2024 އިން ފެށިގެން ނަސްރުގެ ދުވަހަށް ދޭންޖެހޭ ސަމާލުކަން ސަރުކާރުން ފުރިހަމަޔަށް ދޭނެ ކަމަށް އިންތިޚާބީ ރައީސް ޑރ. މުޙައްމަދު މުއިއްޒު ވިދާޅުވެއްޖެއެވެ.
މިއަދު ފާހަގަކުރާ ދިވެހިންގެ 35 ވަނަ ނަސްރުގެ ދުވަހާއި ގުޅިގެން ކުރެއްވި ޓްވީޓެއްގައި އިންތިޚާބީ ރައީސް ވަނީ ނަސްރުގެ ދުވަހުގެ ހެޔޮ ދުޢާއާއި ތަހްނިޔާ ދިވެހި އެންމެހާ ލޮބުވެތި ރައްޔިތުންނަށް އަރިސްކުރައްވާފައެވެ.
އެމަނިކުފާނު ވިދާޅުވީ، ނަަސްރުގެ ދުވަހުގެ ޒިކުރާ އާކޮށް އެ ދުވަހާއި ބެހޭ މަޢުލޫމާތު، ޚާއްސަކޮށް ޒުވާނުންނަށް ފުރިހަމަ ގޮތުގައި ފޯރުކޮށްދިނުމުގެ މުހިއްމު ކަމަށްޓަކައި، 2024 އިން ފެށިގެން ނަސްރުގެ ދުވަހަށް ދޭންޖެހޭ ސަމާލުކަން ސަރުކާރުން ފުރިހަމަޔަށް ދޭނެކަމަށެވެ.
އެމަނިކުފާނު މިހެން ވިދާޅުވެފައިމިވަނީ މި ހިނގަމުންދާ ސަރުކާރުގެ 5 އަހަރުގައި ނަސްރުގެ ދުވަހަށް ސަމާލުކަން ނުދޭތީއެވެ. ރާއްޖޭގައި އެތައް އަހަރެއްކުރިން ފެށިގެން ކުލަގަދަކޮށް ފާހަގަކުރަމުންއައި ނަސްރުގެ ދުވަހަށް މިސަރުކާރުން ސަމާލުކަން ދީފައެއް ނުވެއެވެ. ޚާއްޞަކޮށް ނަސްރުގެ ދުވަހަކީ ދައުލަތުގެ މީޑިއާއިން ބޮޑެތި ކަވަރޭޖުތައް ގެނެސްދެމުން ދިޔަ ދުވަހެއްނަމަވެސް، އެއީ އެންމެ އިސްކަންދޭ ދުވަހުގެ ލިސްޓުން ފަހަތަށް ޖައްސާލައި، އެދުވަހުގެ ކަވަރޭޖު ދައުލަތުގެ މީޑިއާއިން ގެނެސްދެމުން ނުދެއެވެ.
ނަސްރުގެ ދުވަސް ފާހަގަކުރަނޫ 3 ނޮވެމްބަރު 1988 ވަނަ އަހަރު ލަންކާގެ ކުލީ ސިފައިންގެބަޔަކާއި ދިވެހިންގެ ބަޔަކު ގުޅިގެން މާލެއަށް އަރައި ދިން އުދުވާނުގައި ދިވެހިންނަށް ލިބުނު ނަސްރާ ކާމިޔާބީ ފާހަގަކުރުމަށެވެ. އެ އުދުވާނުގައި ދިވެހީންގެ 19 މީހަކު ޝަހީދުވިއެވެ.
