ޗެލްސީ އާއި ރެއާލް މެޑްރިޑަށް ކުޅެފައިވާ ބެލްޖިއަމް ގައުމީ ޓީމުގެ ކުރީގެ ކެޕްޓަން، އެޑެން ހަޒާޑް ކުޅުން ހުއްޓާލައިފިއެވެ.
އުމުރުން 32 އަހަރުގައި ހަޒާޑް ކުޅުން ހުއްޓާލިއިރު، މިދިޔަ ސީޒަނަށް ފަހު ރެއާލް އިން ވަނީ އޭނާ ދޫކޮށްލައިފައެވެ. ޗެލްސީ ދޫކޮށް 2019 ވަނަ އަހަރު ރެއާލަށް ހަޒާޑް ބަދަލުވީ 89 މިލިއަން ޕައުންޑްގެ ޓްރާންސްފާ ފީއެއްގައެވެ. އެކަމަކު، ރެއާލަށް ހަޒާޑް ސްޕެއިން ލީގުގައި ކުޅުނީ 54 މެޗެވެ.
ޗެލްސީގައި މޮޅަށް ކުޅެ ދުނިޔޭގެ ތަރިއަކަށް ވިނަމަވެސް, ސްޕެއިންގެ ޗެމްޕިއަން ރެއާލް މެޑްރިޑްގައި ހޭދަކުރީ ކާމިޔާބު ކެރިއަރެއް ނޫނެވެ. ކްލަބްގައި ހޭދަކުރި އެންމެ ފަހު ސީޒަންގައި ފުރުޞަތު ލިބުނީ އެންމެ ހަ މެޗުންނެވެ.
ބެލްޖިއަމްގެ ކެޕްޓަންކަންވެސް ކުރި ހަޒާޑް ވަނީ ޑިސެމްބަރު މަހު ގައުމީ ޓީމަށް ކުޅުން ހުއްޓާލިކަން އިއުލާންކޮށްފައެވެ. އެންމެފަހުން ވަރލްޑްކަޕްގައި އޭނާ ބެލްޖިއަމް ޓީމަށް ކުޅުނެވެ. އެހެންކަމުން ބެލެވުނީ މިސީޒަންގައިވެސް ހަޒާޑް ފެންނާނެކަމަށެވެ. ނަމަވެސް ކުއްލި ގޮތަކަށް އޭނާ ވަނީ ކުޅުން ހުއްޓާލިކަން އިއުލާންކޮށްފައެވެ.
ސޯޅަ އަހަރުގެ ކެރިއަރެއްގައި 700 އަށްވުރެ ގިނަ މެޗު ކުޅުމަށް ފަހު، އަހަރެން މިއަދު މި ނިންމީ ކެރިއަރު ނިންމާލަން، ރެއާލް އިން މި އަހަރުގެ ޖޫން މަހު ކޮންޓުރެކްޓް ބާތިލްކުރުމުން ކްލަބަކާ ނުގުޅިހުރި ހަޒާޑް ބުންޏެވެ. އަމިއްލަ ނަފްސަށް އިތުބާރުކޮށް، އެންމެ ރަނގަޅު ވަގުތުގައި ހުއްޓާލަން އެނގެންޖެހޭ.
– ހަޒާޑު ބުނެފައިވެއެވެ.
ހަޒާޑްގެ ކެރިއަރުގައި ޗެލްސީގައި ހޭދަކުރި މުއްދަތުގައި ޕްރިމިއަރ ލީގު ދެފަހަރު ހޯދިއެވެ. 352 މެޗުން ޗެލްސީއަށް 110 ގޯލް ޖަހައިދިނެވެ. އެކަމަކު އެޖާދޫ ރެއާލްގައި ނުދެއްކުނެވެ. ބޮޑުބައި ހޭދަކުރީ އަނިޔާއާއި ފިޓްނަސްގެ މައްސަލަތަކުގައެވެ.
