25 ވަނަ ދުނިޔޭގެ ސްކައުޓް ޖަމްބޮރީ ކުރިއަށްގެންދާ ދެކުނު ކޮރެއާގެ ބައެއް ސަރަހައްދުތަކަށް މިހާރު ކުރިމަތިވެފައިވާ ހޫނުގަދަވުން ނުވަތަ ހީޓްވޭވްގެ އަސަރު ޖަމްބޮރީގެ ބައެއް ހަރަކާތްތަކަށް ކޮށްފިއެވެ.
ޖަމްބޮރީގައި ބައިވެރިވާ ރާއްޖޭގެ ވަފުދުގެ އޮފިޝަލަކު ވިދާޅުވީ ކޮރެއާގެ ބައެއް ސަރަހައްދުތަކުގެ ފިނިހޫނުމިން 38 ޑިގްރީ ސެލްސިއަސް އަށް ވުރެ މަތީގައި ހުރިކަމަށެވެ. އަދި ޖަމްބޮރީ ކުރިއަށްގެންދާ ސަރަހައްދުގެ ފިނިހޫނުމިނާ ގުޅޭ ގޮތުން ވެސް ކޮރެއާގެ ކަމާބެހޭ ފަރާތްތަކުން ޕަބްލިކް ސޭފްޓީ އެލާޓް އެސްއެމްއެސް ސިސްޓަމް މެދުވެރިކޮށް އެތައް މެސެޖެއް ފޮނުވާފައިވާކަމަށް އެ އޮފިޝަލް ވިދާޅުވިއެވެ. އެހެންކަމުން ޖަމްބޮރީގެ ބައިވެރިންގެ ސަލާމަތާއި ރައްކާތެރިކަމަށްޓަކައި މިއަދުގެ ދުވާލުގެ އޮންސައިޓް ބައެއް ހަރަކާތްތައް ވެސް ކެންސަލްކޮށްފައި ވާކަމަށް އޮފިޝަލް ވިދާޅުވިއެވެ.
ޖަމްބޮރީގައި ބައިވެރިވާ ހުރިހާ ބައިވެރިންގެ ސަލާމަތާއި ދުޅަހެޔޮކަން ކަށަވަރު ކުރުމަށްޓަކައި އިންތިޒާމްކުރާ ފަރާތްތަކާއި ކޮރެއާގެ ކަމާބެހޭ ފަރާތްތަކުން ވަނީ ތަފާތު ފިޔަވަޅުތައް އަޅާފައެވެ. އެގޮތުން ބައެއް ފިޔަވަޅުތައް ތެރޭގައި ދިމާވެދާނެ ސިއްހީ މައްސަލަތަކަށް ތައްޔާރުވުމަށް އިތުރު ޑޮކްޓަރުން ހަމަޖެއްސުމާއި، ކޭމްޕް ކުރިއަށްދާ ސަރަހައްދަށް ފިނިކުރާ އުޅަނދުތައް ޑިޕްލޮއި ކުރުމާއި، ބައިވެރިންނަށް އެއްފަހަރާ ގަޑިއެއްހާއިރު އަރާމުކޮށްލުމަށް ފިނި ވަސީލަތެއްގެ ގޮތުގައި 130 ބަސް ހަމަޖެއްސުން ހިމެނެއެވެ. މީގެއިތުރުން މަދުނުވާނެ ވަރަށް ފެންފޯރުކޮށްދީ ހިޔާވާނެ އިންތިޒާމްތައް ކޭމްޕް ސައިޓް ގައި ގާއިމްކުރާނެކަމުގެ ޔަގީންކަން އެގައުމުގެ ރައީސް ވަނީ ދެއްވާފައެވެ. މީގެ އިތުރުން ފަންކަލާއި ފިނިބުއިންތަކާއި އައިސް ކޭޕް ސައިޓުން ލިބޭނެ އިންތިޒާމް ވަނީ ހަމަޖައްސާފައެވެ.
މިހާތަށް ދުނިޔޭގެ ސްކައުޓް ޖަމްބޮރީގައި ރާއްޖެއިން ބައިވެރިވާ އެންމެބޮޑު ވަފުދު ކަމަށްވާ 426 ދިވެހީން މި ޖަމްބޮރީގައި ގެންދަނީ ބައިވެރިވަމުންނެވެ. މީގެ އިތުރުން ދުނިޔޭގެ 170 އަށްވުރެ ގިނަ ޤައުމުން 50،000 އަށްވުރެ ގިނަ ސްކައުޓުން މި ޖަމްބޮރީގައި ވަނީ ބައިވެރިވެފައެވެ.
ޖަމްބޮރީގައި ބައިވެރިވާ އެއްވެސް ދިވެއްސަކަށް މިހާތަނަށް ހޫނުގެ ސަބަބުން ސިއްހީ މައްސަލެއް ކުރިމަތިވެފައި ނުވާކަންވެސް މައުލޫމާތު ދެއްވި އޮފިޝަލް ފާހަގަކުރައްވައެވެ. އަދި ކޮރެއާއަށް ރާއްޖެއިން ކަނޑައަޅުއްވާފައި ހުންނަވާ ނޮންރެސިޑެންޝަލް ސަފީރު ހަސަން ސޯބިރު ދިވެހި ސަރުކާރުގެ ފަރާތުން، ޖަމްބޮރީގެ ބައިވެރިންގެ ހާލަތު ވަރަށް ގާތުން ބައްލަވަމުން ގެންދަވައެވެ.
ޖަމްބޮރީގެ ހަރަކާތްތަކަށް ދާއިރު، ބައިވެރިން ހައިޑްރޭޓް ކުރުމާއި އަވީގައި ގިނަ ވަގުތު ނޫޅޭނެ ގޮތްތަކަށް އިންތިޒާމުކުރުމަށް ދިވެހި އޮފިޝަލުންގެ ފަރާތުން ގެންދަނީ ރަނގަޅަށް ބަލަހައްޓަމުންނެވެ.
ދުނިޔޭގެ ސްކައުޓް ޖަމްބޮރީއަކީ ކޮންމެ ހަތަރު އަހަރަކުން އެއް އަހަރު ބާއްވާ ކޭންޕެކެވެ. ދެކުނުކޮރެއާގެ ސައެމަންގެއުމްގައި ބާއްވާ މިއަހަރުގެ ދުނިޔޭގެ ސްކައުޓް ޖަމްބޮރީގެ ޝިއާރަކީ " ޑްރޯ ޔުއަރ ޑްރީމް" އެވެ.
