"ހަފްތާ 14″ ނަމުގައި އާ ސަރުކާރުގެ ފުރަތަމަ 100 ދުވަހުގެ ތެރޭގައި ރައްޔިތުންނަށް ފުރިހަމަކޮށް ދިނުމަށް ކަނޑައަޅާފައިވާ 161 ކަމެއްގެ މައްޗަށް އެކުލެވޭ މަގުޗާރޓުގައި، ރާއްޖޭގެ ތިބި ބޭރުގެ ސިފައި ބޭލުމުގެ މަސައްކަތް އެންމެ ފުރަތަމަ ދުވަހު ފަށާ ކަމެއްގެ ގޮތުގައި ހިމަނައިފިއެވެ.
އިންތިޚާބީ ރައީސްގެ ފުރަތަމަ 100 ދުވަހުގެ ތެރޭގައި ކުރައްވަން ޕްލޭން ކޮށްފައިވާ ކަންކަމުގެ މައްޗަށް އެކުލެވޭ ރޯޑް މެޕް ރޭ އިއުލާން ކުރައްވާފައިވަނީ ދަރުބާރު ގޭގައި ބޭއްވި ޚާއްސަ ހަފްލާއެއްގައެވެ. އެހަފްލާގައި 100 ދުވަހުގެ ރޯޑް މެޕް އިއުލާން ކުރައްވާފައިވަނީ "ހަފްތާ 14″ ގެ ނަމުގައެވެ.
މިމަގު ޗާޓުގައިވާގޮތުން "ދިވެހި ރާއްޖޭގައި ތިބި ބޭރުގެ ސިފައިން ބޭލުމުގެ މަސައްކަތް ފެށުން" ހިމަނާފައިވަނި އިންތިޚާބީ ރައީސްވެރިކަމުގެ ވެރިކަމުގެ ފުރަތަމަ ދުވަހު ފަށާ މަސައްކަތެއްގެ ގޮތުގައެވެ. އަދި މަގުޗާޓުގައި އެންމެ ފުރަތަމައަށް ހިމަނާފައިވާ އައިޓެމަކީ އެއީކަން ފާހަގަ ކޮށްލެވެއެވެ.
އެއަށްފަހު ދެވަނަ އައިޓަމެއްގެ ގޮތުގައި ހިމަނާފައިވަނީ ނިމިދިޔަ ސަރުކާރުން އެހެން ގައުމުތަކާއެކު ވެފައިވާ ސިއްރު އެއްވަސްވުން ތަކުގައި ދިވެހިރާއްޖޭގެ މިނިވަންކަމާއި، ސިޔާދަތަށް ނުރައްކާވާގޮތަށް ހުރި ނުކުތާތައް އުވާލުމުގެ މަސައްކަތް ފެށުމެވެ. މިމަސައްކަތަށް މަގު ޗާރޓުގައި ދީފައިވާ މުއްދަތަކީ 4 ހަފްތާއެވެ.
އެއަށްފަހު ޑރ. މުއިއްޒުގެ ވެރިކަމުގެ ފުރަތަމަ 14 ހަފްތާގެ މުއްދަތުގައި، ދިވެހިރާއްޖޭގެ އެކްސްކުލޫސިވް އިކޮނޮމިކް ޒޯން (އީޒެޑް)ގެ ތެރެއިން ދެކުނު ކަނޑުގެ ސަރަހައްދުން ބައެއް ގެއްލޭގޮތަށް އިންޓަރނޭޝަނަލް ޓްރިބިއުނަލް ފޮރ ދަ ލޯ އޮފް ދަ ސީ (އިޓްލޮސް)އިން ކޮށްފައިވާ ހުކުމް އިސްތިއުނާފް ކުރުންވެސް ވެސް ހިމެނެއެވެ.
މި ދެކަމަކީވެސް ޑރ. މުއިއްޒުގެ ރިޔާސީ ކެމްޕޭންގައި ވެފައިވާ ވަރަށް މުހިންމު ދެ ވައުދުކަން ފާހަގަ ކޮށްލެވެއެވެ.
ދަރުބާރުގޭގައި ބޭއްވި ހާއްސަ ރަސްމިއްޔާތެއްގައި "ހަފްތާ 14″ ނަމުގައި މި މަގު ޗާޓް އިފްތިތާހް ކުރެއްވީ އިންތިހާބީ ރައީސް މުއިއްޒެވެ. އެ މަގު ޗާޓުގައި 161 ވައުދު ފުރިހަމަކުރުމަށް ހިމެނެއެވެ. އެ ޗާޓުގެ މަސައްކަތް ބަހާލާފައިވަނީ އަށް ދާއިރާއަކަށެވެ.
އެ ދާއިރާތަކުގެ ތެރޭގައި ހިމެނެނީ
މިނިވަންކަމާއި ސިޔާދަތު
އިސްލާމް ދީނާއި ގައުމިއްޔަތު
ގެދޮރުވެރިކަމާއި އުމްރާނީ ތަރައްގީ
އިގްތިސާދާއި ތިމާވެށި
އަންހެނުން، ޒުވާނުން، ފަންނިއްޔާތު އަދި ކުޅިވަރު
ސިއްހީ ދުޅަހެޔޮކަމާއި އޯގާތެރި މުޖުތަމައު
ތައުލީމާއި ތަމްރީނު
ސަރުކާރުގެ ސިޔާސަތާއި ގާނޫނީ އިސްލާހު
ރޭގެ ހަފްލާގައި ވާހަކަ ދައްކަވަމުން ޑރ. މުއިއްޒު ވިދާޅުވެފައިވަނީމ "ހަފްތާ 14″ ނަމުގައި އާ ސަރުކާރުގެ ފުރަތަމަ 100 ދުވަހުގެ ތެރޭގައި ރައްޔިތުންނަށް ފުރިހަމަކޮށް ދިނުމަށް ކަނޑައަޅާފައިވާ 161 ކަންތައްތަކަށް ވުރެ ގިނަ ކަންކަން އެ މުއްދަތުގައި ހާސިލް ކުރައްވާނެ ކަމުގައެވެ.