"ހަފްތާ 14″ ނަމުގައި އާ ސަރުކާރުގެ ފުރަތަމަ 100 ދުވަހުގެ ތެރޭގައި ރައްޔިތުންނަށް ފުރިހަމަކޮށް ދިނުމަށް ކަނޑައަޅާފައިވާ 161 ކަންތައްތަކަށް ވުރެ ގިނަ ކަންކަން އެ މުއްދަތުގައި ހާސިލް ކުރައްވާނެ ކަމަށް އިންތިހާބީ ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ.
އަންނަ ހުކުރު ދުވަހު، ރައީސުލްޖުމްހޫރިއްޔާ ކަމުގެ ހުވާ ކުރައްވާ މުއިއްޒުގެ ވެރިކަމުގެ ފުރަތަމަ 100 ދުވަހުގެ މަގުޗާޓު އިފުތިތާހުކުރުމަށް ފަހު ދެއްކެވި ވާހަކަފުޅުގައި އެމަނިކުފާނު ވިދާޅުވީ "ދިވެހީންގެ ރާއްޖެ" އާރާސްތު ކުރުމުގެ މަސައްކަތް ފެށުމަށް ކައިރިވެފައިވާ ކަމަށެވެ. މުއިއްޒު ވިދާޅުވީ، މިރޭ އިއުލާނު ކުރެއްވީ ފުރަތަމަ 14 ހަފުތާގައި މެނިފެސްޓޯގައި ހިމެނިފައިވާ ކަންތައްތަކުގެ ތެރެއިން އެންމެ މަދުވެގެން ހާސިލް ކުރައްވާނެ ކަންކަން ކަމަށެވެ.
"އެއީ އެއްގޮތަކަށް ވެސް ހަމައެކަނި ކުރާނެ ކަންކަމެއް ނޫން. އިރާދަކުރެއްވިއްޔާ އަޅުގަނޑުމެންގެ ވުޒާރާތަކާއި ކުންފުނިތަކުން އެ އަށް ވުރެ މާ ގިނަ ކަންކަން ވެސް ހާސިލް ކުރާނެ،" މުއިއްޒު ވިދާޅުވިއެވެ.
"އަޅުގަނޑުމެންގެ ބަޖެޓާއި އާމްދަނީ ހޯދޭ މިންވަރާއި ޕްލޭންތައް ކުރެވޭ ގޮތާ އަޅުގަނޑުމެން އެކުގައި ކުރެވޭ މަސައްކަތުގެ ނަތީޖާއަކަށް ވާނީ ރައްޔިތުންނާ ގުޅިގެން ކުރެވޭ މަސައްކަތުގެ ނަތީޖާއަކަށް ވާނީ މިތަނުގައި އިއުލާން ކުރެވުނު 14 ހަފްތާގެ ޕްލޭންގައި ހުރި ކަންކަމަށް ވުރެ ވެސް އިތުރަށް އިރާދަކުރެއްވިއްޔާ ކަންކަން ހާސިލްވެގެންދާނެ،"
މުއިއްޒު ވިދާޅުވި ގޮތުގައި މެނިފެސްޓޯގައި ހުރި ކަންކަމަކީ ރައްޔިތުންނަށް ހާސިލްކޮށް ދެއްވާނެ ކަންކަމެވެ. ކެމްޕެއިނުގެ އެންމެ ފުރަތަމަ ދުވަހުން ފެށިގެން އެންމެ ފަހު ދުވަހާ ހަމައަށް ދެއްކެވި ހުރިހާ ކަމެއް، ވައުދެއް އޭގެ އެންމެ ފުރިހަމަ އަށް ފުއްދައި ދެއްވާނެ ކަން ފާހަގަ ކުރައްވައި މުއިއްޒު ވިދާޅުވީ މިރޭ ނެރުނު ފޮތަކީ ވެސް އެކަންކަން ހާމަކަން ބޮޑުކޮށް ފުރިހަމަކޮށް ދިނުމުގެ ބޭނުމުގައި ނެރުނު ފޮތެއް ކަމަށެވެ.
"އަޅުގަނޑަށް ބައެއް ބޭފުޅުން ދެންނެވި ތިއީ ވަރަށް ގޯސްކަމެކޭ ތި ކުރެއްވެވީ. ވަރަށް ނުރައްކާތެރި ކަމެކޭ. ތި ފޮތް ނެރެގެން ނޯންނާއޭ ފިލޭނެ އެއް ގޮތް ވެސް. އަޅުގަނޑު ދެންނެވިން ދެއްތޯ ކެމްޕެއިންގައި އަޅުގަނޑު ރައްޔިތުން ގާތަށް އައީ ކެމްޕެއިންކޮށް ނިންމައި، ރައްޔިތުން އަޅުގަނޑުމެންނަށް ތާއީދުކޮށް ހޮވީމާ ފިލާކަށް ނުނޭ،" މުއިއްޒު ވިދާޅުވިއެވެ.
މުއިއްޒު ވިދާޅުވި ގޮތުގައި އާ ސަރުކާރު ވެގެންދާނީ އެއްވެސް ކަމެއް ނުފޮރުވާނެ ސަރުކާރަކަށެވެ.
"ފޮރުވުމުގެ ބޭނުމެއް ވެސް ނެތް. ކޮން ކަމެއްތޯ ފޮރުވަން އޮތީ؟ ރައްޔިތުންނަށްޓަކައި ރައްޔިތުންނަށް ހިދުމަތް ކުރަން ސަރުކާރެއް ހޮވީމާ ދެން ފޮރުވަން ޖެހޭ ކަމެއް ނޯންނާނެ،" މުއިއްޒު ވިދާޅުވިއެވެ.
މުއިއްޒު ވިދާޅުވި ގޮތުގައި އާ ސަރުކާރުން މި ފަށަނީ ގައުމު އިސްތިގްލާލް ސަލާމަތްކޮށް އިގްތިސާދު ނަގައި ކޮޅަށް ޖެހުމުގެ ދަތުރު ކަމަށެވެ. މިއީ ރާއްޖޭގެ އުމްރާނީ ތަރައްގީ މިހާރު ސޮއްސާލާފައި އޮތް ހިސާބުން ނަގައި ދިވެހިން އެދޭ ހިސާބަށް ގެންދިއުމަށް ފައްޓަވާ ދަތުރެއް ކަމަށް އެމަނިކުފާނު ވިދާޅުވިއެވެ. ގެދޮރުވެރިކަމާއި އިޖުތިމާއީ ތަރައްގީ ރައްޔިތުންނާ ހަމައަށް ގެނެސްދީ، ގެއްލިފައިވާ ރީތި އާދަތައް އަނބުރާ ގެނެސްދޭން ބޭނުންވާ ކަމަށް އެމަނިކުފާނު ވިދާޅުވިއެވެ.
"ދިވެހި ގައުމިއްޔަތު އަނބުރާ އިއާދަކޮށް ދިވެހި ބަހާއި މާތްވެގެންވާ އިސްލާމް ދީނަށް އަޅުގަނޑުމެން ދޭ އަހަންމިއްޔަތު އަނެއްކާ ވެސް މީގެ ޒަމާންތަކެއް ކުރީގައި މި ގައުމު އޮތް ހިސާބަށް ގެންގޮސް އެކަން އަޅުގަނޑުމެން އުފާ ކުރާ ހިސާބަށް ގެންދާ ދަތުރު." މުއިއްޒު ވިދާޅުވިއެވެ.
