ކުރީގެ ރައީސް ޔާމީންގެ ވެރިކަމުގައި ރާއްޖޭގެ ރަށްތަކުގައި އަޅާފައި ހުރި ހައުސިން ޔުނިޓްތަކުގެ އަގު 3،500ރ. އަށް ކުޑަކޮށް ދެއްވާނެ ކަމަށް އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވިދާޅުވެއްޖެއެވެ.

ޅ. ނައިފަރުގައި ޕީޕީއެމް/ޕީއެންސީން ބޭއްވި ޖަލްސާގައި މުއިއްޒު ވިދާޅުވީ ޔާމީންގެ ވެރިކަމުގައި އުތުރާއި ދެކުނާއި މެދުރާއްޖެ ތެރޭގައި މަޝްރޫއުތައް ހިންގި އިރު، މި ސަރުކާރު އައިސްގެން ނިމު މަޝްރޫއުތަކުގެ ކުލި ބޮޑު ކަމަށެވެ. މުއިއްޒު ވިދާޅުވީ ޔާމީންގެ ވެރިކަމުގައި ނިންމުނު މަޝްރޫއުތައް އެވްރެޖްކޮށް ހުންނާނީ 2،000ރ. އާއި 3،500ރ. އާ ދެމެދުގައި ކަމަށާޢި މި ސަރުކާރުން އައިސް ނައިފަރާއި ބައެއް ރަށްތަކުގައި ހައުސިން މަޝްރޫއުތަކުގެ ކުލި ހުރީ 5،000ރ. އިން މަތީގައި ކަމަށެވެ.

އަޅުގަނޑު ބަލާލައިފިން، ހިސާބުތައް، ކޯސްޓް ޖެހިފައި ހުރި ވަރު، އިމާރާތް އަޅަން ދިޔަ ވަރު. އެއީ ސަރުކާރުގެ ބަޖެޓުން ނޫނިއްޔާ އެކި ގޮތް ގޮތުން ހޯދާފައި ހުރި ފައިސާ އިން ޕްރޮޖެކްޓްސް ހިންގާފައި ހުރީ. އެހެންވީމަ، އޭގެ އަގާއި އިންޓަރެސްޓް ކޯސްޓާއި ފައިނޭންސް ކޯސްޓާ ހުރިހާ އެއްޗެއް އެއްކޮށްލައިފިއްޔާ 20 އަހަރަށް ބަހާލައިގެން ސަރުކާރަށް ދައްކަނީ ފައިސާ. އެހެންވެ އަގު ހަދާފައި އޮންނަނީ ފައިދާ ޖެހޭ ގޮތަށް.

– މުއިއްޒު ވިދާޅުވިއެވެ.

އެ ޕްރޮފިޓުން ބައެއް އުނިކޮށްލުން އެއީ ރައްޔިތުންގެ ހައްގުގައި ވަރަށް އެކަށީގެންވާ، އައުލާންކަން ބޮޑު ކަމެއް ކަމަށް މުއިއްޒު ވިދާޅުވިއެވެ. އެ ފައިދާއިން ބައެއް އުނިކޮށް 3500ރ. އަށް ކުލި ކުޑަކުރުމަކީ ވެސް ހަރަދު ޗަލާ ސަރުކާރަށް ފައިދާވާކަމެއް ކަމަށް މުއިއްޒު ވިދާޅުވިއެވެ.

މުއިއްޒު ވިދާޅުވީ ބައެއް މީހުން އެހެން ބުނީމަ، އިގްތިސާދު އަނދަވަޅަކަށް ވައްޓާލަނީ އޭ ބުނި ނަމަވެސް ޓެކްނިކަލް ބެކްގްރައުންޑެއް ނެތި އެއްވެސް ވާހަކައެއް ނުދައްކަވާ ކަމަށެވެ.