ދިވެހި ރައްޔިތުން ތިބީ ކުރިއަށް އޮތް ރިޔާސީ އިންތިޚާބު އެއްބުރުން ކާމިޔާބުކޮށް މިހާރު އޮތް ސަރުކާރު ބަދަލު ކުރަން ކެތް މަދުވެފައި ކަމަށް އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު ވިދާޅުވެއްޖެއެވެ.
ރިޔާސީ އިންތިޚާބުގައި ވާދަކުރެއްވުމަށް ޕްރޮގްރެސިވް ކޮންގްރެސް ކޯލިޝަނުން ވާދަކުރާނެ ކަމަށް ނިންމީ ޕީޕީއެމްގެ ރައީސް ޔާމީނެވެ. ނަމަވެސް އެކަމިނުފާނަށް އިންތިޚާބުގައި ވާދަކުރުމުގެ ދޮރު ބަންދުވުމާއިއެކު ބޭއްވުނު ޕްރައިމަރީ ކާމިޔާބުކޮށް ރިޔާސީ ޓިކެޓް ލިބިވަޑައިގެންނެވީ ޑރ.މުއިއްޒުއަށެވެ.
ކެންޑިޑެސީ އިލެކްޝަނަށް ހުށަހެޅުމަށްފަހު ކެމްޕޭނަށް ދަތުރުތައް ފެށުނީ އިންތިޒާމުތައް ހަމަޖައްސައި އޭގެ ދެތިން ދުވަސް ފަހުންވެެ. މިހާތަނަށް ވަޑައިގެންނެވި ރަށްތަކުން މުއިއްޒުއަށް ވަނީ ހޫނު މަރުހަބާއެއް ދަންނަވާފައެވެ. ޚާއްސަކޮށް އާބާދީ ބޮޑެތި ގިނަ ރަށްތަކުން މުއިއްޒުއަށް ދަންނަވާފައިވާ ހޫނު މަރުހަބާއަކީ މިއިންތިޚާބު ކާމިޔާބު ކުރުމަށް މުއިއްޒުއަށް ލިބިގެންދިޔަ އެންމެ ބޮޑު ހިތްވަރެވެ.
ކެމްޕޭންގައި މިއަދު ބ.ކެންދޫއަށް ވަޑައިގެން އެރަށުުގެ ރައްޔިތުންނާއި މުޚާތަބު ކުރައްވާ ވާހަކަ ދައްކަވަމުން މުއިއްޒު ވިދާޅުވީ ރަށްރަށަށް ވަޑައިގެންނެވުމުން މިހާތަނަށް ފެނިގެންދިޔައީ ރައްޔިތުން މިސަރުކާރު ބަދަލު ކުރަން ބޭނުންވެފައިވާ މިންވަރު ކަމަށެވެ. ރަށްރަށުގައި މިސަރުކާރުން މާގިނަ ތަރައްޤީ ގެނައިކަމަށް ވިދާޅުވާއިރު ރަށްރަށުގެ ސިއްޚީ ހާލަތު އިންތިހާއަށް ދަށްކަމުގެ ޝަކުވާއާއި، ތައުލީމާއި، ބީހިޔާވަހިކަމާއި އެނޫންވެސް ގިނަ މައްސަލަތަކުގެ ހައްލު ހޯދުމަށް ރައްޔިތުން އާދދޭހާއި އެކު އެދެމުން ދާކަމަށެވެ.
މުއިއްޒު ވިދާޅުވީ މިކަންކަން ކުރެވޭނީ ތަރައްޤީގެ ފިކުރުގެ ބަޔަކަށް ކަން ރައްޔިތުން ގަބޫލު ކުރާކަމަށެވެ. ރައްޔިތުން ތިބީީ މިއިންތިޚާބުގައި މިސަރުކަރު ބޮޑުތަނުން ބަލިކޮށް ތަރައްޤީގެ ފިކުރަށް ޖާގަދޭން ކެތް މަދުވެފައިކަމަށް މުއިއްޒު ވިދާޅުވިއެވެ.
PPM PNC ge Riyaasee Candidate Dr. Mohamed Muizzu B.Kendhoo rayyithunnaa badhdhalu kurevvun @MMuizzu #Vote4Muizzu#DrMuizzuSembe#DhiveheengeRaajje #FreePresidentYameen pic.twitter.com/0vPxO4zn92
— Progressive Party of Maldives (@ProgressPartyMV) August 30, 2023
މުއިއްޒު ވަނީ ކެންދޫގައި ދިމާވެފައިވާ ބިމުގެ ދަތިތަކާއިއެކުވެސް ބޯހިޔާވަހިކަމަށް ހައްލު ހޯއްދަވައި ދެއްވާނެކަމަށް ވިދާޅުވެފައެވެ. އަދި ތައުލީމާއި ދާއިރާއާއި ސިއްޚީ ދާއިރާއާއި އެނޫންވެސް ދާއިރާތަކުގައި ހުރި މައްސަލަތަކަށް ދާއިމީ ހައްލު ހޯދައި ދެއްވާނެކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ ވެރިކަމާއި ހަވާލުވުމަށްފަހު ރައްޔިތުން ތިބި ހާލަތު ބަދަލުކޮށް އުފާވެރިކަން ގެނެސްދެއްވާނެކަމަށެވެ. އަދި ރައްޔިތުން ތަރައްޤީއަަށް އެދޭ މިންވަރާއި އުންމީދުކުރާ ކަންކަން ހާސިލް ކުރުމުގައި 24 ގަޑިއިރު މުޅި ސަރުކާރު އޮންނާނީ ޚިދުމަތުގައިކަމަށް މުއިއްޒު ވިދާޅުވިއެވެ.
