ކޮންމެ ކަމެއް ކުރުމުގައިވެސް ނިންމުމުގައިވެސް އަބަދުވެސް އިސްކުރާނީ ރައްޔިތުންގެ މަސްލަހަތު ކަމުގައި ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.
ރިޔާސީ ކެމްޕޭންގައި ރ. އަނގޮޅިތީމަށް ވަޑައިގެން އެރަށުގެ ރައްޔިތުންނާއި ބައްދަލު ކުރައްވާ ވާހަކަ ދައްކަވަމުން މުއިއްޒު ވިދާޅުވީ ރައްޔިތުން އިންތިޚާބު ކުރާ މީހުން މަސައްކަތް ކުރަންޖެހޭނީ ރައްޔިތުންނަށް ޚިދުމަތް ކުރުމުގެ އަޒުމުގައި ކަމަށެވެ. ވެރިކަމާއި ހަވާލުވުމަށްފަހު ކޮންމެ ވަގުތެއްގައިވެސް އަބަދުވެސް އިސްކުރާނީ ރައްޔިތުން ކަމަށް މުއިއްޒު ވިދާޅުވިއެވެ. އަދި ޚިދުމަތްދޭނީ އެއްވެސް ސިޔާސީ ފިކުރެއް ތަފާތުނުކޮށް ހަމަހަމަ ކަމާއިއެކު ރައްޔިތުންގެ އަޑު އަހައިގެން ކަމަށް މުއިއްޒު ވިދާޅުވިއެވެ.
އަޅުގަނޑު އަބަދުވެސް އިސްކުރާނީ ރައްޔިތުން. ރައްޔިތުންނާއި ގާތުން ދުވަހުން ދުވަހަށް މަސައްކަތް ކުރާނީ. އަޅުގަނޑު މަސައްކަތް ކުރާނީ ކައުންސިލްތައް ބާރުވެރިކޮށް ރައްޔިތުންގެ އަޑު އަހައިގެން ކަންކަން ކުރަން. އަބަދުވެސް އިސްވާނީ ރައްޔިތުން. މުއިއްޒު ވިދާޅުވިއެވެ.
އަނގޮޅިތީމަށް މުއިއްޒު ވެވަޑައިގެންނެވި ވައުދުތައް:
– ސްކޫލަށް ބޭނުންވާ ޖާގަ އިތުރުކޮށް މަލްޓިޕާޕޯސް ހޯލެއް ގާއިމް ކޮށްދޭނަން
– ސިއްޚީ ދާއިރާގެ ހިންގުން ހަރުދަނާ ކުރާނަން
– ބަނަދަރަށް ދިމާވެފައިވާ މައްސަލަތަކަށް ހައްލު ހޯދާ ދޭނަން
– މޫދަށް އެރޭ ސަރަހައްދެއް ގާއިމް ކޮށްދޭނަން
– ފުލުހުންގެ ޚިދުމަތްދޭނެ ގޮތެއް ހަމަޖައްސާނަން
– މަގުތައް ޒަމާނީ ފެންވަރަކަށް ހަދާދޭނަން
މުއިއްޒު ވިދާޅުވީ މިސަރުކާރުން ކަންކަން ކުރަމުންދާ ގޮތުން ރައްޔިތުން ތިބީ ބޮޑު މަޔޫސް ކަމެއްގައި ކަމަށެވެ. މިކަންކަމަށް ހައްލު ގެނެވޭނީ ހެޔޮ ބަދަލުތަކެއް ގެނެވިގެން ކަމަށެވެ. މުއިއްޒު ވިދާޅުވީ ރަށުގެ ތަރައްޤީއަކީ ސިޔާސީ ގޮތުން ޚިޔާލް ތަފާތުވުމަކުން ނުކޮށް ދޫކޮށްލެވޭ ކަމަކަށް ވެގެން ނުވާނެކަމަށެވެ. ތަރައްޤީ ހާސިލް ކޮށްދޭނީ ސިޔާސީ ގޮތުން ޚިޔާލް ތަފާތުވާ އެއްވެސް ރަށެއް އެއްވެސް މީހެއް ތަފާތު ނުކޮށް ކަމަށް މުއިއްޒު ވިދާޅުވިއެވެ.
