ނޯވޭގެ ފޯވާޑް ހާލަންޑްގެ ދެ ލަނޑާއެކު މޮޅުވެ, ޗެމްޕިއަންސް ލީގުގައި ސިޓީން ދަމަހައްޓަމުން އަންނަ މޮޅުވުމުގެ ސިލްސިލާ ދަމަހައްޓައިފިއެވެ.
މިސީޒަންގެ ޗެމްޕިއަންސް ލީގުގައި ސިޓީން ކުޅުނު ތިންވަނަ މެޗު ކާމިޔާބުކުރީ ސްވިޒަރލެންޑްގެ ޔަންގް ބޯއީސްއާ ވާދަކޮށް 3–1 ނެވެ. ރޭގެ މޮޅާއެކު ސިޓީ ވަނީ ޗެމްޕިއަންސް ލީގުގައި ބަލިނުވެ ޖެހިޖެހިގެން 16 މެޗު ހަމަކޮށްފައެވެ. މިއީ އެ ޓީމުގެ ކޯޗު ޕެޕް ގާޑިއޯލާގެ ކެރިއަރުގެ ރެކޯޑެކެވެ.
ރޭގެ މެޗު ފަށައިގެން ސިޓީން އައީ ބޯޅަ ހިފަހައްޓައިގެން ކުޅުމުގެ ބަދަލުގައި އެޓޭކް ކުރެވޭތޯ މަސައްކަތް ކުރަމުންނެވެ. މެޗުގެ ދެވަނަ ހާފް ފަށައިގެން ތިންވަނަ މިނެޓުގައި ސިޓީއަށް ލީޑް ނަގައިދިނީ ސްވިޒަރލެންޑްގެ ޑިފެންޑަރ އަކަންޖީއެވެ. އެކަމަކު އޭގެ ތިން މިނެޓު ފަހުން އެލިއާ ލަނޑެއް ޖަހާ ޔަންގް ބޯއީސް އަށް ނަތީޖާ ހަމަހަމަކޮށްދިނެވެ. ސިޓީން ދެވަނަ ފަހަރަށް ކުރިހޯދީ ހާލަންޑް 67 ވަނަ މިނެޓުގައި ޖެހި ޕެނަލްޓީންނެވެ. މިއީ މިސީޒަންގެ ޗެމްޕިއަންސް ލީގުގައި ހާލަންދްގެ ފުރަތަމަ ލަނޑެވެ. ސިޓީގެ ލީޑް ހާލަންޑް ފުޅާކޮށްދިނީ މެޗު ނިމެން ހަތަރު މިނެޓަށް ވެފައިވަނިކޮށް ރޮޑްރީ ތަނަވަސްކޮށްދިން ފުރުސަތެއްގައެވެ.
މި ގްރޫޕްގައި ދެން ހިމެނޭ ޖަރުމަނުގެ އާރްބީ ލައިޕްޒިގުން ވަނީ އަމިއްލަ ދަނޑުގައި ރެޑް ސްޓާ ބެލްގްރޭޑް 3-1 އިން ބަލިކޮށްފަ އެވެ. މި ނަތީޖާތަކާއެކު ސީޓި އެއް ވަނައިގައި އޮތީ ނުވަ ޕޮއިންޓާއިއެކު އެވެ. ދެ ވަނައިގައި ލައިޕްޒިގް އޮތީ ހަ ޕޮއިންޓް ހޯދައިގެންނެވެ. ޔަންގް ބޯއީސް އާއި ރެޑް ސްޓާ ބެލްގްރޭޑަށް ލިބިފައިވަނީ އެންމެ ޕޮއިންޓެކެވެ.
