އައްޑޫ ސިޓީގައި އެމްޑީއޭގެ ފަރާތުން ފޯކަލް ޕޮއިންޓުންގެ ގޮތުގައި ކަނޑައަޅުއްވާފައި ތިއްބެވި ތިންބޭފުޅުން ޖުމްހޫރީ ޕާޓީއާއި ގުޅިވަޑައިގެންފިއެވެ.
މިތިން ބޭފުޅުން ޖޭޕީއަށް ސޮއި ކުރެއްވީ އެޕާޓީގެ ރިޔާސީ ކެންޑިޑޭޓް ޤާސިމް އިބްރާހިމްގެ އަރިހުގައެވެ. އަދި ފޯމުތައް ވަނީ ޤާސިމާއި ހަވާލު ކުރައްވާފައެވެ. އައްޑޫއިން ސޮއިކުރި ތިން ބޭފުޅުންނަކީ އެމް.ޑީ.އޭ އައްޑޫ ފޭދޫ ފޯކަލް ޕޮއިންޓް ގެ ގޮތުގަައި މަސައްކަތް ކުރައްވަމުން ދިޔަ، ފޭދޫ މޫސާ ވަޖުދީ އާއި، އައްޑޫ ހިތަދޫ މުޙައްމަދު އަސްލަމްއާއި، ޢަބްދުލް ޢަފޫރެވެ.
ޤާސިމް ވިދާޅުވީ މިތިން ބޭފުޅުން ޖުމްހޫރީ ޕާޓީ އާއި ގުޅިވަޑައިގެން ކުރިއަށް އޮތް ރިޔާސީ އިންތިޚާބު ކާމިޔާބު ކޮށްދިނުމަށް މަސައްކަތް ކުރެއްވުމަށް ނިންމެވީތީ ނުހަނު އުފަލާ އެކު މަރުހަބާ ދަންނަވާ ޝުކުރު އަދާ ކުރާކަމަށެވެ. އަދި އަސްލަމާއި، އަބްދުލް ޢަފޫރާއި، ވަޖުދީ ފަދަ ގިނަ ޒުވާނުންގެ އެހީތެރި ކަމާ އެކު ޖުމްހޫރީ ޕާޓީ ދާނީ ކުރިއަށް ކަމަށް ޤާސިމް ވިދާޅުވިއެވެ.
އެމް.ޑީ.އޭ އައްޑޫ ފޯކަލް ޕޮއިންޓް ގެ ގޮތުގަައި މަސައްކަތް ކުރައްވަމުން ދިޔަ، އައްޑޫ ހިތަދޫ މުޙައްމަދު އަސްލަމްއާައި، ޢަބްދުލް ޢަފޫރު، ޖުމްހޫރީ ޕާޓީ އާއި ގުޅިވަޑައިގެން ކުރިއަށް އޮތް ރިޔާސީ އިންތިޚާބު އަޅުގަނޑަށް ކާމިޔާބު ކޮށްދިނުމަށް މަސައްކަތް ކުރެއްވުމަށް ނިންމެވީތީ ނުހަނު… pic.twitter.com/EUaOUnZ1cy
— Qasim Ibrahim (@qasimibrahim) August 19, 2023
ޖޭޕީން ގެންދަނީ ރިޔާސީ އިންތިޚާބުގެ ކެމްޕޭންގައި އަތޮޅު ތެރޭގައި ކެމްޕޭން ހަރަކާތްތައް ބާއްވަމުންނެވެ. އެގޮތުން ރޭ ކުޅުދުއްފުށީގައި ބޭއްވި ޖަލްސާގައި ޤާސިމް ވަނީ ރައްޔިތުން ލާ ވޯޓަކީ ފަހުން ހިތާމަ ކުރަންޖެހޭ ވޯޓަކަށް ނުހެދުމަށް ދަންނަވާފައެވެ.
ގާސިމް ވިދާޅުވި ގޮތުގައި ރައީސުލްޖުމްހޫރިއްޔާގެ މަގާމުގައި ހުންނަ މީހަކު ކޮށްދޭ ކޮންމެ ކަމަކީ އެ މީހަކު މަގާމުގެ ގޮތުން އަދާކުރަންޖެހޭ ޒިންމާއެވެ. އޭގެ ބަދަލުގައި ވިސްނަންވީ، ރައީސްގެ މަގާމުގައި ނެތް އިރު، އަމިއްލަ ހައިސިއްޔަތުން ގައުމަށާއި ރައްޔިތުންނަށް ކޮށްދިން ހިދުމަތާ މެދު ކަމަށް ގާސިމް ވިދާޅުވިއެވެ.
ގައުމެއް ކުރިއަރައި ދަނީ، ގާސިމް ވިދާޅުވި ގޮތުގައި ވެރިކަމަށް އަންނަ މީހަކުގެ ތަންދޮރު އެނގުމާއި ގާބިލުކަމާއި ތަސައްވަރެއްގެ މައްޗަށް ކަމަށެވެ.
