ސަޢޫދީ ޢަރަބިއްޔާގެ ރިޔާޟްގައި މިހާރު ކުރިއަށްދާ ޖޮއިންޓް އަރަބް އިސްލާމިކް އެކްސްޓްރާ އޯޑިނަރީ ސަމިޓްގައި ވާހަކަފުޅު ދައްކަވަމުން ފޮރިން މިނިސްޓަރ ޢަބްދުالله ޝާހިދު (އޯ.ޑީ.އާރް.އައި) ފަލަސްޠީނުގެ ރައްޔިތުންނަށް ދިމާވެފައިވާ ދަތިތަކަށް ލުޔެއް ހޯދައިދިނުމަށް އަވަސް ފިޔަވަޅުތަކެއް އެޅުމަށް ގޮވާލައްވާފައެވެ.
މިދިޔަ ހޮނިހިރު ދުވަހު ބޭއްވި މި ސަމިޓަކީ ފަލަސްތީނުގެ ރައްޔިތުންނާ ދެކޮޅަށް އިސްރާއީލުން ހިންގަމުންދާ އަނިޔާވެރި ހަމަލާތަކާ ބެހޭ ގޮތުން މަޝްވަރާ ކުރުމަށް ބޭއްވި ސަމިޓެކެވެ. މި ސަމިޓްގައި ފޮރިން މިނިސްޓަރ ބައިވެރިވެވަޑައިގަންނަވަނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ޚާއްޞަ މަންދޫބެއްގެ ހައިސިއްޔަތުންނެވެ.
ޚާރިޖީ ވަޒީރު ޝާހިދުގެ ވާހަކަފުޅުގައި، ފަލަސްޠީނުގެ ޢާންމުންނާ ދެކޮޅަށް އިސްރާއީލުން ހިންގަމުންދާ އަސްކަރީ ޙަމަލާތައް ހަރުކަށި އިބާރާތުން ކުށްވެރިކުރައްވައި، މިހާރުން މިހާރަށް ހަނގުރާމަ ހުއްޓާލަންޖެހޭކަމަށް ވިދާޅުވިއެވެ. އަދި އިންސާނީ ހާލަތު ގޯސްވަމުންދާތީ، ކާބޯތަކެއްޗާއި ބޭސް ފަދަ ޒަރޫރީ ތަކެތި ރައްކާތެރިކަމާއެކު ޣައްޒާއަށް ވަންނާނެކަން ކަށަވަރުކުރުމަށް އެއްބާރުލުން ދެއްވުމަށް އެދިވަޑައިގެންނެވިއެވެ. އަދި ބައިނަލްއަގްވާމީ އިންސާނީ ގާނޫނާ ހިލާފަށް ޣައްޒާގެ ރައްޔިތުންނަށް އެންމެން ގުޅިގެން އަދަބު ދިނުން ހުއްޓުވުމަށް ކުރެވެން ހުރި ހުރިހާ މަސައްކަތެއް ބައިނަލްއަގްވާމީ މުޖުތަމައުއަށް ހޭދަކުރުމަށްވެސް ޝާހިދު ގޮވާލެއްވި އެވެ.
ފަލަސްޠީނާއި، މުޅި މެދުއިރުމަތީގައި ދެމެހެއްޓެނިވި ޞުލްޙައާއި ހަމަޖެހުން ޤާއިމުކުރުމުގެ މަގަކީ، 1967 ވަނަ އަހަރުގެ ކުރިން އޮތް ބޯޑަރުތަކުގެ މައްޗަށް ބިނާކޮށް، އިރުމަތީ ގުދުސްއަކީ އެ ޤައުމުގެ ވެރިރަށް ކަމުގައި ކަނޑައަޅައި، ފަލަސްޠީނުގެ މިނިވަން ދައުލަތެއް ޤާއިމުކުރުންކަމުގައި މި ބައްދަލުވުމުގައިވެސް ރައީސްގެ ޚާއްސަ މަންދޫބު ވަނީ ތަކުރާރުކުރައްވާފައެވެ.
މި އެކްސްޓްރާ އޯޑިނަރީ ސަމިޓް މިނިގެން ދާނީ "އިސްރާއީލުން ފަލަސްތީނުގެ ރައްޔިތުންނާ ދެކޮޅަށް ޣައްޒާއާއި އަލްޤުދުސް އަލް ޝަރީފް ހިމެނޭގޮތަށް ފަލަސްތީނުގެ މުޅި ސަރަޙައްދުގައި އިސްރާއީލުން ހިންގާ ޙަމަލާތަކާ ބެހޭގޮތުން މަޝްވަރާކުރުމަށް "ޤަރާރު އޮފް ދަ ޖޮއިންޓް އަރަބް އިސްލާމިކް އެކްސްޓްރާ އޯޑިނަރީ ސަމިޓް" ބަލައިގަތުމަށްފަހު އެވެ.
މި ޤަރާރަކީ އިސްރާއީލުގެ ޣައިރު ޤާނޫނީ ޢަމަލުތައް ނިމުމަކަށް ގެނައުމަށާއި ފަލަސްޠީނުގެ ރައްޔިތުންގެ ޙައްޤުތައް ނިގުޅައިގަތުމަށް މެންބަރު ޤައުމުތަކުގެ އެއްބައިވަންތަކަން ހާމަކޮށްދޭ ޤަރާރެކެވެ. މި ޖޮއިންޓް އަރަބް އިސްލާމިކް އެކްސްޓްރާ އޯޑިނަރީ ސަމިޓަކީ އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ގެ ކުރިން ރާވާފައިވާ އެކްސްޓްރާ އޯޑިނަރީ އިސްލާމިކް ސަމިޓާއި އިމަޖެންސީ އަރަބް ސަމިޓްއާ އެއްކޮށް، ސައުދީ އަރަބިއްޔާއިން ބޭއްވި ސަމިޓެކެވެ.
މެމްބަރު 57 ގައުމެއް ހިމެނޭ އޯއައިސީއަކީ ފަލަސްތީނުގެ ރައްޔިތުންގެ ހައްގުގައި އަބަދުވެސް އަޑު އުފުލަމުން އަންނަ ޖަމިއްޔާއެކެވެ. 1976 ވަނަ އަހަރު އޯއައިސީގެ މެމްބަރަކަށް ވީ ފަހުން ރާއްޖެ އަކީ އެ ޖަމިއްޔާގެ އެކްޓިވް މެމްބަރެކެވެ.
