މިއަދު ޤައުމީ ދުވަސް ފާހަގަ ކުރަމުންދާއިރު، ގައުމުގެ ހުންގާނުގައި ތިބީ ގައުމަށް މި ފަސްގަނޑަށް ލޯތްބެއް، ކުލުނެތް، ރަހުމެއް އަދި މިގައުމުގެ ދަރީންގެ ލެޔަށް އިޙްތިރާމެއްވެސް ނެތް އަނިޔާވެރިންތަކެއް ކަމުގައި މާލެ ސިޓީ ކައުންސިލްގެ ޑެޕިއުޓީ މޭޔަރު އަހުމަދު ނަރީޝް ވިދާޅުވެއްޖެއެވެ.
މިއަދު ފާހަގަ ކުރަމުންދާ ޤައުމީ ދުވަހުގެ ތަނުހިނިޔާ ދިވެހި ރައްޔިތުންނަށް ފޮނުވައި ނަރީޝް ވިދާޅުވީ ދިވެހިރާއްޖޭގެ ފަހުރުވެރި ގައުމީ ދުވަސް، ބައްދަލު ކުރިއިރު ގައުމުގެ އެއްމެހާ ބަހާތަށް މިވަނީ ގެއްލިފައި ކަމަށެވެ. މިނިވަންކަމާއި ސިޔާދަތީ ބާރުތައް މިވަނީ އިންޑިއާގެ ބާރު ދަށުގައި، ކަމަށާއި ހާރިޖީ އަދި ދާޙިލީ ކަންކަމުގައި ބަސްބުނުމުގެ ބާރު މިވަނީ ދިވެހީނަށް ގެއްލިފައި ކަމަށެވެ. އަދި ދިވެހީންގެ އަމިއްލަވަންތަކަމާއި، އިޖްތިމާއި ފޭރާން ވަނީ ވީދި ހަލާކުވެ، އަދުލުވެރިކަމާއި އިންސާފަކީ މިގައުމުގައި ނެތް އެއްޗަކަށް ވެފައި ކަމަށް ނަރީޝް ވިދާޅުވިއެވެ.
ދިވެހިން އެއްމެ ފަހުރުވެރި ވާންޖެހޭ އަދި ދިވެހިރާއްޖޭގެ ދުސްތޫރުގައި އެދުވަހުގެ ވާހަކަ ހަމެކަނި ބަޔާންކުރާ ދުވަސް ކަމުގައިވާ “ގައުމީ” ދުވަސް އަޅުގަނޑުމެންނާއި ބައްދަލުވިއިރި މިގައުމަށް ލިބޭ އެއްމެބޮޑު އެއް ހިތާމަޔަކީ މިއަދު ގައުމުގެ ހުންގާނުގައި ގައުމަށް މި ފަސްގަނޑަށް ލޯތްބެއް، ކުލުނެތް، ރަހުމެއް އަދި މިގައުމުގެ ދަރީންގެ ލެޔަށް އިޙްތިރާމެއްވެސް ނެތް އަނިޔާވެރިންތަކެއް ވެރިކަމުގައި ތިބުން!
– ނަރީޝް ވިދާޅުވިއެވެ.
ނަރީޝް ވިދާޅުވީ މިގައުމުގެ ފަހުގެ ތާރީހުގައި ދިވެހީން ދެކުނު އެއްމެ ވަތަނީ އެއްމެ ގައުމީ އަދި މިގައުމުގެ މިނިވަންކަމާއި، ސިޔަދަތީ ބާރުތައް ނެގެހެއްޓެވި، ދިވެހީންގެ ކަންކަން ދިވެހީން އަމިއްލައަށް ނިންމާ ގައުމުގެ އެއްމެމަތީ މަސްލަހަތު ހިފެއްޓެވި، އަދި މިގައުމުގައި އިސްލާމްދީން މަތިވެރިކުރެއްވި ގައުމީ ދީނީ ލީޑަރު ރައީސް ޔާމީން މިއަނިޔާވެރިންގެ އަނިޔާގައި ޖަލު ތޭރިތަކުގެ ތެރެއަށް ނުހައްގުން ސިޔާސީ ގޮތުން ބަންދުކޮށްފައި ހުރި ހުރުމަކީ ގައުމީ ދުވަސް މިއަދު ބައްދަލުވާއިރު މިގައުމުގެ ރައްޔިތުން އެއްްމެ ހިތާމަކުރާ ކަރުނައަޅާ އެއްމެ ބޮޑު މައްސަލަ ކަމަށެވެ.
ސެޕްޓަމްބަރ 30 ވަނަ ދުވަހު އިރާދަކުރެއްވިއްޔާ ދިވެހި ރައްޔިތުންގެ ގޮތް ނިންމައި ދިވެހީންގެރާއްޖެ ދިވެހީންނަށް ހޯދައިދީ ދިވެހީންގެ ގައުމީ ލީޑަރ ރައީސް ޔާމީން މިނިވަންކުރާނެ ކަމުގައި ނަރީޝް ވިދާޅުވިއެވެ.
