އުތުރު ތިލަފަޅުގައި އެމްއެންޑީއެފްގެ ބޭނުންތަކަށް ތަރައްގީ ކުރަމުން އަންނަ ސަރަައްދު ފިޔަވާ އެފަޅުގެ ބާކީ ސަރަހައްދުތައް ރެސިޑެންޝަލް އޭރިޔާގެ ގޮތުގައި ކަނޑައަޅުއްވާފައިވާކަމަށް ސަރުކާރުން ރޭގެ ވަގުތެއްގައި ހާމަކުރައްވާފައިވަނިކޮށް، މިއަދުގެ ވަގުތެއްގައި ދިޔަރެސް ނޫހުގެ ނޫސްވެރިން ލޯންޗެއްގައި އެތަނަށް ގޮސް ހުއްދަނެތި ސިފައިންގެ ބަނދަރުތެރެއަށް ވަދެ، ވީޑިއޯކޮށް، ހުއްދަނެތި އެރަށަށް އެރުމަށް މަސައްކަތް ކޮށްފައިވާކަމަށް އެންއެންޑީއެފްއިން ބުނެފިއެވެ.

އެމްއެންޑީއެފްގެ ހުއްދަނެތި އުތުރު ތިލަފަޅުގައިވާ އެމްއެންޑީއެފްގެ ސަރަހައްދަށް ދިޔަރެސް ނޫހުގެ ނޫސްވެރިން މިއަދުގެ ވަގުތެއްގައި އަރަން މަސައްކަތް ކުރުމާއި ގުޅިގެން އެމްއެންޑީއެފްއިން ނެރުނު ނޫސްބަޔާނެއްގައި ވިދާޅުވެފައިވަނީ، އުތުރު ތިލަފަޅުގައި އެމްއެންޑީއެފްއިން ތަރައްގީ ކުރަމުން އަންނަ ބަނދަރުގެ މަސައްކަތް ދައްކާލުމަށް ވަރަށްފަހުންވެސް އެކަމަށް އެދުނު މީޑިއާތަކަށް ފުރުސަތު ފަހިކޮށްދީފައި ވަނިކޮށް،، ހުއްދަ ހޯދުމެއް ނެތި އެރަށަށް އަރަން އުޅުމަކީ ގާނޫނާއި ގަވާއިދާ ޚިލާފު، ސިފައިންގެ ވާޖިބުތަކާ މަސްއޫލިއްޔަތުތަކަށް ހުރަސްއެޅުމަށް ހިންގާފައިވާ ދަށުދަރަޖައިގެ އަމަލެއްކަން ފާހަގަކަށް އެކަން ހަރުކަށި އިބާރާތުން ކުށްވެރި ކުރާކަމުގައެވެ.

އެމްއެންޑީއެފްގެ މަރުކަޒު ތަކަކީ، ސިފައިންގެ ހުއްދަނެތި ވަނުން މަނާ ތަންތަނެވެ. އަދި އެފަދަ ތަނަކަށް ހުއްދަނެތި ބަޔަކު ވަންނަން މަސައްކަތް ކުރާނަމަ އެކަން ހުއްޓުވުމަކީ ސިފައިންގެ ގާނޫނާ ގަވައިދުތަކުން ސިފައިންގެ މައްޗަށް ލާޒިމް ކޮށްފައިވާ ކަމެކެވެ.

އެމްއެންޑީއެފްގެ ބަޔާނުގައި ވިދާޅުވެފައި ވެއެވެ.

އެމްއެންޑީއެފްގެ ބަޔާނުގައި އިތުރަށް ވިދާޅުވެފައިވަނީ، ސިފައިންގެ ބަނދަަރު ތަރައްގީ ކުރަމުން އަންނަ ސަރަހައްދަށް ހުއްދަނެތި އެރުމަށް މަސައްކަތް ކުރުމުން އެކަން ހުއްޓުވުމަށް އެރަށުގެ ސެކިއުރިޓީ ބެލެހެއްޓުމުގައި ހަރަކާތްތެރިވާ އެމްއެންޑީއެފްގެ ސާޖެންޓް ފަސްޓު ކުލާސް ރޭންކުގެ ބޭކަލެއް މަސައްކަތް ކޮށްފައިވަނީވެސް މި އުސޫލުން ކަމުގައެވެ.

ދުނިޔޭގެ ހުރިހާ ގައުމެއްގައިވެސް އަސްކަރިއްޔާގެ މަރުކަޒުތަކަށް ހުއްދަނެތި އެއްވެސް ފަރާތަކުން ވަނުމަށް މަސައްކަތް ކޮށްފިނަމަ އެކަން ވަރަށް ސީރިއަސް މައްސަލައެއްގެ ގޮތުގައި ބަލާ، އެފަދަ މަރުކަޒަކަށް ހުއްދަނެތި ބަޔަކު ވަންނަން މަސައްކަތް ކުރާނަމކަ އެކަން ހުއްޓުވުމަށް ހަތިޔާރުގެ ބޭނުން ކުރުންވެސް ހުއްދަ ކުރެވިފައިވާކަން ފާހަގަ ކުރަމެވެ.

އެމްއެންޑީއެފްގެ ހުއްދަނެތި އުތުރު ތިލަފަޅުގައިވާ އެމްއެންޑީއެފްގެ ސަރަހައްދަށް ދިޔަރެސް ނޫހުގެ ނޫސްވެރިން ވަން މައްސަލަ ސީރިއަސް މައްސަލައެއްގެ ގޮތުގައި ބަލާނެކަން ހާމަކުރައްވަމުން އެމްއެންޑީއެފްއިން ވިދާޅުވެފައި ވެއެވެ.

އެމްއެންޑީއެފްއިން ވިދާޅުވެފައިވަނީ މިމައްސަލާގައި ގާނޫނާއި ގަވާއިދުގެ ތެރެއިން ފިޔަވަޅު އަޅުއްވައިދެއްވުމަށް ކަމާއިބެހޭ ފަރާތްތަކަށް ހުށަހަޅުއްވާނެ ކަމުގައެވެ.

އަދި އެއްވެސް ފަރާތަކުން ގާނޫނާއު ގަވާއިދާ ޚިލާފު އަދި ސިފައިންގެ މަސްއޫލިއްޔަތާއި ވާޖިބުތަކަށް ހުރަސް އެޅޭފަދަ ޒިންމާދާރުކަންކުޑަ އަމަލުތައް ނުކުރުމަށާއި، ސިފައިންނާ ގުޅޭގޮތުން ހަގީގަތާއި ޚިލާފް ދޮގު ވާހަކަތައް ނުފެތުރުމަށްވެސް އިލްތިމާސް ކޮށްފައި ވެއެވެ.