ޒުވާނުން ބޭނުންކުރަނީ ވޭތުވެދިޔަ ސަރުކާރުތަކުގެ އަމިއްލަ އެދުން ފުއްދަން ބޭނުންކުރާ ފައިފުއްސަކަށްކަމަށް ވިދާޅުވެ ޒުވާނުން އެކަމށް ސަމާލުވުމަށް ޖުމްހޫރީ ޕާޓީގެ ޑެޕިއުޓީ ލީޑަރު އައިޝަތު ނަހުލާ ވިދާޅުވެއްޖެއެވެ.
ޤާސިމް އިބްރާހީމްގެ ކެމްޕެއިން ޖަގަހަ ހުޅުވުމަށް ހުޅުމާލޭ ދެވަނަ ފިޔަވަހީގައި ރޭ ބޭއްވި ޖަލްސާގައި ވާހަކަފުޅު ދައްކަވަމުން، މިސަރުކާރުގެ ޓްރާންސްޕޯޓް މިނިސްޓަރުކަން ކުރައްވާ އަދި ޤާސިމް އިބްރާހީމްގެ އަނބިކަނބަލުން އައިޝަތު ނަހުލާ ވިދާޅުވީ ކުރީގެ ސަރުކާރުތަކުން ޒުވާނުންނަށް އެކި ހުވަފެންތައް ދައްކާފައިވާކަމަށެވެ. ޒުވާނުންގެ ނާޖާއިޒް ފައިދާ ސިޔާސީ ލީޑަރުން ނަގަން މަސައްކަތްކޮށްފައިވާކަން ފާހަގަކުރައްވާ ނަހުލާ ވަނީ އެ ފުރުޞަތު ނުދިނުމަށް ޒުވާނުންނަށް ގޮވާލާފައެވެ.
ގިނަ ޢަދަދެއްގެ ޒުވާނުން ބައިވެރިވި މި ހަރަކާތުގައި ނަހުލާ ވިދާޅުވީ، ސިޔާސީ ކަންކަން ހިނގަމުންދާގޮތް ޒުވާނުން ލޯ ހުޅުވައި ރަނގަޅަށް ބަލަންޖެހޭކަމަށެވެ. ކޮންމެ މީހެއްގެ ނަފްސަކީ އަގުބޮޑު އެއްޗެއްކަމަށާއި، ބޭނުންވީމަ ބޭނުންކޮށްލާފަ، ފެންކައްކާލާފަ، އެނދުދަށަށް ދޮންވެލިގަނޑަށްލާފަ ފަސްލާފައޮތް އެއްޗަކަށް ޒުވާނުން ނުވުމަށް ނަހުލާ އިލްތިމާސްކުރެއްވިއެވެ.
ކޮންމެ ބައެއް ވެސް ޒުވާނުން ބޭނުންކުރަނީ ސިޔާސީ މީހުންގެ، ވޭތުވެދިޔަ ސަރުކާރުތަކުގެ އަމިއްލަ އެދުން ފުއްދަން ބޭނުންކުރާ ފައިފުއްސަކަށް.
– ނަހުލާ ވިދާޅުވިއެވެ.
ނަހުލާ ވަނީ އެފަދަ ގޮތެއް ޤާސިމް އިބްރާހީމްގެ ވެރިކަމެއްގައި ނުހަދާނެކަމަށާއި، ޒުވާނުންނަށް ގިނަފުރުޞަތުތައް ތަނަވަސްކޮށްދޭނެކަމަށް ވިދާޅުވެފައެވެ. ޒުވާނުންނަށް ޕާޓިގެ އިސް ސަފުގައި މަސައްކަތްކުރުމުގެ ފުރުޞަތު އޮންނާނެކަމަށްވެސް ނަހުލާ ވިދާޅުވިއެވެ.
ޒުވާނުންނަށް އެންމެ ބޮޑު އަހަމިއްޔަތުކަމެއް ދީފައި އޮތީވެސް ޖޭޕީގެ މެނިފެސްޓޯގައިކަމަށްވެސް ނަހުލާ ވިދާޅުވިއެވެ.
