމެތް ވަލްނަރަބުލް ފޯރަމް) ޖަމިއްޔާގައި ހިމެނޭ ގައުމުތަށް، ކުރިމަތިވާ މާލީ ދަތިތަކުން އަރައިގަތުމަށް އައިއެމްއެފްގެ ޕްރޮގްރާމްތަކަށް ނުދިއުމަށް ސީވިއެފްގެ ސެކެޓްރީ ޖެނެރަލް، ކުރީގެ ރައީސް މުހައްމަދު ނަޝީދު އެދިއެއްޖެއެވެ.
ރާއްޖޭގެ އިގްތިސާދީ ހާލަތު ދަށްވެ، އައިއެމްއެފްގެ ޕްރޮގްރާމަށް ސަރުކާރުން ދާން އުޅޭކަމަށް އަޑު ފެތުރި، އެހެންނަމަވެސް މި ސަރުކާރުން އެކަން ދޮގު ކޮށްފައިވަނިކޮށް، ނަޝީދު ކުރެއްވި ޓުވީޓެއްގައި ވިދާޅުވީ ދަރަނިން އަރައިގަތުމަށް ސީވީއެފް ގައުމުތައް އައިއެމްއެފްގެ ޕްރޮގްރާމަށް ދާން ނުޖެހޭނެކަމަށެވެ.
އަދި ސީވީއެފް-ވީ20 ސެކްރެޓޭރިއެޓުން މެމްބަރު ގައުމުތަކަށް ދަރަނި ކުޑަކުރުމުގެ ފުރުސަތުތައް ދެނެގަތުމަށް ފަންނީ އެހީތެރިކަން ފޯރުކޮށްދޭނެކަމަށްވެސް ނަޝީދު ވިދާޅުވެފައި ވެއެވެ.
CVF countries need not go into IMF programs to overcome debt distress. The CVF-V20 Secretariat will facilitate technical support for member countries to identify opportunities to reduce debt, such as debt-for-climate & environment swaps and carbon trading. @TheCVF
— Mohamed Nasheed (@MohamedNasheed) February 17, 2024
ނުސީދާކޮށް، އައިއެމްއެފްގެ ޕްރޮގްރާމަށް ނުދިއުމަށް ނަޝީދު ސަރުކާރަށް ގޮވާލައްވާފައިވާއިރު، ސަރުކާރުން ވަނީ އައިއެމްއެފްގެ ޕްރޮގްރާމަށް ދިއުމަށް ސަރުކާރުން ނިންމާފައިވާކަމަށް ބުނެ ދައްކާ ވާހަކަތައް ދޮގު ކޮށްފައެވެ.
އިކޮނޮމިކް މިނިސްޓްރީން ބުނެފައިވަނީ، އެ ވާހަކަތަކަކީ ރާއްޖޭގެ ބޭންކިންގ އަދި ޕަބްލިކް ފައިނޭންސް ނިޒާމުގެ އިތުބާރު ގެއްލުވާލުމަށް ޓަކައި ބައެއް ފަރާތްތަކުން ގުޅިގެން މަސައްކަތް ކުރަމުންދާކަމަށް ފާހަގަކުރެވިފައިވާކަމަށެވެ.
ރާއްޖޭގެ އިގްތިސާދީ ހާލަތު ދަށްވެ، ސަރުކާރުން އައިއެމްއެފްގެ ޕްރޮގްރާމަށް ދާން ތައްޔާރުވަމުންދާކަމަށް ސޯޝަލް މީޑިއާގައި ބައެއް ފަރާތްތަކުން ދައްކަމުންދާ ވާހަކަތަކާއި ގުޅޭގޮތުން އިކޮނޮމިކް މިނިސްޓްރީން މިއަދު ނެރުނު ނޫސް ބަޔާނެއްގައި ބުނެފައިވަނީ، މި ތުހުމަތުތަކަކީ ދޮގު އަދި މުޅިން އަސާސެއް ނެތް ތުހުމަތުތަކެއް ކަމުގައެވެ.
މިއީ ސަރުކާރުން ފަށާފައިވާ އިޤްތިޞާދީ އަދި މާލީ ބޮޑެތި އިޞްލާޙުތައް ފުނޑުފުނޑުކޮށްލުމަށް ކުރާ މަސައްކަތްތަކެކެވެ. ދެމެހެއްޓެނިވި ގޮތެއްގައި ހަރުދަނާ އިޤްތިޞާދެއް ބިނާކުރުމަށް ޓަކައި އިޞްލާޙީ އެޖެންޑާގެ ދަށުން ކުރިއަށް ދާއިރު، ރާއްޖޭގެ ބޭންކިންގ ނިޒާމުގައި ޢާންމު މަސްލަހަތާއި އަމަންއަމާންކަން ދެމެހެއްޓޭނެކަމުގެ ޔަޤީންކަން ސަރުކާރުން އަރުވަމެވެ.
އިކޮނޮމިކް މިނިސްޓްރީގެ ބަޔާނުގައި ވިދާޅުވެފައި ވެއެވެ.
މިނިސްޓްރީގެ ބަޔާނުގައި އިތުރަށް ވިދާޅުވެފައިވަނީ، މީގެ އިތުރުން، އިޤްތިޞާދީ ކުރިއެރުމާއި ބެހޭގޮތުން ތަރައްޤީގެ ބައިވެރިންގެ ފަހުގެ ރިޕޯޓްތަކުން ވެސް ފާހަގަކުރެވިފައިވާ ފަދައިން، އިޤްތިޞާދީ ގޮތުން ކުރިމަތިވި ގޮންޖެހުންތަކާއެކުވެސް، އިޤްތިޞާދީ ދުވެލި ކުރިއަރާނެ ކަމަށް ލަފާކުރެވޭ ވަރަށްވުރެ، ޙަޤީޤީ އިޤްތިޞާދު މިދަނީ ރަނގަޅު ވަމުންކަން ސަރުކާރުން ފާހަގަ ކޮށްފައި ވެއެވެ.
