ސައުދި އަރަބިއާއިން ރާއްޖެއަށް ދޫކުރާ ހައްޖު ކޯޓާ 1،000 އިން 2،000 އަށް އިތުރު ކުރަން މަސައްކަތް ކުރައްވާނެ ކަމަށާއި އެކަން ހާސިލްވާނެ ކަމުގެ ޔަގީންކަން އެބައޮތް ކަމަށް ޕީއެންސީ/ޕީޕީއެމްގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.
ޕީޕީއެމްގެ ތާއީދު ބޮޑު، ޅ. ނައިފަރުގައި މިރޭ ކުރިއަށް ގެންދިޔަ ކެމްޕޭން ޖަލްސާގައި މުއިއްޒު ވިދާޅުވީ މި ސަރުކާރުގެ ހާރިޖީ ގުޅުންތަކުން ގައުމަށް ލިބުނު ފައިދާތަކެއް ފެންނަން ނެތް ކަމަށެވެ. އޭގެ ބަދަލުގައި ފެންނަން އޮތީ ވަކި ގައުމަކާއެކު ވެވުނު އެއްބަސްވުންތަކުގެ ސަބަބުން މިނިވަންކަން ނެތި ދިޔުން ކަމަށެވެ. ނަމަވެސް ސައުދީގެ ރަސްގެފާނު ސަލްމާނާއެކު ރައީސް ޔާމީން ގާތް ގުޅުމެއް އޮތުމުގެ ސަބަބުން އޭރު މާލޭގައި ބިނާ ކުރި އިސްލާމީ މަރުކަޒުގެ އިތުރުން، ގިނަ ކުރިއެރުންތަކެއް ލިބިގެން ދިޔަ ކަން މުއިއްޒު ފާހަގަ ކުރެއްވިއެވެ.
މުއިއްޒު ވިދާޅުވީ ރާއްޖެ އަށް 1،000 ހައްޖު ކޯޓާ ކަނޑައަޅާފައި އޮތުމުން ތަނަވަސްކަން ހުރި މީހުންނަށް ވެސް، އަދި ހައްޖުގެ އަޅުކަމަށް ބޭނުންވާ މީހުންނަށް ގިނަ އަހަރުތަކެއް މަޑުކުރަންޖެހޭ ކަމަށެވެ.
އަޅުގަނޑު މި ވަނީކީ ވައުދެއް ނޫން، ނަމަވެސް އަޅުގަނޑު އެ ކަމަށް މަސައްކަތް ކުރާނަން، ހައްޖުގެ ކޯޓާ 2،000 އަށް އިތުރުކުރުމަށް މަސައްކަތް ކުރާނަން، އެއަށް ވުރެ ވެސް އިތުރު ކުރުމަށް ދަންނަވައިގެން މަސައްކަތް ކުރާނަން.
– މުއިއްޒު ވިދާޅުވިއެވެ.
ނައިފަރަކީ ވެސް އިލްމުވެރިިން ގިނަ ރަށެއްކަން ފާހަގަ ކުރެއްވުމަށް ފަހު މުއިއްޒު ވިދާޅުވީ ގައުމުގައި ހުރި އިޖުތިމާއީ، އިގުތިސޯދީ ބޮޑެތި މައްސަލަތަކަށް އިލްމީ ދިރާސާތައް އިތުރުކުރަން ޖެހޭ ކަމަށެވެ. އެފަދަ ދިރާސާތައް އިތުރުކޮށް ގައުމުގެ އަމިއްލަ ފިކުރީ މުދާ އިތުރު ކުރުމަކީ އޭނާގެ ސަރުކާރެއްގައި އެންމެ އިސްކަމެއް ދެވޭނެ އެއް ކަންތައް ކަމަށެވެ.
