މިއަރުގެ ފުރަތަމަ ކުއާޓަރުގައި ފުލުހުންނާއި ސިފައިންގެ މުސާރަ ބޮޑު ކުރާނެކަމުގައި ފިނޭންސް މިނިސްޓަރ ވިދާޅުވެއްޖެއެވެ.
ބައެއް މީޑިއާތަކަށް މައުލޫމާތު ދެއްވަމުން ފިނޭންސް މިނިސްޓަރު ޝަފީގު ވިދާޅުވެފައިވަނީ ދައުލަތުގެ ކޭޝް ފްލޯއަށް ރިއާޔަތްކޮށް، އެ މިނިސްޓްރީން ފުލުހުންނާއި ސިފައިންގެ މުސާރައިގެ އޮނިގަޑު މިހާރު އެކުލަވާލަމުން އަންނަ ކަމަށެވެ.
އަންނަ މާޗްމަހުގެ 1 ވަނަ ދުވަހުން ފެށިގެން ފުލުހުންގެ މުސާރަ ބޮޑުކުރާނެކަން އެމުއްސަސާއަށް އަންގާފައިވާކަން ފުލުހުންގެ މުވައްސަސާގެ ފަރާތުން މިއަދު ވަނީ ހާމަކޮށްފައެވެ.
މިކަން ހާމަކޮށްފައިވަނީ، ފުލުހުންގެ މުސާރަ ބޮޑު ނުކޮށްދޭން ނިންމާފައިވާކަމަށް ބުނެ ބައެއް މީޑިއާތަކުގައި ދެކެވެމުންދާ ވަހަކަތަށް ރައްދުދީ ފުލުހުންގެ ސުޕްރިންޑެންޓް އަހުމަދު ޝިފާން ކުރެއްވި އެކްސް ޕޯސްޓެއްގައެވެ.
އެކްސް ޕޯސްޓުގައި ޝިފާން ވިދާޅުވެފައިވަނީ 2024 މާރިޗު 1 އިން ފެށިގެން ފުލުހުންގެ މުސާރަ ބޮޑުކުރެވޭނެކަން ފިނޭންސް މިނިސްޓްރީއިން ފުލުހުންނަށް އަންގާފައިވާ ކަމުގައެވެ.
ސިފައިންނާއި ފުލުހުންގެ މުސާރަ ދެގުނަ ބޮޑުކުރުމަކީ ރައީސް މުއިއްޒުގެ ރިޔާސީ ވައުދެކެވެ. ފާއިތުވި ކެމްޕޭން ތެރޭގައި ރައީސް މުއިއްޒު ވައުދުވެފައިވަނީ ފުލުހުންގެ މުސާރަ ދެގުނަ ކޮށްދޭނީ ބައިބަޔަށް ބަހާލައިގެން ކަމުގައެވެ.
އެގޮތުން ފުލުހުންނާއި ސިފައިންގެ މުސާރަ ދެގުނަ ކުރުމަށް ހަމަޖައްސާފައިވާ ގޮތަކީ 2024 ގައި 35 އިންސައްތަ މުސާރަ ބޮޑުކޮށް، 2026 ގައި 35 އިންސައްތަ ބޮޑު ކުރާގޮތަށެވެ. އަދި 2028 ގައި ބާކީ 30 އިންސައްތަ މުސާރަ ބޮޑުކުރާނެ ކަމަށް ރައީސް މުއިއްޒު ވަނީ ވިދާޅުވެފައެވެ.
މައުލޫމާތު ލިބިފައިވާ ގޮތުގައި މި ސަރުކާރުން އަންނަނީ ފުލުހުންނާއި ސިފައިންގެ އިތުރުން ކަސްޓަމްސް އާއި އިމިގްރޭޝަން ފަދަ އެހެނިހެން ޔުނިފޯމް ބޮޑީސްތަކުގެ ވެސް މުސާރަ ބޮޑު ކުރުމުގެ މަސައްކަތް ކުރަމުންނެވެ.
