އިންޑިއާއާ ރާއްޖެއާއެކު ދެމި އޮތީ ދެގައުމުގެ ރައްޔިތުންގެ މެދުގައި އޮތް ބަދަހި ގުޅުމެއް ކަމަށާއި، އެގުޅުން އިތުރަށް ތަރައްގީކޮށް އަދި ދެމެހެއްޓުމުގައި އިންޑިއާ ދެމިއޮންނާނޭ ކަމުގައި، އިންޑިއާއިން ރާއްޖެއަށް ކަނޑައަޅުއްވާފަ ހުންނަވާ ސަފީރު މުނޫ މަހާވަރު ވިދާޅުވެއްޖެއެވެ.
އޭނާ މިހެން ވިދާޅުވީ މިއަދު ފާހަގަ ކުރެވެމުންދާ، ރާއްޖޭގެ 55 ވަނަ ޖުމުހޫރީ ދުވަހުގެ ތަހުނިޔާ ފޮނުވުމަށް ކުރެއްވި ޓުވީޓެއްގައެވެ.
މަހާވަރުގެ ޓުވީޓުގައި ވަނީ ޖުމުހޫރީ ދުވަހުގެ ހެޔޮއެދުންތައް ރާއްޖޭގެ އެންމެހާ ރައްޔިތުންނަށް އަރިސްކުރާކަމަށް ވިދާޅުވެފައެވެ.
Warm greetings and best wishes to the Government and people of Maldives on their Republic Day.
India remains committed to further enhancing its people-centric partnership with the Maldives.
— Amb Munu Mahawar (@AmbMunu) November 11, 2023
ފާއިތުވި ރިޔާސީ އިންތިޚާބު އިދިކޮޅު ކެނޑިޑޭޓް ޑރ. މުއިއްޒު ކާމިޔާބު ކުރައްވުމާއެކު ބައެއް ފަރާތްތަކުން ސިފަކުރަމުން އައިސްފައިވަނީ، މުއިއްޒުވެ ވެރިކަމުގައި އިންޑިއާ ރާއްޖޭގެ ގުޅުން ގޯސްވެގެން ދާނެކަމަށެވެ. އެހެންނަމަވެސް މުއިއްޒު ރިޔާސީ އިންތިޚާބު ކާމިޔާބު ކުރެއްވުމަށްފަހު މީޑިއާތަކަށް ދެއްވި އިންޓަވިއުތަކުގައި ވިދާޅުވެފައިވަނީ، އެމަނިކުފާނުގެ ސަރުކާރު ވެގެންދާނީ ހުރިހާ ގައުމަކާއެކީވެސް ގުޅުން ބާއްވާނެ ސަރުކާރަކަށް ކަމުގައެވެ. އެހެންނަމަވެސް ވެރިކަމާ ހަވާލުވެވަޑައިގެންނެވުމާއެކު، ރާއްޖޭގައިތިބި އިންޑިއާ ސިފައިން ރާއްޖެ ދޫކޮށް ދިއުމަށް އަމުރު ކުރައްވާނޭކަމަށްވެސް މުއިއްޒު ވިދާޅުވެފައި ވެއެވެ.
